2024 ఎన్నికల ఓట్ల లెక్కింపులో భారీ తేడా

• 51 స్థానాల్లో పోలైన ఓట్లు, లెక్కించిన ఓట్లలో తేడా!
• ఈసీ అంతర్గత రికార్డుల్లో విస్తుపోయే వాస్తవాలు

న్యూఢిల్లీ : 2024 ఎన్నికల నిర్వహణ, ఓట్ల లెక్కింపుపై మరోసారి తీవ్ర చర్చకు దారితీసే అంశాలు వెలుగులోకి వచ్చాయి. మహారాష్ట్ర, హర్యానా, జమ్ముకశ్మీర్‌లలోని 51 అసెంబ్లీ, లోక్‌సభ స్థానాల్లో పోలైన ఓట్ల సంఖ్యకు, ఎలక్ట్రానిక్‌ ఓటింగ్‌ యంత్రాల్లో(ఈవీఎం) లెక్కించిన ఓట్ల సంఖ్యకు మధ్య వ్యత్యాసాలు ఉన్నట్లు ‘ది రిపోర్టర్స్‌ కలెక్టివ్‌’ పరిశోధనాత్మక కథనం వెల్లడించింది. ఎన్నికల సంఘం(ఈసీ) అంతర్గత రికార్డులను పరిశీలించి ఈ వివరాలను బయటపెట్టినట్లు తెలిపింది. ఈ మూడు ప్రాంతాల్లోని 467 అసెంబ్లీ, 63 లోక్‌సభ నియోజకవర్గాలకు సంబంధించిన రికార్డులను పరిశీలించినట్లు పేర్కొంది. మొత్తం 530 నియోజకవర్గాలకు సంబంధించిన 4,212 భౌతిక రికార్డులను డిజిటలైజ్‌ చేసి, మళ్లీ తనిఖీ చేసి విశ్లేషించినట్లు వివరించింది.

19 స్థానాల్లో ఓటర్ల సంఖ్య సున్నా!

51 స్థానాల్లో ఈసీ అంతర్గత రికార్డుల ప్రకారం ఎన్నికల్లో అక్రమాలు జరిగాయా లేదా అనేది నిర్ధారించేందుకు అవసరమైన సమాచారం అందుబాటులో లేదని ‘ది రిపోర్టర్స్‌ కలెక్టివ్‌’ తెలిపింది. వీటిలో 19 స్థానాల్లో పోలింగ్‌ కేంద్రాలకు వచ్చిన ఓటర్ల సంఖ్యను అధికారులు నమోదు చేయలేదు. ఆ వివరాలు నమోదు చేయాల్సిన చోట ‘సున్నా’ లేదా ‘నిల్‌’ అని రాశారు. ఈ 19 స్థానాల్లో మహారాష్ట్ర, హర్యానాకు చెందిన పది స్థానాలు ఉన్నాయి. వీటిలో ఏడింటిని బీజేపీ, లేదా బీజేపీ నేతృత్వంలోని ఎన్డీఏ గెలుచుకుంది. పోలింగ్‌కు వచ్చిన ఓటర్ల సంఖ్యను సున్నాగా నమోదు చేయడం అంటే అక్కడ ఎవరూ ఓటు వేయలేదని అర్థం కావచ్చు. లేదంటే అధికారులు తప్పుడు వివరాలు నమోదు చేసి ఉండవచ్చని పేర్కొంది. మరో 32 నియోజకవర్గాల్లో పోలైన ఓట్ల సంఖ్యకు , ఈవీఎంలలో లెక్కించిన ఓట్ల సంఖ్యకు మధ్య వ్యత్యాసం ఉన్నట్లు గుర్తించింది. వీటిలో 12 స్థానాల్లో పోలైన ఓట్ల కంటే ఈవీంఎలలో లెక్కించిన ఓట్లు తక్కువగా ఉన్నాయి. మిగిలిన 20 స్థానాల్లో పోలైన ఓట్ల కంటే లెక్కించిన ఓట్లు ఎక్కువగా ఉన్నట్లు రికార్డులు చూపిస్తున్నాయని వెల్లడించింది.

బద్ధల్‌లో 3.32 లక్షల ఓట్లు.. లెక్కించింది 1.60 లక్షలే!

