‘ధాన్యం కొనుగోలు కేంద్రాలను వెంట‌నే ప్రారంభించాలి’

తుంగ‌తుర్తి, న‌వంబ‌ర్ 10 : తెలంగాణ రాష్ట్ర ప్రభుత్వం వెంటనే ధాన్యం కొనుగోలు కేంద్రాలను ప్రారంభించాలని బీఆర్ఎస్ తుంగ‌తుర్తి మండల అధ్యక్షుడు తాటికొండ సీతయ్య డిమాండ్ చేశారు. మంగళవారం తుంగతుర్తి మండల కేంద్రంలోని పార్టీ కార్యాలయంలో ఆయ‌న మాట్లాడుతూ.. రైతులు ఆరుగాలం కష్టించి పండించిన పంటను కల్లాల వద్ద పోసి ఎదురుచూస్తూ పడిగాపులు కాస్తున్నారని ఆవేదన వ్యక్తం చేశారు. ఎల్‌నినో ప్రభావంతో యాసంగిలో వరి వేయవద్దని ప్రభుత్వం చెబుతోంది. దానికి ప్రత్యామ్నాయ ఏర్పాట్లు చేసి రైతులను ఆదుకోవాలని కోరారు. ఎన్నిగంటలు కరెంటు సప్లై ఇస్తారో స్పష్టంగా చెప్పాలి, రైతు కనీసం తన కుటుంబ అవసరాల నిమిత్తం కోస‌మైన తిండిగింజలు పండించాలి కాబట్టి వ్యవసాయ అధికారులు స్పష్టంగా ప్రకటించాలన్నారు. లేనియెడల ఇప్పటికే ఇబ్బందుల్లో ఉన్న రైతాంగం, మరింత అప్పుల్లో కూరుకుపోయే ప్రమాదం ఉందని ఆవేదన వ్యక్తం చేశారు. ప్రభుత్వం రైతంగా అనుకూల వ్యవసాయ విధానాన్ని ప్రాంతాల వారీగా ప్రకటించాల‌ని కోరారు. ఈ కార్యక్రమంలో పార్టీ జిల్లా నాయకుడు గుండగాని రాములుగౌడ్, మండల నాయకులు తునికి సాయిలు గౌడ్, మట్టిపెల్లి వెంకట్ పాల్గొన్నారు.