మూడోది వాన ఖాతాలోకి.. భారత్‌-కివీస్‌ మూడో వన్డే వర్షార్పణం

• ఒక్క బంతి పడకుండానే మ్యాచ్‌ రద్దు

హామిల్టన్‌ : భారత్‌- న్యూజిలాండ్‌ వన్డే సిరీస్‌ను వాన వదలడం లేదు. తొలి రెండు వన్డేల్లో ఇరు జట్లను ఇబ్బందిపెట్టిన వరుణుడు మూడో వన్డేకు పూర్తిగా అడ్డొచ్చాడు. దాంతో సెడాన్‌ పార్క్‌ వేదికగా మంగళవారం జరగాల్సిన మూడో పోరు ఒక్క బంతి కూడా పడకుండానే రైద్దెంది. ఈ మ్యాచ్‌లో భారత కెప్టెన్‌ శుభ్‌మన్‌ గిల్‌ వరుసగా మూడోసారి టాస్‌ గెలిచి ఫీల్డింగ్‌ ఎంచుకున్నాడు. వర్షం కొద్దిగా తగ్గడంతో మ్యాచ్‌ను 40 ఓవర్లకు కుదించి నిర్వహించేందుకు గ్రౌండ్‌ సిబ్బంది కవర్లను తొలగిస్తుండగా మళ్లీ వాన తీవ్రమైంది. కటాఫ్‌ టైమ్‌కు ఇంకా సమయం ఉన్నప్పటికీ ఔట్‌ఫీల్డ్‌ పూర్తిగా తడిసి ఆటకు అనుకూలించకపోవడంతో అంపైర్లు మ్యాచ్‌ను రద్దు చేశారు.

ఐదు వన్డేల సిరీస్‌లో తొలి రెండింటిలో నెగ్గిన భారత్‌ ప్రస్తుతం 2-0తో ఆధిక్యంలో ఉంది. కాగా, ఈ మ్యాచ్‌ అనంతరం భారత జట్టులో కీలక మార్పులు చోటుచేసుకోనున్నాయి. న్యూజిలాండ్‌తో టెస్టు సిరీస్‌ సన్నాహకాల కోసం సారథి గిల్‌, వికెట్‌ కీపర్‌ కేఎల్‌ రాహుల్‌, బౌలర్లు మహ్మద్‌ సిరాజ్‌, కుల్దీప్‌ యాదవ్‌, అన్షుల్‌ కాంబోజ్‌ వెల్లింగ్టన్‌లో టెస్టు జట్టులో కలవనున్నారు. దీంతో ఈ నెల 13, 15వ తేదీల్లో మౌంట్‌ మాంగనీ వేదికగా జరగనున్న చివరి రెండు వన్డేలకు వైస్‌ కెప్టెన్‌ శ్రేయస్‌ అయ్యర్‌ భారత జట్టుకు నాయకత్వం వహించనున్నాడు. గిల్‌, రాహుల్‌ స్థానాల్లో రుతురాజ్‌ గైక్వాడ్‌, ఇషాన్‌ కిషన్‌ తుది జట్టులోకి వచ్చే అవకాశముంది.