హర్యానాలోని బద్ధల్‌ అసెంబ్లీ నియోజకవర్గంలో వ్యత్యాసం భారీగా ఉన్నట్లు పరిశోధనలో తేలింది. 2024 అక్టోబరులో జరిగిన ఎన్నికల్లో ఈ నియోజకవర్గంలో 3.32 లక్షల ఓట్లు పోలైనట్లు ఈసీ అంతర్గత రికార్డులు సూచిస్తున్నాయి. అయితే ఈవీఎంలలో కేవలం 1.60 లక్షల ఓట్లనే లెక్కించినట్లు అధికారిక వివరాలు చెబుతున్నాయి. ఈ నియోజకవర్గంలో బీజేపీ అభ్యర్థి ధనేశ్‌ అద్లఖా, కాంగ్రెస్‌ అభ్యర్థి ప్రతాప్‌ సింగ్‌పై 6,181 ఓట్ల తేడాతో విజయం సాధించారు. ఓట్ల చోరీ జరిగిందని ఆరోపిస్తూ విజయ్‌ ప్రతాప్‌ సింగ్‌ పంజాబ్‌-హర్యానా హైకోర్టును ఆశ్రయించారు. ఎన్నికలకు సంబంధించిన అన్ని రికార్డులు, పోలింగ్‌ రోజు సీసీటీవీ దృశ్యాలను అందించాలని కోరారు.

ముంబై నార్త్‌లో 7.78 లక్షల ఓట్ల వ్యత్యాసం

మహారాష్ట్రలోని ముంబై నార్త్‌ లోకసభ నియోజకవర్గంలోనూ భారీ వ్యత్యాసం కనిపించినట్లు తేలింది. కేంద్రమంత్రి పీయూష్‌ గోయల్‌ తొలిసారి లోక్‌సభకు ఎన్నికైన ఈ నియోజకవర్గంలో ఈసీ అంతర్గత రికార్డుల ప్రకారం 18.11 లక్షల ఓట్లు పోలయ్యాయి. అయితే అధికారిక లెక్కల ప్రకారం ఈవీఎంలలో లెక్కించింది 10.33 లక్షల ఓట్లే. అంటే 7.78 లక్షల ఓట్లు(పోలయిన ఓట్లులో 42.8 శాతం) లెక్కింపులోకి రాలేదని వెల్లడైంది. హర్యానాలోని కైతల్‌ అసెంబ్లీ నియోజకవర్గంలో ఈసీ అంతర్గత ఆడిట్‌ రికార్డుల ప్రకారం అక్కడ కేవలం 215 మంది మాత్రమే ఓటు వేసినట్లు నమోదైంది. కానీ ఈవీఎంలలో మాత్రం 1,67,285 ఓట్లను లెక్కించారు. ఈ నియోజకవర్గంలో కాంగ్రెస్‌ అభ్యర్థి సుర్జేవాలా బీజేపీ అభ్యర్థి లీలారామ్‌పై 8,124 ఓట్ల ఆధిక్యంతో విజయం సాధించారు. జమ్ముకశ్మీర్‌లోని శ్రీనగర్‌ లోక్‌సభ నియోజకవర్గంలో ఈవీఎంలలో 6,72,924 ఓట్లు లెక్కించగా, అంతర్గత రికార్డుల్లో 6,66,046 ఓట్లు మాత్రమే పోలైనట్లు నమోదైంది.

ఎన్నికల రికార్డులపై ఈసీ వివరణ

2024 హర్యానా అసెంబ్లీ ఎన్నికల అనంతరం 20 స్థానాల్లో రీపోలింగ్‌ నిర్వహించాలని కాంగ్రెస్‌ డిమాండ్‌ చేసింది. దీనికి స్పందించిన ఈసీ 1,600 పేజీల నివేదికను సమర్పించింది. ఎన్నికల్లో ప్రతి దశ సజావుగా సాగిందని పేర్కొంది. మహారాష్ట్రలోని రెండు నియోజకవర్గాల్లో ఓటర్లను ఓటువేయకుండా అడ్డుకోవడంపై ఎన్సీపీ(శరద్‌చంద్ర పవార్‌) కొన్ని వీడియోలను ఈసీకి సమర్పించింది. రీ పోలింగ్‌ కోరినా, రిటర్నింగ్‌ అధికారులు ఆ విజ్ఞప్తిని తిరస్కరించారు. 2024లో అసోసియేషన్‌ ఫర్‌ డెమోక్రటిక్‌ రిఫామ్స్‌(ఏడీఆర్‌) సంస్థ లోక్‌సభ ఎన్నికలకు సంబంధించిన అన్ని ఫారమ్‌-17 రికార్డులు బహిర్గతం చేయాలని సుప్రీంకోర్టును ఆశ్రయించింది. అయితే అభ్యర్థి, లేదా ఏజెంట్‌కు తప్ప ఇతరులకు ఈ రికార్డులు అందించాల్సిన చట్టపరమైన బాధ్యత తమకు లేదని ఈసీ వాదించింది. ఈ వ్యవహారంపై ఈసీకి తాము పలు ప్రశ్నలు పంపినట్లు ‘ది రిపోర్టర్స్‌ కలెక్టివ్‌’ తెలిపింది. తమ జర్నలిస్టిక్‌ ప్రశ్నలను ఫిర్యాదులుగా పరిగణించి, ఈసీకి చెందిన అంతర్గత రికార్డులనే తమకు అందించాలని కోరింది.