ఆటో డ్రైవర్లకు ఇందిరమ్మ ఇండ్లు

సిటీబ్యూరో: సిటీలోని ఆటోరిక్షా కార్మికులకు హౌసింగ్‌ బోర్డు ఆధ్వర్యంలో ఆటోనగర్‌ కాలనీ పేరుతో ఇందిరమ్మ ఇండ్లు నిర్మించేందుకు ప్రభుత్వం ఆమోదం తెలిపింది. ఈమేరకు క్యూర్‌ పరిధిలోని బండ్లగూడ, గంధంగూడ, పేట్‌ బషీరాబాద్‌, జల్‌ పల్లి(లక్ష్మీగూడ) ప్రాంతాల్లో ఇందిరమ్మ ఇండ్ల ప్రాజెక్టును చేపట్టనున్నట్లు జీవో విడుదల చేసింది. ఒకో ప్రాంతంలో 500 ఫ్లాట్ల చొప్పున మొత్తం 2,000 ఫ్లాట్లను నిర్మించనున్నట్లు మంత్రి పొంగులేటి శ్రీనివాసరెడ్డి తెలిపారు. ఈ ప్రాజెక్టుకు సుమారు రూ.220 కోట్ల అంచనా వ్యయం అవుతుందని వెల్లడించారు.

ఈ పథకం ప్రత్యేకంగా ఆటోరిక్షా కార్మికుల కోసమే రూపొందించామని, ఇళ్ల కేటాయింపు, ఆర్థిక సహాయం, అర్హత ప్రమాణాలు తదితర అంశాలకు సంబంధించి ఇప్పటికే అమల్లో ఉన్న ఇందిరమ్మ ఇండ్ల టవర్స్‌ పథకం నిబంధనలే వర్తిస్తాయని మంత్రి స్పష్టం చేశారు. అర్హులైన ఆటో కార్మికులకు పారదర్శకంగా ఇళ్లను కేటాయించేలా ప్రభుత్వం చర్యలు తీసుకుంటుందని తెలిపారు. ప్రాజెక్టు అమలుకు స్థలాల లభ్యత, సాంకేతిక అంశాలు, భౌగోళిక అనుకూలతలను పరిశీలించి డీపీఆర్‌ రూపొందించడంతో పాటు ఆర్థిక ప్రతిపాదనలు సిద్ధం చేసి సమర్పించాలని హౌసింగ్‌ బోర్డు అధికారులను ఆదేశించినట్లు మంత్రి వివరించారు.