కాంగ్రెస్‌ క్రీడలో పేదలే సమిధలు!

• నాడు గూడు కల్పించింది కాంగ్రెస్సే
• నేడు కూల్చుతున్నది కూడా కాంగ్రెస్సే
• అది ప్రభుత్వ భూమేనని తేల్చిన విచారణలు
• స్వాధీనం చేసుకోవాలని హైకోర్టు ఆదేశాలు
• చర్యలు తీసుకోని నాటి అధికారులు
• నివేదికలు లేవంటున్న రెవెన్యూ విభాగం
• ‘నమస్తే తెలంగాణ’ చేతికి నాటి నివేదికలు

వరంగల్‌, నవంబర్‌ 10 (నమస్తే తెలంగాణ ప్రతినిధి): ‘దేశ చరిత్రలో పేదలకు ఇండ్ల స్థలాలు ఇచ్చింది, ఇండ్లు, కాలనీలు కట్టించి వారి సొంతింటి కలను నెరవేర్చింది మేమే’.. పొద్దున లేస్తే కాంగ్రెస్‌ నేతలు పాడే పాట ఇది! ఊరవతల కాలనీలను సాక్ష్యంగా చూపుతూ దశాబ్దాలుగా ఓట్ల పంట పండించుకున్నారు. కానీ వారి అసలు రంగేమిటో తెలంగాణలో కాంగ్రెస్‌ ప్రభుత్వం రుజువు చేస్తున్నది. దళిత, గిరిజనులు, బహుజన పేదలను ఆదుకొని, సాదుకోవాల్సిన సర్కారే నిలువ నీడలేకుండా చేస్తున్నది. పొద్దున లేస్తే ఇందిరమ్మ రాజ్యం అని, వైఎస్‌ ఆదర్శాలు అంటూ వల్లెవేసే ప్రభుత్వం.. వరంగల్‌లో తమ నేత పేరుతో వెలసిన కాలనీని నేలమట్టం చేస్తున్నది.

వైఎస్సార్‌నగర్‌లోని పేదల ఇండ్లను సమాధి చేస్తున్నది. ఒకప్పుడు ఆ భూమి ప్రభుత్వానిదే అంటూ కాంగ్రెస్‌ నేతలు కొట్లాడగా.. ఇప్పుడు అదే కాంగ్రెస్‌ నేతలు ఆ భూమిని ప్రైవేట్‌ పరం చేసేందుకు ఉవ్విళ్లూరుతుండటం శోచనీయం. దశాబ్దాలుగా ప్రభుత్వ భూములుగా ఉండి ఇప్పుడు రాత్రికిరాత్రే ప్రైవేట్‌ పాలవుతున్నాయి. 1976 నుంచి 2002 దాకా అర్బన్‌ ల్యాండ్‌ సీలింగ్‌ యాక్ట్‌ నిబంధనల ప్రకారం ప్రభుత్వ భూమిగా అప్పిలేట్‌ సంస్థలు, అర్బన్‌ ల్యాండ్‌ సీలింగ్‌, సీసీఎల్‌ఏ, హైకోర్టు ఇలా అనేకానేక వేదికలు, సర్వోన్నత సంస్థలు తేల్చిన సత్యం ఇప్పుడు అసత్యమైంది. రూ.వేలకోట్ల భూమి పేదలకు ఎందుకు చెందాలి? అని రేవంత్‌సర్కార్‌ భావించిందా? లేదా మరేదైనా కారణం ఉన్నదా? అని ప్రస్తుతం ఉమ్మడి వరంగల్‌ జిల్లాలో తీవ్ర చర్చ జరుగుతున్నది.

