Guppedantha Prema | డిసెంబర్ 11న ప్రేక్షకుల ముందుకు ‘పారడాక్స్ హరికథ’.. ఘనంగా ‘గుప్పెడంత ప్రేమ’ సాంగ్ లాంచ్ ఈవెంట్

Paradox Harikatha | ఐరావత సినీ కలర్స్, అ‌గ్‌మైన్ ఎంటర్టైన్మెంట్స్ బ్యానర్లపై కడ్లూరి అశోక్, రాంపురం వెంకటేశ్వర్ రెడ్డి సమర్పణలో రంజిత్ కుమార్ గౌడ్, వివేకానంద, రఘు బల్లా, కవిత గోర సంయుక్తంగా నిర్మించిన తాజా చిత్రం ‘పారడాక్స్ హరికథ’. అనుదీప్ రెడ్డి కొతూరు (ఏఆర్‌కే) దర్శకత్వం వహించిన ఈ చిత్రంలో కిరణ్, రంజిత్, అఖిల రామ్, లావణ్య రెడ్డి, కీర్తి, మన్యం భాస్కర్ తదితరులు కీలక పాత్రలు పోషించారు. ఈ సినిమా డిసెంబర్ 11న గ్రాండ్‌గా థియేటర్లలో విడుదల కానుంది. ఈ నేపథ్యంలో చిత్ర యూనిట్ తాజాగా ‘గుప్పెడంత ప్రేమ’ అంటూ సాగే రొమాంటిక్ మెలోడీ గీతాన్ని బుధవారం నాడు ఘనంగా విడుదల చేసింది.

ఈ కార్యక్రమానికి విచ్చేసిన ప్రముఖ నటుడు కేదార్ శంకర్ మాట్లాడుతూ.. ‘పారడాక్స్ హరికథ’ చిత్రంలోని విజువల్స్ చాలా అద్భుతంగా ఉన్నాయని, హీరో హీరోయిన్లు చక్కగా కనిపించారని తెలిపారు. ప్రస్తుతం చిన్న చిత్రాలు బాక్సాఫీస్ వద్ద పెద్ద విజయాలను సాధిస్తున్నాయని, ఈ సినిమా కూడా మంచి విజయం అందుకోవాలని ఆకాంక్షించారు.

మరో నటుడు అంబరీష్ మాట్లాడుతూ.. చారిత్రక అంశాలను ప్రస్తుత తరానికి తగినట్లుగా ఎంతో ఆకట్టుకునేలా ఈ చిత్రాన్ని తెరకెక్కించారని చెప్పారు. ఈ సినిమాలో మంచి సందేశం కూడా ఉందని, చిత్ర యూనిట్ అందరికీ ఆయన ఆల్ ది బెస్ట్ తెలిపారు.

దర్శకుడు అనుదీప్ రెడ్డి మాట్లాడుతూ.. ‘పారడాక్స్ హరికథ’ సాంగ్ లాంచ్‌కు విచ్చేసిన ప్రతి ఒక్కరికీ ధన్యవాదాలు తెలిపారు. తెలుగు చలనచిత్ర పరిశ్రమలో ఇప్పటివరకు రానటువంటి వినూత్నమైన కథాంశంతో ఈ చిత్రాన్ని రూపొందించామని, ఇది ప్రేక్షకులకు ఒక సరికొత్త అనుభూతిని పంచుతుందని పేర్కొన్నారు. తెలుగులో చిన్న చిత్రాల హిట్ జాబితాలో ఈ సినిమా కచ్చితంగా నిలుస్తుందని ధీమా వ్యక్తం చేస్తూ, డిసెంబర్ 11న విడుదలవుతున్న చిత్రాన్ని ప్రేక్షకులు అందరూ ఆదరించి పెద్ద విజయం చేయాలని కోరారు.

నిర్మాత అశోక్ కడ్లూరి మాట్లాడుతూ.. ఈ చిత్రం కుటుంబ సమేతంగా అందరూ కలిసి చూడదగ్గ అద్భుతమైన సినిమాగా నిలుస్తుందని చెప్పారు. అందరి కృషితో ఈ సినిమా రూపుదిద్దుకుందని, అన్ని వర్గాల ప్రేక్షకులను ఆకట్టుకునేలా ఉంటుందని తెలిపారు.

నటి లావణ్య రెడ్డి మాట్లాడుతూ.. సినిమా షూటింగ్ మరియు రిలీజ్ ప్రయాణంలో తాము ఎన్నో సవాళ్లను ఎదుర్కొన్నామని, అయినప్పటికీ చిత్ర యూనిట్ ఎంతో కష్టపడి మంచి కంటెంట్‌తో ఈ సినిమాను పూర్తి చేశామని తెలిపారు. మీడియా మరియు ప్రేక్షకులు అందరూ తమ సినిమాకు సంపూర్ణ సహకారం అందించాలని కోరారు.

సంగీత దర్శకుడు మహవీర్ మాట్లాడుతూ.. ఈ చిత్రంలో పనిచేసే అవకాశం కల్పించిన దర్శక నిర్మాతలకు కృతజ్ఞతలు తెలిపారు. దర్శకుడు అనుదీప్ ఈ సినిమా కోసం పడ్డ కష్టం ప్రతి ఫ్రేమ్‌లో కనిపిస్తుందని, ఇది అందరికీ నచ్చే మంచి సినిమా అవుతుందని చెప్పారు.

నటుడు కిరణ్ మాట్లాడుతూ.. ఈ సినిమా జర్నీలో అనుదీప్ గారి దగ్గర ఎంతో నేర్చుకున్నానని, కథ విన్న వెంటనే తనకు ఎంతగానో నచ్చిందని, ఇలాంటి విలక్షణమైన కథల్లో నటించాలని ప్రతి నటుడూ కోరుకుంటాడని తెలిపారు.

నటి అఖిల రామ్ మాట్లాడుతూ.. ‘మసూద’ చిత్రంలో తనను ముసుగులో చూసిన ప్రేక్షకులు, ఇప్పుడు ఈ చిత్రంలో ముసుగు లేకుండా సరికొత్త పాత్రలో చూస్తారని, సినిమా అందరికీ తప్పకుండా నచ్చుతుందని ఆశాభావం వ్యక్తం చేశారు.

నటుడు మన్యం భాస్కర్ మాట్లాడుతూ.. గతాన్ని, వర్తమానాన్ని ఎంతో చక్కగా ముడిపెడుతూ ఈ చిత్రాన్ని తెరకెక్కించారని, ప్రతి పాత్ర ప్రేక్షకులను ఆకట్టుకునేలా ఉంటుందని తెలిపారు. డిసెంబర్ 11న రాబోతున్న ఈ చిత్రాన్ని అందరూ చూసి విజయవంతం చేయాలని కోరారు.