ప్రగతిశీల శక్తుల ఏకీకరణకే భారత్‌ సమ్మిట్‌

• మంత్రి శ్రీధర్‌బాబు

హైదరాబాద్‌, నవంబర్‌ 12 (నమస్తే తెలంగాణ): ప్రపంచవ్యాప్త ప్రగతిశీల శక్తుల ఏకీకరణ కోసమే హైదరాబాద్‌ వేదికగా భారత్‌ సమ్మిట్‌ నిర్వహిస్తున్నట్టు ఐటీ, పరిశ్రమల శాఖ మంత్రి దుద్దిళ్ల శ్రీధర్‌బాబు తెలిపారు. ఈ సదస్సు ప్రారంభం సందర్భంగా ఆయన గురువారం మీడియాతో మాట్లాడారు. మారుతున్న రాజకీయ, సామాజిక, ఆర్థిక పరిస్థితులకు అనుగుణంగా భవిష్యత్తు విధానాలను రూపొందించేందుకు ఇది వేదికగా నిలుస్తుందని స్పష్టం చేశారు.

ప్రపంచంలోని వివిధ దేశాలకు చెందిన ప్రగతిశీల పార్టీలు, విధాన నిర్ణేతలు, పారిశ్రామికవేత్తలు, సామాజిక మేధావులు ఈ సమ్మిట్‌లో పాల్గొని కీలక అంశాలపై చర్చిస్తారని తెలిపారు. నిరుడి తరహాలోనే ఈసారి కూడా రాహుల్‌గాంధీ ఈ సదస్సుకు హాజరవుతున్నారని పేరొన్నారు. భారత్‌ సమ్మిట్‌ పెట్టుబడుల సదస్సు కాదని, కేవలం రాహుల్‌ను ప్రమోట్‌ చేసుకునే పీఆర్‌ ఈవెంట్‌ అంటూ బీజేపీ చేస్తున్న వ్యాఖ్యలు అర్థరహితమని పేర్కొన్నారు. రాహుల్‌కు ప్రమోషన్‌ చేసుకొనే అవసరం లేదని తెలిపారు.