‘విశ్రాంత ఉద్యోగుల సమస్యలపై రాజీలేని పోరాటం’

– సంఘం రాష్ట్ర అధ్యక్షుడు వెంకట్ రెడ్డి

కోదాడ‌, న‌వంబ‌ర్ 10 : విశ్రాంత ఉద్యోగుల సమస్యలపై రాష్ట్ర నాయకత్వం రాజీలేని పోరాటం చేస్తుందని ఆ సంఘం రాష్ట్ర అధ్యక్షుడు పి.వెంకట్ రెడ్డి అన్నారు. మంగళవారం కోదాడ పట్టణంలోని సంఘ భవనంలో నిర్వహించిన విశ్రాంత ఉద్యోగుల సంఘం సూర్యాపేట‌ జిల్లా కార్యవర్గ సమావేశానికి ఆయన ముఖ్య అతిథిగా హాజరై మాట్లాడారు. నగదు రహిత వైద్య సేవలపై ఎవరు కూడా అపోహలు పెట్టుకోవద్దని పూర్తిస్థాయిలో అందరికీ వైద్య సేవలు అందించేలా ప్రభుత్వం దృష్టికి తీసుకువెళ్లి చర్యలు తీసుకుంటున్నట్లు తెలిపారు. రాష్ట్ర వ్యాప్తంగా అన్ని జిల్లాల్లో తమ సంఘం రెండున్నర లక్షల సభ్యత్వం కలిగి ఉందన్నారు. పి ఆర్ సి, రిటైర్‌మెంట్ ప్రయోజనాలు వెంటనే అమలు చేస్తే జరగనున్న ఎమ్మెల్సీ ఎన్నికల్లో ప్రభుత్వానికి సహకరిస్తామన్నారు.

రాష్ట్ర అసోసియేట్ అధ్యక్షుడు రావెళ్ల సీతారామయ్య మాట్లాడుతూ.. సంఘ సభ్యులందరూ ఐక్యంగా ఉంటేనే సమస్యలను పరిష్కరించుకోగలమన్నారు. అన్ని జిల్లాల అధ్యక్ష, కార్యదర్శులు సంఘ సమస్యలపై నిర్వహించే ఐక్య ఉద్యమాలకు తరలిరావాలని పిలుపునిచ్చారు. విశ్రాంత ఉద్యోగుల మేధోశక్తి ఈ రాష్ట్ర అభివృద్ధికి ఎంతో కీలకమన్నారు. ఈ కార్యక్రమంలో కోదాడ అసోసియేషన్ అధ్యక్షుడు వేనేపల్లి శ్రీనివాసరావు, జిల్లా ఇన్‌చార్జి అధ్యక్షుడు కే.రవీందర్ రెడ్డి, రాష్ట్ర గౌరవ అధ్యక్షుడు దామోదర్ రెడ్డి, రాష్ట్ర ప్రధాన కార్యదర్శి ఉస్మాన్ పాషా, ప్రసాదరావు, శ్రీనివాసరెడ్డి, విద్యాసాగర్, పొట్ట జగన్మోహన్, రఘువర ప్రసాద్, అన్ని మండలాల అధ్యక్ష, కార్యదర్శులు పాల్గొన్నారు.