శ్రీకాంత్‌, లక్ష్య ముందంజ

కుమమొటొ: జపాన్‌ ఓపెన్‌ బ్యాడ్మింటన్‌ టోర్నీలో భారత షట్లర్లు కిదాంబి శ్రీకాంత్‌, లక్ష్యసేన్‌ ప్రిక్వార్టర్స్‌ చేరారు. బుధవారం నువ్వానేనా అన్నట్టుగా సాగిన పురుషుల సింగిల్స్‌ తొలి రౌండ్‌లో శ్రీకాంత్‌.. 18-21, 21-16, 24-22తో రస్మస్‌ గెమ్కె (డెన్మార్క్‌)పై గెలిచాడు. గంటా 8 నిమిషాల పాటు సాగిన పోరులో తొలి గేమ్‌ ఓడినప్పటికీ తర్వాత పుంజుకున్న శ్రీకాంత్‌.. ఉత్కంఠగా జరిగిన నిర్ణయాత్మక మూడో గేమ్‌లో ప్రత్యర్థి ఆధిక్యంలోకి వచ్చినా సంయమనంతో ఆడి గేమ్‌తో పాటు మ్యాచ్‌నూ సొంతం చేసుకున్నాడు.

మరో పోరులో లక్ష్య.. 21-19, 21-18తో చి యు జెన్‌ (చైనీస్‌ తైపీ)ను వరుస గేమ్స్‌లో ఓడించి టోర్నీలో ముందంజ వేశాడు. తొలి గేమ్‌లో 4-7తో వెనుకబడ్డ లక్ష్య.. బ్రేక్‌ సమయానికి 11-10తో ఆధిక్యంలోకి వచ్చాడు. 18-18తో స్కోర్లు సమమయ్యాక జూలు విదిల్చిన అతడు.. క్రాస్‌ కోర్టు స్మాష్‌లతో గేమ్‌ పాయింట్‌ సాధించాడు. రెండో గేమ్‌ సైతం హోరాహోరీగానే జరిగినా స్కోరు 19-17 వద్ద ఉండగా రెండు మ్యాచ్‌ పాయింట్లతో అతడు ఆటను ముగించాడు.