ఎదురెదురుగా బైకులు ఢీ.. ముగ్గురికి గాయాలు

కారేపల్లి, నవంబర్ 10 : కారేపల్లి క్రాస్ రోడ్డు వద్ద మంగళవారం ఉదయం ఎదురెదురుగా వస్తున్న రెండు ద్విచక్ర వాహనాలు ఢీకొన్న ప్రమాదంలో ముగ్గురికి గాయాలయ్యాయి. స్థానికుల కథనం ప్రకారం గాదెపాడు గ్రామానికి చెందిన మొక్కపాటి రాంప్రసాద్ ఖమ్మం నుండి వస్తుండగా, గిద్దవారిగూడెంకు చెందిన మైనర్లు కన్నెబోయిన గణేష్, గోసి విజయ్ మరో ద్విచక్ర వాహనంపై ఖమ్మం వైపు వెళ్తూ ఎదురుగా వస్తున్న వాహనాన్ని ఢీకొట్టారు. ఈ ప్రమాదంలో రాంప్రసాద్‌కు తీవ్ర గాయాలు కాగా, ఇద్దరు మైనర్లకు స్వల్ప గాయాలయ్యాయి. క్షతగాత్రులను ఆస్ప‌త్రికి తరలించారు. ప్రమాద ధాటికి రెండు వాహనాల ముందు భాగాలు పూర్తిగా ధ్వంసమయ్యాయి. మైనర్లు లైసెన్స్ లేకుండా వాహనం నడుపుతూ ప్రమాదానికి కారణమయ్యారంటూ స్థానికులు ఆగ్రహం వ్యక్తం చేశారు. మైనర్లకు వాహనాలు ఇవ్వడంపై కూడా పలువురు ఆందోళన వ్యక్తం చేశారు.