సీఎం ఇలాకాలో విద్యార్థులే స్వీపర్లు

• రాజకీయాల్లో స్వీపర్‌ బిజీబిజీ

కోస్గి, నవంబర్‌ 13 : పాఠశాలలో విద్యార్థులే ఉపాధ్యాయులుగా వ్యవహరించిన వేళ.. అన్న వార్తలు వింటుంటాం.. కానీ నారాయణపేట జిల్లా కోస్గి మున్సిపాలిటీలోని నాగసాన్‌పల్లిలో మాత్రం విద్యార్థులు స్వీపర్లుగా మారారు. ఈ ఘటన సీఎం ఇలాకా.. విద్యాశాఖ మంత్రి జిల్లాలో విద్యా వ్యవస్థ దీనస్థితికి నిదర్శనంగా నిలిచింది. నాగసాన్‌పల్లి ప్రాథమిక పాఠశాలలో ఐదు తరగతులు కొనసాగుతుండగా.. ఇద్దరు ఉపాధ్యాయులు విధులు నిర్వర్తిస్తున్నారు.

ఇక్కడ స్వీపర్‌గా పనిచేస్తున్న వ్యక్తి చాలా రోజులుగా విధులకు రాకుండా, అధికార పార్టీ నాయకులతో కలిసి తిరుగుతున్నాడని స్థానికులు ఆరోపిస్తున్నారు. ఎప్పుడో ఒకసారి డ్యూటీకి హాజరవుతున్నాడని, దీంతో నిత్యం పాఠశాల ఆవరణను విద్యార్థులే శుభ్రం చేయాల్సిన దుస్థితి నెలకొన్నదని తల్లిదండ్రులు ఆరోపిస్తున్నారు. శుక్రవారం పాఠశాల ఆవరణను విద్యార్థులు శుభ్రం చేస్తున్న దృశ్యాలను ‘నమస్తే తెలంగాణ’ క్లిక్‌ మనిపించింది. శనివారం బాలల దినోత్సవం సాక్షిగా విద్యాశాఖ మంత్రి ఇలాకాలో విద్యార్థుల భవితకు ఇదో మాయని మచ్చగా మిగిలింది.