రోడ్డు ప్రమాదంలో కుమ్రం భీం మనుమడు మృతి

• కుమ్రం భీం ఆసిఫాబాద్‌ జిల్లా పెద్దదోభ గ్రామంలో విషాదం

సిర్పూర్‌(యూ), నవంబర్‌ 11 : ఆదివాసీ పోరాటయోధుడు కుమ్రం భీం రెండో మనుమడు కుమ్రం భీంరావు (55) రోడ్డు ప్రమాదంలో మృతి చెందాడు. భీంరావు కుటుంబసభ్యులు తెలిపిన వివరాల ప్రకారం. భీంరావు ఈ నెల 7న కుమ్రం భీం ఆసిఫాబాద్‌ జిల్లాలోని జైనూర్‌ మండల కేంద్రం నుంచి తన స్వగ్రామం పెద్దదోభకు ఆటోలో వెళ్తుండగా బొలేరో వాహనం ఢీకొన్నది.

ఈ ఘటనలో తీవ్రంగా గాయపడిన భీంరావును కుటుంబసభ్యులు ఆదిలాబాద్‌ జిల్లా కేంద్రంలోని రిమ్స్‌ దవాఖానకు తరలించారు. మూడు రోజుల పాటు చికిత్స పొందుతూ మంగళవారం రాత్రి మృతి చెందాడు. మృతుడికి భార్య అనసూయబాయి, కుమారుడు, ముగ్గురు కూతుర్లున్నారు. కుమ్రం భీం కుమారుడైన కుమ్రం మాధవరావు, బాగుబాయి దంపతులకు కుమ్రం సోనేరావు, కుమ్రం భీంరావు, కుమ్రం హన్మంతురావు ముగ్గురు కొడుకులు.

కుమ్రం భీం మరణం తర్వాత వీరందరూ కుమ్రం భీం ఆసిఫాబాద్‌ జిల్లా సిర్పూర్‌ (యూ) మండలం పెద్దదోభలో స్థిరపడ్డారు. చిన్నవాడైన హన్మంత్‌రావు గతంలో అనారోగ్యంతో మృతి చెందగా, భీంరావు రోడ్డు ప్రమాదంలో మరణించాడు. దీంతో పెద్దదోభ గ్రామంలో విషాదం నెలకొన్నది. తెలంగాణ ఉద్యమ సమయంలో వీరి కుటుంబాన్ని గుర్తించిన తెలంగాణ తొలి సీఎం కేసీఆర్‌ వీరి తాత పేరిట కుమ్రం భీం ఆసిఫాబాద్‌ జిల్లాను ఏర్పాటు చేయడమే కాకుండా వీరి కుటుంబానికి ప్రత్యేక గుర్తింపునిచ్చారు.