సర్కార్‌ ధోకాపై ఉద్యోగుల ఆగ్రహం సామూహిక సెలవులోకి!

• కాంగ్రెస్‌ మ్యానిఫెస్టో వంచనకు ఈ నెల 17తో మూడేండ్లు
• సీపీఎస్‌ రద్దు కోరుతూ సామూహిక సెలవు
• అదేరోజున సీపీఎస్‌ఈయూ ధర్మదీక్ష సభ
• ఇప్పటికే సెలవు కోసం వేలాదిగా దరఖాస్తులు
• పాత పెన్షన్‌ అమలు చేయాలన్నదే డిమాండ్‌
• సీపీఎస్‌ రద్దు హామీకి ఎగనామం పెట్టినకాంగ్రెస్‌
• పలు రాష్ర్ర్టాల్లో రద్దు.. ఇక్కడ ఆచరణ శూన్యం
• మూడేండ్ల దగాపై నిరసనకు సంఘాల పిలుపు

హైదరాబాద్‌, నవంబర్‌ 10 (నమస్తే తెలంగాణ) : కాంట్రిబ్యూటరీ పెన్షన్‌ స్కీమ్‌ (సీపీఎస్‌)ను రద్దు చేసి పాత పింఛన్‌ విధానం (ఓపీఎస్‌) పునరుద్ధరించాలన్న ప్రధాన డిమాండ్‌తో సీపీఎస్‌ ఎంప్లాయీస్‌ యూనియన్‌ మరో ఉద్యమానికి సిద్ధమైంది. సర్కార్‌పై ఒత్తిడి పెంచేందుకు ప్రత్యక్ష పోరుకు సమాయత్తమైంది. ఈ నెల 17న మూకుమ్మడిగా సామూహిక సెలవులు పెట్టాలని ఉద్యోగులకు పిలుపునిచ్చింది. అదేరోజు హైదరాబాద్‌లో ధర్మదీక్ష సభను నిర్వహిస్తామని తెలంగాణ సీపీఎస్‌ ఎంప్లాయీస్‌ యూనియన్‌ (సీపీఎస్‌ఈయూ) నేతలు ప్రకటించారు. ఇప్పటికే వేలాది మంది ఉద్యోగులు సెలవు కోసం దరఖాస్తు చేసుకున్నారు. రాష్ట్రంలో 2.6 లక్షల మంది సీపీఎస్‌ ఉద్యోగులు ఉన్నారు. అత్యవసర సేవలైన హెల్త్‌, పోలీసు ఉద్యోగులను మినహాయిస్తే 2.2 లక్షల మంది ఉద్యోగులు సామూహిక సెలవులు పెడుతారని సీపీఎస్‌ఈయూ నేతలు తెలిపారు.

మూడేండ్ల క్రితం హామీ.. ఆచరణలో శూన్యం

సీపీఎస్‌ను రద్దుచేస్తామని.. పాత పింఛన్‌ విధానం పునరుద్ధరిస్తామని కాంగ్రెస్‌ ఎన్నికల మ్యానిఫెస్టోలో హామీనిచ్చింది. 2023 నవంబర్‌ 17న కాంగ్రెస్‌ మ్యానిఫెస్టోను విడుదల చేసింది. ఈ 17వ తేదీకి మూడేండ్లు పూర్తవుతుంది. ఇంతవరకూ ఈ హామీని నెరవేర్చలేదు. ఈ నేపథ్యంలో ‘కాంగ్రెస్‌ మ్యానిఫెస్టో డే’ అయిన నవంబర్‌ 17లోపు సీపీఎస్‌ను రద్దుచేయాలని సర్కార్‌కు సీపీఎస్‌ఈయూ డెడ్‌లైన్‌ విధించింది. లేదంటే 17న ఉద్యోగులమంతా సామూహిక సెలవులు పెడుతామని ఆగస్టు 23న అల్టిమేటం జారీచేసింది. అయినప్పటికీ, మ్యానిఫెస్టో హామీ కార్యరూపం దాల్చలేదు. ఈ నేపథ్యంలో కాంగ్రెస్‌ మ్యానిఫెస్టో విడుదలైన నవంబర్‌ 17తేదీనే లక్ష్యంగా చేసుకొని సీపీఎస్‌ఈయూ ఉద్యమబాట పట్టింది.

