‘ప్రతి 750 మంది ఓటర్లకు పోలింగ్ బూత్ ఏర్పాటు చేయాలి’

– బూర్గంపహాడ్ తాసీల్దార్‌కు బీఆర్ఎస్ నేతల వినతి

బూర్గంపహాడ్, నవంబర్ 10 : పట్టభద్రుల ఎమ్మెల్సీ ఎన్నికల్లో ఓటర్లు ఎదుర్కొంటున్న దీర్ఘకాలిక నిరీక్షణ సమస్యకు పరిష్కారం చూపాలని ప్రతి 750 మంది ఓటర్లకు ఒక పోలింగ్ బూత్‌ను ఏర్పాటు చేయాలని బీఆర్ఎస్ మండల వర్కింగ్ ప్రెసిడెంట్ జలగం జగదీష్ అన్నారు. ఈ మేరకు తాసీల్దార్ కేఆర్ కే ప్రసాద్‌కు నాయకులతో కలిసి మంగళవారం వినతిపత్రం అందజేశారు. ఈ సందర్భంగా ఆయన మాట్లాడుతూ బూర్గంపహాడ్ మండలంలో ఓటరు నమోదు ప్రక్రియలో పట్టభద్రులు సుమారు 3 వేల మంది ఓటర్లుగా నమోదు చేసుకున్నట్లు తెలిపారు. గత పట్టభద్రుల ఎమ్మెల్సీ ఎన్నికల్లో మండలంలో 2,079 మంది ఓటర్లకు కేవలం రెండు పోలింగ్ కేంద్రాలు మాత్రమే ఏర్పాటు చేయడంతో ఓటర్లు తీవ్ర ఇబ్బందులు ఎదుర్కొన్నారని, మూడు నుండి నాలుగు గంటలు క్యూలైన్లలో నిల్చునే పరిస్థితి రావడంతో ఉద్యోగులు, ప్రయివేటు సంస్థల్లో పనిచేసే వారు ఇతర వృత్తుల్లో ఉన్న పట్టభద్రులు ఓటుహక్కును వినియోగించుకోలేక వెనుదిరిగిన సందర్భాలను ఆయన గుర్తుచేశారు.

ప్రసుత్త ఎమ్మెల్సీ ఎన్నికలను దృష్టిలో పెట్టుకుని ఓటర్ల పెరిగిన క్రమంలో మరో రెండు పోలింగ్ కేంద్రాలను ఏర్పాటు చేసి గత సమస్యలు తలెత్తకుండా చూడాలని ఆ వినతిలో కోరారు. ఈ సమస్యపై ముందుగానే ఎన్నికల అధికారులు స్పందించి పోలింగ్ కేంద్రాలు పెంచేలా నిర్ణయం తీసుకోవాలని, ఓటుహక్కు కల్పించడం ఎంత ప్రధానమో… ఆ హక్కును ఎలాంటి ఇబ్బందులు లేకుండా వినియోగించుకునే అవకాశం కల్పించడం కూడా అంతే ముఖ్యమని ఆ వినతిలో పేర్కొన్నారు. ఈ కార్యక్రమంలో బీఆర్ఎస్ యూత్ నాయకులు సోము లక్ష్మిచైతన్యరెడ్డి, మైనార్టీ నాయకులు గుల్మహ్మద్, నాయకులు చట్టు ఆంజనేయులు పాల్గొన్నారు.