రేవంత్‌రెడ్డి తెలంగాణ ద్రోహి.. మాజీ మంత్రి శ్రీనివాస్‌గౌడ్‌ ధ్వజం

• ‘పాలమూరు’ ఎత్తిపోతలపై తీవ్ర నిర్లక్ష్యం
• నీళ్లెత్తకుండా ఏపీకి వదలడం దుర్మార్గం
• ఉమ్మడి జిల్లా ప్రజలకు సీఎం తీరనిద్రోహం
• ఉద్యోగులకు సర్కార్‌ ఉద్ధరించిందేమీలేదు

హైదరాబాద్‌, నవంబర్‌ 10 (నమస్తేతెలంగాణ) : కన్నెపల్లి మోటర్లు ఆన్‌చేయకుండా, పాలమూరు-రంగారెడ్డి ప్రాజెక్టును పూర్తిచేయకుండా సీఎం రేవంత్‌రెడ్డి తెలంగాణకు తీరని ద్రోహం చేశారని మాజీ మంత్రి వీ శ్రీనివాస్‌గౌడ్‌ ధ్వజమెత్తారు. మూడేండ్ల తన పాలనలో విధ్వంసం, అరాచకం తప్ప ఆయన రాష్ర్టానికి చేసిందేమీలేదని మండిపడ్డారు. హైదరాబాద్‌ తెలంగాణ భవన్‌లో మంగళవారం మాజీ ఎమ్మెల్యేలు అంజయ్య యాదవ్‌, జైపాల్‌యాదవ్‌, ఆల వెంకటేశ్వర్‌రెడ్డి, బీరం హర్షవర్ధన్‌రెడ్డి, పట్నం నరేందర్‌రెడ్డి, కొప్పుల మహేశ్‌రెడ్డి, శాట్స్‌ మాజీ చైర్మన్‌ అల్లీపురం వెంకటేశ్వర్‌రెడ్డితో కలిసి ఆయన మీడియాతో మాట్లాడారు. నాడు గజ్వేల్‌, సిరిసిల్ల, సిద్దిపేటకు నిధులన్నీ తీసుకెళ్లారని అడ్డగోలుగా మాట్లాడిన రేవంత్‌రెడ్డి.. ఇప్పుడు కొడంగల్‌కు వేల కోట్లు ఇస్తున్నానని గొప్పలు చెప్పుకోవడం సిగ్గుచేటని విమర్శించారు. పాలమూరు ఉమ్మడి జిల్లా అభివృద్ధికి ఏటా రూ.20వేల కోట్లు ఇస్తామని ప్రగల్భాలు పలికిన సీఎం.. ఈ మూడేండ్లలో ఆరుకోట్లయినా ఇచ్చారా? అని ప్రశ్నించారు. పాలమూరు, సమ్మక్కసాగర్‌, వార్ధా ప్రాజెక్టుల డీపీఆర్‌లను కేంద్రం వాపస్‌ పంపినా? ఎందుకు పట్టించుకోవడం లేదని ప్రశ్నించారు. ప్రజలు గుండెలకు హత్తుకొనేలా కేసీఆర్‌ పాలన సాగిస్తే.. రేవంత్‌రెడ్డి మాత్రం నీళ్లను ఆంధ్రాకు మళ్లిస్తూ తెలంగాణ ప్రజల గుండెలపై తన్నుతున్నారని మండిపడ్డారు.

పాలమూరుపై కాంగ్రెస్‌ కక్ష

ఏపీ ఇష్టారీతిన నీళ్లు తరలిస్తున్నా.. పట్టించుకోకుండా పాలమూరుపై కాంగ్రెస్‌ సర్కార్‌ కక్షగట్టిందని దుయ్యబట్టారు. మేడిగడ్డ పిల్లర్లలో 300 మీటర్ల మేర మరమ్మతులు చేస్తే.. 60 టీఎంసీలు నింపే అవకాశం ఉన్నా వదులుకోవడం దుర్మార్గమని దుయ్యబట్టారు. అనుమతులు లేకున్నా ఏపీ ప్రభుత్వం వెలిగొండ, పట్టిసీమ ప్రాజెక్టుల ద్వారా నీళ్లు ఎత్తిపోసుకుకుంటే రేవంత్‌రెడ్డి గుడ్లప్పగించి చూసి తెలంగాణకు ద్రోహం చేశారని నిప్పులు చెరిగారు. జురాల నుంచి శ్రీశైలం మధ్య 50 టీఎంసీల నీళ్లను ఏపీ తరలించుకెళ్లిందని పేర్కొన్నారు. కానీ నిలువరించాల్సిన తెలంగాణ ప్రభుత్వం చోద్యం చూసిందని విమర్శించారు. కృష్ణా బేసిన్‌ నుంచి పెన్నా బేసిన్‌లోని 800 కిలోమీటర్ల దూరంలోని కుప్పానికి నీళ్లు తరలించారని, కానీ 70 కిలోమీటర్ల దూరంలోని పాలమూరు జిల్లాకు నీరివ్వని దుర్మార్గపు ప్రభుత్వం అని నిప్పులు చెరిగారు. కేసీఆర్‌ అధికారంలో ఉంటే ప్రజలకు ఈ బాధలు ఉండేవికావని వ్యాఖ్యానించారు.

రేవంత్‌ పాలనలో మళ్లీ వలసలు

కేసీఆర్‌ హయాంలో బొంబాయి, దుబాయ్‌ తదితర ప్రాంతాలకు వలసెళ్లిన పాలమూరు ప్రజలు తిరిగొచ్చి రందిలేకుండా బతికారని వీ శ్రీనివాస్‌గౌడ్‌ తెలిపారు. కానీ రేవంత్‌ సర్కార్‌ గద్దెనెక్కిన తర్వాత మళ్లీ వలసలు మొదలయ్యాయని ఆందోళన వ్యక్తంచేశారు. నీరందించక, ఉపాధి కల్పించకపోవడంతోనే ఈ దుస్థితి దాపురించిందని స్పష్టంచేశారు. కరువును నివారించాల్సిన ప్రభుత్వం నిద్రమత్తులో జోగుతున్నదని దుయ్యబట్టారు. సన్నద్ధత చర్యలు చేపట్టంలో ఘోరంగా విఫల మైందని మండిపడ్డారు. కర్ణాటక ప్రభుత్వం రూ.1.50 లక్షల కోట్లు వెచ్చించి ఆల్మట్టి ప్రాజెక్టు ఎత్తు పెంచుతుంటే రేవంత్‌రెడ్డి ఏం చేస్తున్నారని ప్రశ్నించారు. తుంగభద్రలో వాటా ఎందుకు అడగడం లేదని నిలదీశారు. ఆల్మట్టి ఎత్తుపెంచితే పాలమూరు జిల్లా ఎడారిగా మారుతుందని ఆందోళన వ్యక్తంచేశారు. ఇప్పటికైనా ప్రభుత్వ పెద్దలు కండ్లు తెరువాలని హితవుపలికారు. లేదంటే చరిత్రలో ద్రోహులుగా మిగిలిపోతారని హెచ్చరించారు. అధికారంలోకి వచ్చి న ఆరు నెలల్లోనే పీఆర్సీ ఇస్తానని, డీఏలన్నీ జమచేస్తానని ప్రగల్భాలు పలికిన రేవంత్‌రెడ్డి.. మూడేండ్లయినా పీఆర్సీ ఎందుకు ఇవ్వడంలేదని ప్రశ్నించారు.