‘రైతు పోరాటాలకు కార్మిక వర్గం సంపూర్ణ మద్దతు’

– సీఐటీయూ రాష్ట్ర ఉపాధ్యక్షుడు తుమ్మల వీరారెడ్డి

రామగిరి, నవంబర్ 10 : నల్లగొండలో ఈ నెల 15 నుండి 18 వరకు నిర్వహించనున్న అఖిల భారత కిసాన్ సభ 36వ జాతీయ మహాసభలను, బహిరంగ సభను కార్మిక వర్గం పాల్గొని జయప్రదం చేయాలని సీఐటీయూ రాష్ట్ర ఉపాధ్యక్షుడు తుమ్మల వీరారెడ్డి, జిల్లా కార్యదర్శి ఎం.డి.సలీం పిలుపునిచ్చారు. మహాసభలకు సంఘీభావంగా నల్లగొండ పట్టణ ఎగుమతి దిగుమతి హమాలీ వర్కర్స్ యూనియన్ ఆధ్వర్యంలో పెద్ద గడియారం సెంటర్‌లో మానవహారం నిర్వహించారు. ఈ సందర్భంగా వారు మాట్లాడుతూ.. వీర తెలంగాణ సాయుధ రైతాంగ పోరాటంలో కీలక పాత్ర పోషించిన నల్లగొండలో జాతీయ రైతు మహా సభలు నిర్వహించడం అభినందనీయమన్నారు. రైతాంగ పోరాటాలకు కార్మిక వర్గం అండగా ఉంటుందని, కార్మిక–కర్షక ఐక్యతతో కేంద్ర ప్రభుత్వ విధానాలకు వ్యతిరేకంగా పోరాటాలు కొనసాగిస్తామని తెలిపారు. ఈ కార్యక్రమంలో ఆవాజ్ జిల్లా కార్యదర్శి సయ్యద్ హషం, లకపాక రాజు, దండెంపల్లి సత్తయ్య, అవుట రవీందర్, అద్దంకి నరసింహ, యూనియన్ అధ్యక్షుడు అవురేశు మారయ్య, కార్యదర్శి లక్ష్మీపతి పాల్గొన్నారు.