మరోవైపు రెవెన్యూ, పోలీసు అధికారులు మాత్రం తమ వద్ద ఎలాంటి రికార్డులు లేవని, సదరు స్థలం ప్రభుత్వ భూమి కాదని, అది ప్రైవేట్‌ పట్టాభూమి అని పేర్కొంటున్నారు. అర్బన్‌ ల్యాండ్‌ సీలింగ్‌ యాక్ట్‌ ప్రస్తుతం అమల్లో లేదని, ఆ కారణంగా సదరు స్థలం తమదేనని పూర్వవారసులు ఆ స్థలంపై హక్కులు పొంది ఉంటారేమోనని అనుమానాలు వ్యక్తం చేస్తున్నారు. వైఎస్‌ఆర్‌నగర్‌ కూల్చివేతల నేపథ్యంలో ‘నమస్తే తెలంగాణ’ లోతుగా పరిశోధించి, ఉమ్మడి ఆంధ్రప్రదేశ్‌లో నాటి వరంగల్‌ జిల్లా కలెక్టర్‌, నాటి జాయింట్‌ కలెక్టర్‌ ద్వారా ఏసీబీ డైరెక్టర్‌ జనరల్‌ ఆయా సందర్భాల్లో చేసిన విచారణల నివేదికలను సంపాదించింది. వాటిని పరిశీలిస్తే.. కాజీపేట చౌరస్తాలో ప్రస్తుతం రూ.వేల కోట్లు విలువ చేసే భూ చరిత్ర మొత్తం అవగతమవుతుంది.

బస్వరాజు ఫిర్యాదు.. వైఎస్‌ విచారణ
2005లో అప్పటి వరంగల్‌ ఎమ్మెల్యే (ప్రస్తుత ఎమ్మెల్సీ) బస్వరాజు సారయ్య అసెంబ్లీలో మాట్లాడుతూ కాజీపేటలో ప్రభుత్వ భూములను కబ్జా చేస్తున్నారని, వారికి వరంగల్‌ అర్బన్‌ ల్యాండ్‌ సీలింగ్‌ సిబ్బంది సహకరిస్తున్నారని ఆరోపించారు. వైఎస్‌ రాజశేఖర్‌రెడ్డి నాయకత్వంలోని కాంగ్రెస్‌ ప్రభుత్వం దీనిపై సమగ్ర విచారణ జరపాలని ఏసీబీ డైరెక్టర్‌ జనరల్‌ను 2005 జనవరి 8న ఆదేశించింది. దీంతో నాటి కలెక్టర్‌, జాయింట్‌ కలెక్టర్‌ విచారణ జరిపారు. వరంగల్‌ అర్బన్‌ ల్యాండ్‌ సీలింగ్‌, వరంగల్‌ మున్సిపల్‌ కార్పొరేషన్‌ రికార్డును, ఆ రికార్డుకు నేపథ్యమైన ఆధారాలను పరిశీలించారు. రికార్డులు, క్షేత్రస్థాయి విచారణ, పరిశోధనల అనంతరం ప్రభుత్వానికి కాజీపేట భూ వ్యవహారంపై ఏసీబీ నివేదిక సమర్పించింది. ఆ నివేదికలో పేర్కొన్న అంశాలు ఇలా ఉన్నాయి.

1) వరంగల్‌ జిల్లా కాజీపేటకు చెందిన శాపూర్జీ ఇరానీ కుమారుడు కైకుస్రూ 1976 ఆగస్టు 24న దాఖలు చేసిన డిక్లరేషన్‌లో తనకు కడిపికొండ శివారు పరిధిలోని సర్వేనంబర్లు 64, 70, 71, 72,73లో మొత్తం 25.18 ఎకరాల భూమి ఉన్నదని (సీసీ ఫైల్‌ నంబర్‌ ఏ3/1139/76లో), అది సీలింగ్‌ యాక్ట్‌కు లోబడే ఉన్నదని పేర్కొన్నారు. ఈ డిక్లరేషన్‌పై అర్బన్‌ ల్యాండ్‌ సీలింగ్‌ అధికారి క్షేత్రస్థాయిలో పరిశీలించి ఒక ముసాయిదా ప్రకటన విడుదల చేశారు. కైకుస్రూ పేర్కొన్న మొత్తం 25.18 ఎకరాల భూమిలో 12.37 ఎకరాలు మిగులు భూమి అని తేల్చారు.

