ట్యాంకర్‌ యజమానులకు టోకరా

• వెహికిల్‌ ట్రాకర్‌ పేరిట రూ. లక్షల్లో వసూలు
• వెస్ట్‌ సిటీలోని 300 ట్యాంకర్ల నుంచి ఏవీటీఎస్‌ చార్జీలు
• గడువు ముగిసినా..ఏడాదిగా ఐటీ సెల్‌ వసూళ్ల పర్వం
• ఆ విభాగం తీరుతో నష్టపోతున్న ట్యాంకర్‌ యజమానులు

సిటీబ్యూరో: జలమండలికి చెందిన ఐటీ విభాగం నిర్లక్ష్యాలు రోజుకొకటి బయటపడుతున్నాయి. ఐటీలో పనిచేస్తున్న సిబ్బంది తీరు వల్ల వినియోగదారులు తీవ్రంగా ఇబ్బందులు పడుతున్నారు. ఇప్పటికే గ్రీవెన్స్‌ సెల్‌ సరిగ్గా పనిచేయకపోవడంతో అవస్థలు పడుతున్నారు. అదేవిధంగా ఫిర్యాదులకు సంబంధించిన ఫొటోలు, వీడియోలు పంపిస్తే తక్షణమే స్పందిస్తామని వాట్సాప్‌ నంబర్‌ను అందుబాటులోకి తీసుకొచ్చారు. దానికి ఫిర్యాదుకు సంబంధించిన వివరాలు పంపిస్తే ఎలాంటి స్పందన ఉండటం లేదన్న విమర్శలు వస్తున్నాయి.

తాజాగా పానీ యాప్‌ సైతం అనేక సాంకేతిక సమస్యలు తలెత్తుతున్నాయని తెలుస్తున్నది. ఇక సిటీ ప్రజలకు నిరంతరం తాగునీటిని సరఫరా చేస్తున్న ట్యాంకర్‌ యజమానులను ఐటీ సెల్‌ మోసం చేస్తున్నది. ఏడాది నుంచి వెస్ట్‌ సిటీ పరిధిలోని వందలాది ట్యాంకర్ల నుంచి లక్షలాది రూపాయలు అనధికారికంగా వసూలు చేస్తున్నది.జలమండలి ఐటీ విభాగం నిర్లక్ష్యం వల్ల ప్రజల సమస్యలు ఏ రూపంలో చెప్పినా పరిష్కారానికి నోచుకోవడం లేదు. అదేవిధంగా ఐటీ విభాగం తీరు వల్ల ట్యాంకర్‌ యజమానులు వేలాది రూపాయలను నష్టపోతున్నారు. కేవలం జలమండలి నీటిని సరఫరా చేస్తూ జీవనం సాగిస్తున్న వందలాది మంది ట్యాంకర్‌ యజమానుల నుంచి ఆటోమేటిక్‌ వెహికిల్‌ ట్రాకింగ్‌ సిస్టం పేరిట వెస్ట్‌ సిటీలోని 300 ట్యాంకర్ల నుంచి ఒక్కో ట్రిప్పునకు రూ.10 చొప్పున రూ.3000 వసూలు చేస్తున్నారు.

గతంలో జలమండలి నీటిని సక్రమంగా వినియోగాదారులకు అందించడంలో భాగంగా ఆటోమేటిక్‌ వెహికిల్‌ ట్రాకర్‌ డివైస్‌ను ప్రతి ట్యాంకర్‌కు అమర్చారు. అందులో భాగంగా గతేడాది వెస్ట్‌ సిటీలోని 300 ట్యాంకర్లకు ఏవీటీఎస్‌ డివైస్‌ను బిగించి దాని ఖర్చు రూ.5 వేలను ఒక్కో ట్రిప్పునకు రూ.10 చొప్పున 500 ట్రిప్పుల దాకా జలమండలి నుంచి ఇచ్చే డబ్బులో కట్‌ చేసుకునేటట్లు ఒప్పందం చేసుకున్నారు. కానీ.. 500 ట్రిప్పులు దాటిపోయినా రూ.10 కట్‌ చేసుకుని ట్యాంకర్‌ డబ్బులు చెల్లిస్తున్నారు. 300 ట్యాంకర్ల నుంచి నెలల తరబడిగా అదనపు చార్జీలు వసూలు చేస్తూనే ఉన్నారు. దీనిపై ట్యాంకర్‌ యజమానులు ఫిల్లింగ్‌ స్టేషన్లలో ప్రశ్నిస్తే.. తమదేమీ లేదు ఐటీ విభాగంలో ఛార్జీల వసూలును ఆపాల్సి ఉంటుంది.. ఈ విషయంలో తాము ఏమీ చేయలేమని చేతులెస్తున్నట్లు వాపోతున్నారు.

అదనంగా సుమారు రూ.39 లక్షలు వసూలు

సాధారణంగానే వెస్ట్‌ సిటీలో నీటి ఎద్దడి తీవ్రంగా ఉంటుంది. వేసవిలో పరిస్థితి మరింత దారుణంగా మారుతుంది. ఎల్‌నినో ప్రభావంతో ప్రస్తుతం పరిస్థితి ఆందోళనకరంగా మారింది. సాధారణంగానైతే ఆ ప్రాంతంలో ప్రతి రోజు ఒక్కో ట్యాంకర్‌ యజమాని 5 నుంచి 6 ట్రాప్పులు నీటి సరఫరా చేస్తారు. రోజుకు ఐదు ట్రిప్పుల చొప్పున ఏడాదికి 1800కు పైగా ట్రిప్పులు సరఫరా చేస్తారు. ఏవీటీఎస్‌ డివైస్‌ ఏర్పాటు చేసి ఏడాది దాటింది. దాని ధర రూ.5 వేలు కాగా ట్రిప్పునకు రూ.10 కట్‌ చేసుకుంటే 500 ట్రిప్పులకే పూర్తవుతుంది. కానీ.. ఏడాది దాటినా ఇంకా ఛార్జీ కట్‌ అవుతూనే ఉంది. అంటే 500 ట్రిప్పులు పోను మరో 1300 ట్రిప్పులకు గడువు పూర్తయినా అదనంగా వసూలు చేశారు.

ఒక్కో ట్యాంకర్‌ యజమాని నుంచి సుమారు రూ.13 వేలు వసూలు చేశారు. అలా 300 ట్యాంకర్ల నుంచి మొత్తం రూ.39 లక్షలు అదనంగా వసూలు చేశారు. ఈ మొత్తం డబ్బులు ఐటీ విభాగంలోకి వచ్చాయా? ట్యాంకర్ల నిర్వహణ బాధ్యతలు చూస్తున్న రెవెన్యూ విభాగంలోకి వెళ్లాయా? ఫైనాన్స్‌ విభాగానికి వెళ్లాయా? లేదంటే ఐటీ విభాగంలోని సిబ్బంది మాయం చేశారా? అనే ప్రశ్నలు తలుత్తుతున్నాయి. దీనిపై ఐటీ విభాగం అధికారులు మాత్రం ఏవీటీఎస్‌ బిగించినందుకు గడువు ముగిసినా రూ.10 చొప్పున వసూలు చేసింది వాస్తవమే.. ఆగస్టులోనే కట్‌ చేయడం ఆపేశాం.. అదనంగా వసూలు చేసిన డబ్బులను ట్యాంకర్ల యజమానులకు రీఫండ్‌ చేస్తామని బదులిస్తున్నారు. అంటే అక్రమంగా వసూలు చేశామని ఒప్పుకొంటున్నారు.