13 నుండి ఎంజీయూలో సౌత్ ఇండియన్ హిస్టరీ కాంగ్రెస్ జాతీయ సదస్సు

– దేశ వ్యాప్తంగా హాజరుకానున్న 1,200 మందిపైగా ప్రతినిధులు, ప్రొఫెసర్స్, పరిశోధన విద్యార్థులు
– వర్సిటీలో ఆరు వేదికల్లో నిత్యం పలు అంశాలపై చర్చ సదస్సు పరిశోధన పత్రాల నిర్వహణ
– వివరాలు వెల్లడించిన ఎంజీయూ వీసీ ఖాజా అల్తాఫ్ హుస్సేన్

రామగిరి, అక్టోబర్ 10 : దక్షిణ భారత చరిత్ర, సామాజిక, ఆర్థిక, సాంస్కృతిక, రాజకీయ అంశాలపై లోతైన పరిశోధనలు, విశ్లేషణలకు 45వ సౌత్ ఇండియన్ హిస్టరీ కాంగ్రెస్ ఈ నెల 13 నుండి 15వరకు న‌ల్లగొండలోని మహాత్మాగాంధీ యూనివర్సిటీ నిర్వహిస్తున్నట్లు వ‌ర్సిటీ వీసీ ఖాజా అల్తాఫ్ హుస్సేన్ తెలిపారు. ఈ జాతీయ స్థాయి చారిత్రక సదస్సులో నిత్యం వివిధ అంశాలపై దేశంలోని పేరుగాంచిన యూనివర్సిటీల నుంచి వచ్చే ఫ్రొఫెసర్స్, ప్రతినిధులు పలు అంశాలపై ప్రసంగం, పరిశోధన పత్రాలు సమర్పణ చేయనున్న‌ట్లు వెల్ల‌డించారు.

దక్షిణ భారత చారిత్ర వైభవం వెలుగులోకి తెచ్చేలా

దక్షిణ భారత చారిత్రక వైభవాన్న వెలుగులోకి తీసుకురావడంతో పాటు నల్లగొండ జిల్లా పర్యాటక ప్రాధాన్యాన్ని విస్తృతంగా ప్రచారం చేసేందుకు సదస్సు అవకాశం కలుగుతుందని తెలిపారు. చరిత్రపై విద్యార్థులు, యూనివర్సిటీలు, డిగ్రీ కళాశాలల అధ్యాపకుల్లో పరిశోధనా ఆసక్తిని పెంపొందించడంతోపాటు ప్రభుత్వ విభాగాలకు కూడా ఈ సదస్సు విలువైన సమాచారం, విజ్ఞానాన్ని అందిస్తుందని పేర్కొన్నారు. దేశ వ్యాప్తంగా వివిధ యూనివర్సిటీల నుండి 1,200పై ప్రొఫెసర్స్, అధ్యాపకులు, పరిశోధన విద్యార్థులు హాజరవుతున్నారని, ఇప్పటికే వచ్చే వారికి అన్ని ఏర్పాట్లు పూర్తి చేసిన‌ట్లు చెప్పారు. సదస్సులో ముఖ్యంగా దక్షిణ భారత సామాజిక, ఆర్థిక, సాంస్కృతిక, రాజకీయ చరిత్రతోపాటు అణగారిన వర్గాల చరిత్ర, చరిత్ర రచనలో అనుసరిస్తున్న విధానాలు (హిస్టోరియోగ్రఫీ), డిజిటల్, ఆన్ లైన్ ప్రదర్శనలపై పరిశోధన పత్రాలను సమర్పించనున్నట్లు వివరించారు.

చారిత్రక అంశాలపై నూతన దృక్పథాలను ఆవిష్కరించేందుకు, పరిశోధకుల మధ్య విజ్ఞానాన్ని పంచుకునేందుకు ఈ సదస్సు దోహద పడుతుందన్నారు. ప్రతిష్టాత్మకమైన సౌత్ ఇండియన్ హిస్టరీ కాంగ్రెస్‌ను ఎంజీయూలో నిర్వహించడం యూనివర్సిటీతో పాటు నల్లగొండ జిల్లాకు గర్వకారణమని తెలిపారు. త్వరలోనే ఎంజీయూ హిస్టరీ అండ్ టూరిజయం మ్యూజియం సహితం సిద్ధమవుతుందని తెలిపారు. సదస్సు కన్వీనర్ ఎంజీయూ రిజిస్ట్రార్ కొప్పుల అంజిరెడ్డి, కో కన్వీనర్ గా వర్సిటీ హిస్టరీ అండ్ టూరిజం డిపార్ట్‌మెంట్ ప్రొ.విజయబాబు, లోకల్ కన్వీనర్‌గా డా.పనస రామకృష్ణ, ఆర్ట్స్ కళాశాల ప్రిన్సిపాల్ డా.అరుణ ప్రియ. డిపార్టుమెంట్ అధ్యాపకులు డాక్టర్ షరీఫ్, వివేక్, శ్రీనువాస్ వ్యహరించ‌నున్న‌ట్లు పేర్కొన్నారు.