2) ఈ ముసాయిదాను కైకుస్రూ సవాల్‌ చేశారు. కమిషనర్‌, ల్యాండ్‌ రిఫార్మ్స్‌అండ్‌ అర్బన్‌ ల్యాండ్‌ సీలింగ్‌ కమిషనర్‌ వద్దకు అప్పీల్‌కు వెళ్లారు. ఇరుపక్షాల వాదనల అనంతరం 1986 ఆగస్టు 28న కైకుస్రూ అప్పీల్‌ను అప్పిలేట్‌ కమిషనర్‌ కొట్టివేశారు.

3) దీంతో కైకుస్రూతోపాటు 13 మంది వారసులు హైకోర్టును ఆశ్రయించారు. అప్పిలేట్‌ అధికారి జారీ చేసిన ఉత్తర్వులను రద్దు చేసిన హైకోర్టు ఈ కేసుపై తిరిగి సమగ్ర విచారణ చేయాలని ఆదేశించింది.

4) హైకోర్టు ఆదేశాలతో వరంగల్‌ అర్బన్‌ ల్యాండ్‌ సీలింగ్‌ అప్పిలేట్‌ అధికారి మరోసారి క్షేత్రస్థాయిలో విచారణ చేశారు. 12.37 ఎకరాలను మిగులు భూమిగానే నిర్ధారించారు. ఈ మేరకు 1990 డిసెంబర్‌లో ఉత్వర్వులు జారీ చేశారు. పిటిషనర్ల విజ్ఞప్తి మేరకు అప్పిలేట్‌ అధికారి మరోసారి క్షుణ్నంగా పరిశీలించి మరో ముసాయిదాను విడుదల చేసింది. అప్పటి పట్టణ భూ గరిష్ఠ పరిమితి చట్టం ప్రకారం అది మిగులు భూమేనని స్పష్టం చేసింది. కానీ సదరు వారసులు, మళ్లీ హైకోర్టును ఆశ్రయించారు. దీంతో హైకోర్టు అప్పటిదాకా ప్రత్యేక అధికారి, అప్పిలేట్‌ అథారిటీ జారీ చేసిన రెండు ఉత్తర్వులను రద్దు చేసి, కేసును తిరిగి పరిశీలించాలని 1994 ఏప్రిల్‌ 4న ఆదేశించింది.

5) కోర్టు ఆదేశాలకు అనుగుణంగా ప్రభుత్వం తిరిగి స్పెషల్‌ ఆఫీసర్‌ను నియమించింది. వరంగల్‌ అర్బన్‌ ల్యాండ్‌ సీలింగ్‌ స్పెషల్‌ ఆఫీసర్‌ విచారణ జరిపి, మరోసారి అది మిగులు భూమేనని తేలుస్తూ 1995 జనవరి 16న ఉత్తర్వులు జారీ చేశారు. ఈసారి ఆంధ్రప్రదేశ్‌ ప్రభుత్వం గెజిట్‌ విడుదల చేసింది. దరఖాస్తుదారులు హైకోర్టులో రిట్‌ పిటిషన్‌ దాఖలు చేశారు. హై కోర్టు 1995 ఫిబ్రవరి 2న అప్పీలును కొట్టివేసి, ‘మిగులు భూమిని స్వాధీనం చేసుకోండి’ అని ప్రభుత్వాన్ని ఆదేశించింది. ‘తమ ఆధీనంలో ఉన్న భూమిలో నుంచి మిగులు భూమిని భూ యజమానులు ఏ భాగం నుంచైనా సరే లెక్క ప్రకారం తేలిన మిగులు భూమి దాదాపు 14.37ఎకరాలను అప్పగించాలని పేర్కొన్నది. ఆ అప్పగించిన భూమికి చట్ట ప్రకారం అవసరమైన సరిహద్దులు తేల్చాలని స్పష్టంచేసింది. హైకోర్టు తీర్పును అనుసరించి సదరు మిగులు భూమిని స్వాధీనం చేసుకోవాలని 1995 ఏప్రిల్‌ 22న సీసీఎల్‌ఏ ఉత్తర్వులు జారీ చేసింది.

