హోరెత్తిన ఓయూ

• హాస్టళ్ల కూల్చివేత యత్నంపై గళమెత్తిన విద్యార్థులు

• కరెంట్‌, నీళ్లు బంద్‌ చేసిన సర్కార్‌

ఉస్మానియా యూనివర్సిటీ, నవంబర్‌ 13..ఉస్మానియా యూనివర్సిటీలో ఉద్రిక్తత చోటు చేసుకుంది. పలు హాస్టళ్లకు నీటి, విద్యుత్‌ సరఫరా నిలిపివేసి, వాటిని కూల్చాలని ప్రయత్నిస్తున్న అధికారుల వైఖరికి నిరసనగా విద్యార్థులు ఓయూ పరిపాలనా భవనం ముందు మహాధర్నా చేపట్టారు. ఈ సందర్భంగా ధర్నా చేస్తున్న వారిని అడ్డుకున్న పోలీసులు అదుపులోకి తీసుకుని పోలీస్‌ స్టేషన్‌కు తరలించారు. ఈ క్రమంలో అక్కడ కొద్దిసేపు తోపులాట చోటు చేసుకుంది. ఓయూలో పోటీ పరీక్షలకు సిద్ధమవుతున్న వేల మంది విద్యార్థులు, నిరుద్యోగులకు ఆశ్రయమిచ్చే ఈ1, ఈ2, డీ హాస్టళ్లను కూల్చివేయాలని చేస్తున్న ప్రయత్నాలను విరమించుకోవాలని విద్యార్థులు డిమాండ్‌ చేశారు.

ఆ హాస్టళ్లకు విద్యుత్‌, నీటి సరఫరా నిలిపివేతపై తీవ్ర ఆగ్రహం వ్యక్తం చేశారు. అధికారులు స్పందించి, విద్యుత్‌, నీటి సరఫరాను పునరుద్ధరించాలని విద్యార్థులు డిమాండ్‌ చేశారు. లేనిపక్షంలో వివిధ విద్యార్థి సంఘాలు, నిరుద్యోగులతో కలిసి పెద్ద ఎత్తున ఉద్యమిస్తామని విద్యార్థులు హెచ్చరించారు. తీసుకుందని మండిపడ్డారు. ఎన్నికల సమయంలో హామీ ఇచ్చినట్లు ఉద్యోగాలను భర్తీ చేయకుండా, జాబ్‌ క్యాలెండర్‌ విడుదల చేయకుండా, నిరుద్యోగ భృతి మంజూరు చేయకుండా ఇప్పటికే నిరుద్యోగుల ఉసురు పోసుకుంటున్న రేవంత్‌రెడ్డి తాజాగా వారికి నగరంలో నిలువ నీడ లేకుండా చేయాలని చూస్తున్నారని ధ్వజమెత్తారు.

రాష్ట్ర ప్రభుత్వం ముందుగా ఓయూకు ప్రకటించిన వెయ్యి కోట్లు ముందుగా విడుదల చేయాలని డిమాండ్‌ చేశారు. ఈ నిరసనలో బీఆర్‌ఎస్‌వీ రాష్ట్ర ప్రధాన కార్యదర్శి కొంపెల్లి నరేశ్‌, నాయకులు జంగయ్య, నాగరాజు, సురేశ్‌, హరీశ్‌, కార్తీక్‌రెడ్డి, నిరుద్యోగ జేఏసీ చైర్మెన్‌ భీమ్‌రావు తదితరులు పాల్గొన్నారు.