ఆర్యవీర్‌ శతక ధమాకా

• అండర్‌-19 ఆసియాకప్‌ సెమీస్‌కు భారత్‌
• యూఏఈపై ఘన విజయం

ఒమన్‌ : అండర్‌-19 ఆసియా కప్‌లో యువ బ్యాటర్‌ ఆర్యవీర్‌ సెహ్వాగ్‌ (168 బంతుల్లో 17 ఫోర్లు, 7 సిక్స్‌లతో 160) శతక్కొట్టి భారత్‌ను సెమీస్‌ చేర్చాడు. మంగళవారం జరిగిన గ్రూప్‌-ఏ మ్యాచ్‌లో యూఏఈపై భారత్‌ 70 పరుగుల తేడాతో ఘనవిజయం సాధించింది. భారత్‌ నిర్దేశించిన 310 పరుగుల ఛేదనలో యూఏఈ నిర్ణీత ఓవర్లు ఆడినా 239 రన్స్‌కే పరిమితమైంది. టాస్‌ ఓడి మొదట బ్యాటింగ్‌ చేసిన భారత్‌కు ప్రధాన బ్యాటర్లు విఫలమైనా ఆర్యవీర్‌, వీకే వినీత్‌ (67) రెండో వికెట్‌కు 193 పరుగుల భారీ భాగస్వామ్యాన్ని నెలకొల్పారు.

అయితే తర్వాత వచ్చిన బ్యాటర్లు బ్యాట్‌ ఝుళిపించకపోవడంతో భారత్‌ 309/7 వద్దే ఆగిపోయింది. ఛేదనలో భారత పేసర్‌ ఇషాన్‌ సూద్‌ (4/37) పేస్‌కు ప్రత్యర్థి బ్యాటర్లు దాసోహమవడంతో యూఏఈ కోలుకోలేకపోయింది. గురువారం జరిగే సెమీస్‌లో యువ భారత్‌ అఫ్గానిస్థాన్‌తో తలపడనుంది. పాకిస్థాన్‌, బంగ్లాదేశ్‌ మధ్య తొలి సెమీస్‌ జరుగుతుంది.