పట్టించుకోని ల్యాండ్‌ సీలింగ్‌ అధికారులు
హైకోర్టు ఉత్తర్వులకు అనుగుణంగా మిగులు భూమిని స్వాధీనం చేసుకోవాల్సి ఉండగా వరంగల్‌ అర్బన్‌ ల్యాండ్‌ సీలింగ్‌ అధికారులు బేఖాతరు చేశారు. హైకోర్టు ఆదేశాలు, సీసీఎల్‌ఏ ఉత్తర్వులు వెలువడి న్లైనా ఎలాంటి చర్యలు తీసుకోకపోవడంతో కథ మళ్లీ మొదటికి వచ్చింది. సదరు వ్యక్తులు కోర్టులో వ్యాజ్యం వేసేదాకా అధికారులు ప్రేక్షకపాత్ర పోషించారు. ఇదే అదనుగా వారసుల్లో ఒకరైన బానూ రషీద్‌ దస్తూర్‌ మరికొందరు హైకోర్టులో రిట్‌పిటిషన్‌ (నంబర్‌ 9761/95), మరో రిట్‌ పిటిషన్‌ మిస్‌లీనియస్‌ పిటిషన్‌ (నంబర్‌ 12090/95)ను 1995 మే 19న దాఖలు చేశారు. దీంతో కోర్టు స్టే ఇచ్చింది.

నకిలీ పత్రాలతో అనుమతులు
ఈ వ్యవహారం కోర్టులో విచారణ కొనసాగుతున్న సమయంలోనే ఫర్హాద్‌ గెవ్‌ ఇరానీ అనే వ్యక్తి 2002 మార్చి 11న వరంగల్‌ అర్బన్‌ ల్యాండ్‌ సీలింగ్‌ (యూఎల్‌సీ) కార్యాలయ అధికారికి దరఖాస్తు సమర్పించారు. తమ సొంత భూమిలో ఇల్లు కట్టుకొనేందుకు వరంగల్‌ మున్సిపల్‌ కార్పొరేషన్‌కు అవసరమైన ధ్రువీకరణ పత్రాలు జారీ చేయాలని కోరారు. నిజానికి కోర్టులో విచారణలో ఉన్నప్పుడు అర్బన్‌ ల్యాండ్‌ సీలింగ్‌ యాక్ట్‌ పరిధిలో అధికారులు ఎలాంటి అనుమతి పత్రాలు జారీ చేయకూడదు. కానీ, అర్బన్‌ ల్యాండ్‌ సీలింగ్‌ సూపరింటెండెంట్‌ సంతకంతో 2002 మార్చి 22న (నంబర్‌ ఏ3/1139/76 ద్వారా) పిటిషనర్‌కు మెమో జారీ చేశారు.

ఈ మెమో నకిలీదని, దీనికి ఎలాంటి అధికారిక ఆమోదం లేదని అధికారుల విచారణలో తేలింది. అయితే, యూఎల్‌సీ కార్యాలయం జారీ చేసిన నకిలీ మెమో ఆధారంగా పిటిషనర్‌ తన అసోసియేట్‌ సంస్థ ద్వారా భవన నిర్మాణం కోసం వరంగల్‌ మున్సిపల్‌ కార్పొరేషన్‌కు దరఖాస్తు చేశారు. దీనిపై వరంగల్‌ మున్సిపల్‌ కార్పొరేషన్‌ నుంచి బీఏ నంబర్‌ 17/2002-03, ఆర్వోసీ నంబర్‌ సీ4/4540/2002 (తేదీ: 6.4.2002) ద్వారా తాతాలిక అనుమతి లభించింది. తాత్కాలికంగా పొందిన అనుమతి మంజూరులో అనేక అక్రమాలు జరిగినట్టు ఏసీబీ డైరెక్టర్‌ జనరల్‌కు వరంగల్‌ జిల్లా జాయింట్‌ కలెక్టర్‌ సమర్పించిన నివేదికలో స్పష్టం చేయడం విశేషం.