అధ్యయన కమిటీ ఏమైంది?

కొంతకాలం క్రితం ఉద్యోగుల పోరాటంతో దిగి వచ్చిన సర్కార్‌.. సీపీఎస్‌ రద్దుకు అధ్యయన కమిటీని నియమిస్తామని హామీనిచ్చింది. మూడు నెలల్లో నివేదిక తెప్పించుకుంటామని తెలిపింది. ఎవరెవరితో కమిటీ వేయాలో పేర్లు కూడా తీసుకున్నది. కానీ, ఇంతవరకూ అధ్యయన కమిటీని నియమించలేదు. జీవో ఇవ్వలేదు. సీపీఎస్‌ రద్దు హామీతోపాటు అధ్యయన కమిటీ విషయంలోనూ సర్కార్‌ మళ్లీ ధోకా చేసిందన్న అసంతృప్తి ఉద్యోగుల్లో వ్యక్తమవుతున్నది.

అక్కడ రద్దు.. మరీ ఇక్కడెందుకు వెనుకడుగు?

సీపీఎస్‌ రద్దుపై కాంగ్రెస్‌ వైఖరిని ఉద్యోగులు నిరసిస్తున్నారు. అసలు పాత పింఛన్‌ విధానాన్ని రద్దు చేసిందే కాంగ్రెస్‌ నేతృత్వంలోని యూపీఏ సర్కార్‌. అయితే, ఆ తర్వాత సీపీఎస్‌ అంశంపై కాంగ్రెస్‌ తన స్టాండ్‌ను మార్చుకున్నది. సీపీఎస్‌ను రద్దుచేస్తామని పలు రాష్ర్టాల అసెంబ్లీ ఎన్నికల్లో హామీలిచ్చింది. అధికారంలోకి వచ్చాక హిమాచల్‌ప్రదేశ్‌, రాజస్థాన్‌, ఛత్తీస్‌గఢ్‌ వంటి రాష్టాల్లో సీపీఎస్‌ను రద్దుచేసింది. ఆయా రాష్ర్టాల్లో సీపీఎస్‌ రద్దుకు రాని అడ్డంకి తెలంగాణలో ఎందుకొస్తున్నదని ఉద్యోగులు ప్రశ్నిస్తున్నారు. సీపీఎస్‌ రద్దు డిమాండ్‌తోనే కాంగ్రెస్‌ పార్టీ కర్ణాటక, తెలంగాణ, కేరళ రాష్ర్టాల్లోనూ అధికారంలోకి వచ్చిందని ఉద్యోగులు చెప్తున్నారు. కాంగ్రెస్‌ సంకీర్ణ ప్రభుత్వమున్న ఝార్ఖండ్‌లోనూ సీపీఎస్‌ రద్దుచేస్తామని తెలిపింది. ఉత్తరాదిలో సీపీఎస్‌ను రద్దుచేసిన కాంగ్రెస్‌.. దక్షిణాదిలో మాత్రం ఆ ఊసెత్తడంలేదని, కర్ణాటక, కేరళ, తెలంగాణలో వంచనకు పాల్పడిందని ఉద్యోగులు మండిపడుతున్నారు.

22 ఏండ్లుగా అభద్రత.. రిటైర్మెంట్‌ తర్వాత..

