బీబీనగర్‌ ఎయిమ్స్‌కు బస్సులు నడుపాలి

• మాజీ ఎంపీ బోయినపల్లి వినోద్‌కుమార్‌ డిమాండ్‌

• మంత్రి పొన్నం, సంస్థ ఎండీ నాగిరెడ్డికి లేఖ

హైదరాబాద్‌, నవంబర్‌ 10 (నమస్తే తెలంగాణ): బీబీనగర్‌ ఎయిమ్స్‌కు అన్ని జిల్లాల నుంచి బస్సులు నడుపాలని మాజీ ఎంపీ బోయినపల్లి వినోద్‌కుమార్‌ డిమాండ్‌ చేశారు. హైదరాబాద్‌లోని ఉప్పల్‌ జంక్షన్‌ నుంచి ఎయిమ్స్‌కు ప్రతి 30 నిమిషాలకూ ఒక ప్రత్యేక బస్సును నడుపాలని కోరారు. ఈ మేరకు రవాణాశాఖ మంత్రి పొన్నం ప్రభాకర్‌, ఆర్టీసీ మేనేజింగ్‌ డైరెక్టర్‌ వై నాగిరెడ్డికి లేఖ రాశారు. 2016లో తెలంగాణ రాష్ట్ర తొలి ముఖ్యమంత్రి కల్వకుంట్ల చంద్రశేఖర్‌రావు ఎయిమ్స్‌ ఏర్పాటుకు చొరవ తీసుకున్నారని వినోద్‌ గుర్తుచేశారు.

కేసీఆర్‌ ప్రయత్నాల ఫలితంగా ఎయిమ్స్‌ మంజూరైందని, అప్పటి రాష్ట్ర ప్రభుత్వం బీబీనగర్‌లో సుమారు 200 ఎకరాల భూమిని కేటాయించిందని వివరించారు. ‘ఏ జిల్లాకు చెందిన వారైనా, ఏ ఆర్థిక స్థితిలో ఉన్న వారైనా నాణ్యమైన వైద్య సేవలను సులభంగా పొందగలిగేలా రవాణా సౌకర్యాలు కల్పించాలి’ అని స్పష్టం చేశారు. ప్రజా ప్రయోజనాలను దృష్టిలో ఉంచుకొని రవాణా సదుపాయాలపై మంత్రి, ఆ సంస్థ ఉన్నతాధికారులు సానుకూలంగా స్పందించి త్వరితగతిన నిర్ణయం తీసుకోవాలని వినోద్‌ కుమార్‌ విజ్ఞప్తి చేశారు.