సీఆర్‌ఎంపీ ప్రణాళిక ఏదీ?

• కొత్త ఎస్‌ఎస్‌ఆర్‌ రేట్లతో మారిన ప్రతిపాదనలు
• ప్రభుత్వ అనుమతితో టెండర్ల దశ వచ్చినా.. వెనక్కి వెళ్లిన వైనం
• సమన్వయ లోపంతో లోపించిన ముందస్తు ప్రణాళికలు
• మూడేండ్లుగా కాగితాలకే పరిమితమైన ప్రాజెక్టు పనులు

సిటీబ్యూరో, నవంబర్‌11 (నమస్తే తెలంగాణ) :ట్రై కార్పొరేషన్‌ (జీహెచ్‌ఎంసీ, సీఎంసీ, ఎంఎంసీ) పరిధిలో సురక్షితమైన, అద్దంలాంటి రహదారులను అందిస్తామంటూ గొప్పలు చెప్పిన కాంగ్రెస్‌ సర్కార్‌…సీఆర్‌ఎంపీ ప్రాజెక్టు కథను మళ్లీ మొదటికి తీసుకువచ్చింది. మూడేండ్లుగా కాగితాల్లోనే నలుగుతున్న ప్రణాళికలు, క్షేత్రస్థాయికి చేరకుండానే అధికారుల సమన్వయ లోపంతో మళ్లీ ప్రభుత్వ కోర్టులోకి చేరడంపై తీవ్ర విమర్శలు వ్యక్తమవుతున్నాయి. వాస్తవంగా ట్రై కార్పొరేషన్లు (జీహెచ్‌ఎంసీ, ఎంఎంసీ, సీఎంసీ) పరిధిలోని రహదారుల నిర్వహణ, పునరుద్ధరణకు సర్కార్‌ గడిచిన నాలుగు నెలల కిందట నిర్ణయం తీసుకున్నది.

సమగ్ర రహదారుల నిర్వహణ కార్యక్రమం (సీఆర్‌ఎంపీ) ఫేజ్‌-2 కింద రూ. 3145 కోట్ల వ్యయంతో చేపట్టే పనులకు పరిపాలనా అనుమతులు మంజూరు చేస్తూ పురపాలక శాఖ ప్రత్యేక ప్రధాన కార్యదర్శి జయేశ్‌ రంజన్‌ జీవో నం 591ను జారీ చేశారు. ట్రై కార్పొరేషన్లకు సంబంధించి ఉమ్మడిగా టెండర్లు పిలిచేందుకు జీహెచ్‌ఎంసీ కమిషనర్‌కు ప్రభుత్వం అనుమతి ఇచ్చింది. జీహెచ్‌ఎంసీ పరిధిలోరూ. 1533, ఎంఎంసీ రూ.818, సీఎంసీ రూ.794 కోట్లుగా కేటాయించారు.

అయితే టెండర్‌ దశ రాగానే తెరపైకి మళ్లీ సాధారణ రేట్ల షెడ్యూల్‌ (కామన్‌ షెడ్యూల్‌ ఆఫ్‌ రేట్స్‌) పేరిట మళ్లీ ప్రతిపాదనలతో జీహెచ్‌ఎంసీ సర్కార్‌ అనుమతికి చేర్చింది..పాత ప్రతిపాదనలకు, నూతన ఎస్‌ఎస్‌ఆర్‌ రేట్లకు మధ్య భారీ తేడాలు రావడంతో అంచనాల వ్యయం మారి ప్రతిపాదనలు మళ్లీ మొదటికి రావడం….ఆఖరి నిమిషంలో మళ్లీ నిర్ణయాలు వెనకి వెళ్లడంలో అధికారుల అలసత్వానికి నిదర్శనంగా నిలుస్తోంది.

పౌరుల ఆగ్రహం!

బీఆర్‌ఎస్‌ హయాంలో ఆదర్శంగా నిలిచిన కాంప్రహెన్సివ్‌ రోడ్‌ మెయింటనెన్స్‌ ప్రోగ్రామ్‌(సీఆర్‌ఎంపీ) పథకాన్ని కాంగ్రెస్‌ ప్రభుత్వం నీరుగార్చింది. రోడ్ల నిర్వహణలో ఢిల్లీ, ఛత్తీస్‌గఢ్‌, రాజస్థాన్‌ తదితర రాష్ర్టాలకు ఆదర్శంగా నిలిచిన ఈ పథకాన్ని పూర్తిగా నిర్వీర్యం దిశగా మార్చేసింది. గడిచిన రెండున్నర సంవత్సరాలుగా సీఆర్‌ఎంపీ రోడ్ల నిర్వహణలో గాలికి వదిలేసిన కారణంగా చాలా ప్రాంతాల్లో గుంతలమయం, ఎగుడు దిగుళ్ల నడుమ ప్రయాణం నరకప్రాయంగా మారుతోంది..అంతేకాదు రోడ్ల మధ్య డివైడర్లు, రోడ్ల పక్కా ఫుట్‌పాత్‌లు, రోడ్డుకిరువైపులా పచ్చదనం పెంపు తదితర పనులతో పాటు పారిశుధ్య నిర్వహణలో లోపాలు స్పష్టంగా కనిపిస్తున్నాయి.

ఈ ఏడాది కురిసిన ఆడపదడపా వర్షాలకు కాలనీ, బస్తీ రోడ్లే కాదు ప్రధాన రహదారులైన సీఆర్‌ఎంపీ రోడ్ల మీదకి వెళ్లాలంటేనే వాహనదారులు వణికిపోతున్నారు. ఎకడ ఏ గోతిలో పడి ప్రమాదానికి గురవుతామోనన్న ఆందోళన నిత్యం వెంటాడుతోంది. సీఆర్‌ఎంపీ కింద నగరంలోని ప్రధాన రహదారుల నిర్వహణను మెరుగుపరుస్తామని ప్రకటించిన గొప్పలు.. క్షేత్రస్థాయికి వచ్చేసరికి పూర్తిగా నీరుగారిపోయాయి. ఈ నేపథ్యంలోనే గడిచిన మూడేళ్లుగా సీఆర్‌ ఎంపీ ప్రాజెక్టు సచివాలయం, జీహెచ్‌ ఎంసీ కార్యాలయాల మధ్య ఫైళ్ల రూపంలో చకర్లు కొడుతుందే తప్ప, రహదారులపై మాత్రం మార్పు కంటికి కనిపించడం లేదని నగరవాసులు మండిపడుతున్నారు.