పాత పింఛన్‌ విధానం రద్దుతో 22 ఏండ్లుగా ఉద్యోగులంతా సామాజిక భద్రత కరువై బిక్కుబిక్కుమంటూ గడుపుతున్నారు. ఈ విధానం పరిధిలో ఇప్పటివరకూ 5వేల మంది ఉద్యోగులు రిటైర్‌ కాగా, ఏ ఒక్కరికీ కనీసం రూ.5వేలకు మించి పెన్షన్‌ అందడంలేదు. కొందరి పెన్షన్‌ రూ.1,600 దాటడంలేదు. ఆసరా (చేయూత) పింఛన్ల కన్నా తక్కువ పింఛన్‌ పొందుతున్నామని సీపీఎస్‌ రిటైర్డ్‌ ఉద్యోగులు వాపోతున్నారు. చాలీచాలని పెన్షన్‌తో ఎట్లా జీవించాలని రిటైర్డ్‌ ఉద్యోగులు ప్రశ్నిస్తున్నారు. సీపీఎస్‌ ఉద్యోగుల సొమ్మును ప్రభుత్వం షేర్‌ మార్కెట్లో పెట్టుబడులు పెట్టింది. ప్రపంచంలో ఎక్కడ యుద్ధం జరిగినా ఉద్యోగుల సొమ్ము ఆవిరవుతున్నది. ఈ ఏడాది మార్చిలో సీపీఎస్‌ ఉద్యోగులకు చెందిన రూ.1,800 కోట్లు ఆవిరయ్యాయి.

సీపీఎస్‌ వాటా సొమ్ములకు ఎసరు!

సీపీఎస్‌ ఉద్యోగుల ప్రీమియానికి కూడా సర్కార్‌ ఎసరుపెట్టింది. సర్కార్‌ చెల్లించాల్సిన 10% వాటాను ప్రాన్‌ అకౌంట్లలో జమ చేయడంలేదు. ఉద్యోగుల వేతనం నుంచి కోతపెట్టిన 10% వాటాను ప్రభుత్వమే వాడుకుంటున్నది. మరోవైపు, ఎంప్లాయీస్‌ హెల్త్‌ స్కీమ్‌ (ఈహెచ్‌ఎస్‌) రిటైర్డ్‌ సీపీఎస్‌ ఉద్యోగులకు అమలుకావడం లేదు. పెన్షన్‌ నుంచి ఈహెచ్‌ఎస్‌ ప్రీమియంను మినహాయించుకోవడం లేదు. ట్రస్టులోనూ సీపీఎస్‌ ఉద్యోగులకు ప్రాతినిధ్యం లేకుండా పోయింది. దీంతో సీపీఎస్‌ ఉద్యోగుల సమస్యలను ప్రస్తావించే అవకాశం లేకుండా పోయిందని ఉద్యోగ సంఘాల నేతలంటున్నారు.

మా పాత పింఛన్‌ మాగ్గావాలే : స్థితప్రజ్ఞ, శ్రీకాంత్‌

‘మా పాత పింఛన్‌ మాగ్గావాలే’నన్న నినాదంతో ఉద్యమిస్తామని తెలంగాణ సీపీఎస్‌ ఎంప్లాయీస్‌ యూనియన్‌ రాష్ట్ర అధ్యక్ష, ప్రధాన కార్యదర్శులు గంగాపురం స్థితప్రజ్ఞ, కల్వల్‌ శ్రీకాంత్‌, ఉపాధ్యక్షుడు మ్యాన పవన్‌కుమార్‌ తెలిపారు. ఈ నెల 17న ఉద్యోగులంతా సామూహిక సెలవులు పెట్టాలని పిలుపునిచ్చారు. సామూహిక సెలవులు పెడుతామని తాము ఆగస్టు 23వ తేదీనే ప్రకటించామని.. సీఎస్‌ను కలిసి నోటీసు కూడా ఇచ్చామని చెప్పారు. అయినా స్పందన లేకపోవడంతోనే తప్పనిసరి పరిస్థితుల్లో ఉద్యమాన్ని ఉధృతం చేయాలని నిర్ణయించామని స్పష్టంచేశారు. ఉద్యోగులంతా ఒత్తిళ్లకు తలొగ్గకుండా ఉద్యమించి సీపీఎస్‌ ఉద్యోగుల సత్తాచాటాలని పిలుపునిచ్చారు.