రైతులకు భరోసా ఏది?

• రుణాలు ఇచ్చేందుకు బ్యాంకుల వెనుకంజ
• సగం కూడా లక్ష్యం చేరని వ్యవసాయ రుణాలు
• నిరుడు 50%, ఈ ఏడాది 53% మంజూరు
• సహకార బ్యాంకుల్లోనే అతి తక్కువ రుణాలు
• అప్పు పుట్టకపోవడంతో ఇబ్బందుల్లో రైతులు

హైదరాబాద్‌, నవంబర్‌ 13(నమస్తే తెలంగాణ): రైతులకు పంట రుణాలు ఇవ్వడంలో బ్యాంకులు పిసినారితనాన్ని ప్రదర్శిస్తున్నాయి. బడా వ్యాపారులకు పిలిచి మరీ అప్పులు ఇచ్చే బ్యాంకులు రైతులకు రుణాలు మంజూరు చేసేందుకు ససేమిరా అంటున్నాయి. స్టేల్‌ లెవల్‌ బ్యాంకర్ల కమిటీ వెల్లడించిన రుణాల వివరాలే ఇందుకు నిదర్శనం. ఈ నివేదిక ప్రకారం ఏ ఒక్క సీజన్‌లోనూ బ్యాంకులు పంట రుణాల లక్ష్యాన్ని చేరుకోవడం లేదు. నిర్దేశించుకున్న లక్ష్యంలో 50 శాతానికి మించి రుణాలు ఇవ్వడంలేదు. అదికూడా రైతులను నానాతిప్పలు పెట్టి, చెప్పులు అరిగేలా తిప్పించుకొని రుణాలు మంజూరు చేస్తున్నాయనే విమర్శలున్నాయి.

సహకార బ్యాంకుల్లో దారుణం

రైతులకు పంట రుణాలు మంజూరు చేయడంలో ప్రభుత్వ బ్యాంకులతోపాటు ప్రైవేట్‌, సహకార బ్యాంకులు సైతం నిర్లక్ష్యంగా వ్యవహరిస్తున్నాయి. ముఖ్యంగా రైతులకు సహాయం అందించేందుకు ఏర్పాటు చేసిన సహకార బ్యాంకులే మొండిచేయి చూపుతున్నాయి. మిగిలిన బ్యాంకులతో పోల్చితే సహకార బ్యాంకులే రైతులకు అత్యంత తక్కువగా రుణాలు మంజూరు చేస్తున్నాయి. నివేదిక ప్రకారం సహకార బ్యాంకులు నిరుడు వానకాలంలో రైతులకు రూ.12,588 కోట్ల రుణాలు ఇవ్వాలని లక్ష్యం పెట్టుకోగా.. కేవలం రూ.4,273 కోట్లు (33.94 శాతం)మాత్రమే మంజూరు చేశాయి. యాసంగిలో ఈ రుణాలు కేవలం 8.52 శాతానికే పరిమితమయ్యాయి. రూ.15,533 కోట్ల రుణాల్లో రూ.1,323 కోట్లు మాత్రమే మంజూరు చేశాయి. గత వానకాలంలో ఇవ్వాల్సిన రూ.15,533 కోట్ల రుణాల్లో రూ.5,318 కోట్లు (29.41శాతం) మాత్రమే మంజూరు చేశాయి.

ప్రైవేట్‌ బ్యాంకులే నయం

రైతులకు పంట రుణాలు మంజూరు చేయడంలో ప్రభుత్వ, సహకార బ్యాంకులతో పో ల్చితే ప్రైవేట్‌ బ్యాంకులే కొంత మెరుగ్గా ఉన్నా యి. నిరుడు వానకాలంలో 74.01%, యా సంగిలో 46.38%, ఈ ఏడాది వానకాలంలో 71.03% రుణాలను మంజూరు చేశాయి.

కరువులో రైతులు.. కనికరంలేని బ్యాంకులు

కాంగ్రెస్‌ సర్కార్‌ నిర్లక్ష్యం వల్ల ఇప్పటికే రాష్ట్రంలో కరువు ఏర్పడింది. ఇరిగేషన్‌ ప్రాజెక్టుల నుంచి నీళ్లు ఎత్తిపోయకుండా సాగునీటి కొరత తీసుకురావడంతోపాటు అప్రకటిత విద్యుత్తు కోతలతో వ్యవసాయాన్ని ఆగం చేసింది. దీంతో పంటలు ఎండిపోయి రైతులకు తీవ్ర ఆర్థిక నష్టం వాటిల్లింది. సుమారు రూ.20 వేల కోట్ల మేరకు పంట నష్టం వాటిల్లినట్టు స్వయంగా ప్రభుత్వమే తేల్చింది. అయినప్పటికీ రైతుల పట్ల బ్యాంకులు కనికరం చూపడం లేదు. కనీసం పాత రుణాల వసూళ్లనైనా వాయిదా వేయడం లేదు. ప్రస్తుత కరువు పరిస్థితుల్లో రైతులకు రుణాలిస్తే తిరిగి చెల్లించలేరేమోనని బ్యాంకర్లు భయపడుతున్నారు. అందుకే ఈ యాసంగిలో రైతులకు రుణాలు ఇవ్వకూడదని అంతర్గతంగా నిర్ణ యం తీసుకున్నట్టు తెలుస్తున్నది. ప్రభు త్వం సైతం అంతే నిర్లక్ష్యంగా వ్యవహరిస్తున్నది. బ్యాంకులతో మాట్లాడి రైతులకు రుణాలు మంజూరు చేయించడంలో ఘోరంగా విఫలమవుతున్నది.

వానకాలంలో 50%, యాసంగిలో 29 శాతమే

• ఎస్‌ఎల్‌బీసీ గణాంకాల ప్రకారం బ్యాంకులు నిరుడు వానకాలంలో నిర్దేశించుకున్న లక్ష్యంలో 50.87 శాతం మాత్రమే రుణాలు మంజూరు చేశాయి. రూ.1.65 లక్షల కోట్లను రుణ లక్ష్యంగా పెట్టుకోగా, చివరికి రూ.84,088 కోట్లను మాత్రమే మంజూరు చేశాయి. అంటే ఇంకా రైతులకు రూ.81 వేల కోట్ల రుణాలు ఇవ్వలేదు.
• నిరుడు వానకాలంతో పోల్చితే యాసంగిలో బ్యాంకులు అత్యంత తక్కువగా రుణాలను మంజూరు చేశాయి. నిర్దేశిత లక్ష్యంలో కేవలం 28.91% రుణాలు మాత్రమే మంజూరు చేసి చేతులు దులిపేసుకున్నాయి. వాస్తవానికి యాసంగిలో 2026 జూన్‌ 30 వరకు రూ.1.81 లక్షల కోట్ల రుణాలను మంజూరు చేయాలని లక్ష్యంగా పెట్టుకున్న బ్యాంకులు కేవలం రూ. 52,337 కోట్లను మాత్రమే
  మంజూరు చేశాయి.
• ఈ ఏడాది వానకాలంలో సెప్టెంబర్‌ 30 రైతులకు మంజూరు చేయాల్సిన రూ.1.81 లక్షల కోట్లలో రూ.96,942 కోట్లు (53.55 శాతం) మాత్రమే మంజూరు చేశాయి.