మరింత తగ్గిన పుత్తడి

న్యూఢిల్లీ, నవంబర్‌ 10 : బంగారం ధరలు మరింత తగ్గుముఖం పట్టాయి. దీపావళి, ధంతేరాస్‌ సందర్భంగా రికార్డు స్థాయిలో దూసుకుపోయిన గోల్డ్‌ ధరలు ప్రస్తుతం దిగువముఖం పట్టాయి. దేశ రాజధాని న్యూఢిల్లీ బులియన్‌ మార్కెట్లో 99.9 శాతం స్వచ్ఛత కలిగిన పదిగ్రాముల గోల్డ్‌ ధర రూ.500 తగ్గి రూ.1,46,400కి చేరుకున్నది. అంతర్జాతీయ మార్కెట్లలో డిమాండ్‌ పడిపోవడం, డాలర్‌ స్థిరంగా ఉండటంతో అతి విలువైన లోహాల ధరలు తగ్గుముఖం పట్టాయని బంగారం వర్తకులు వెల్లడించారు. బంగారంతోపాటు వెండి ధరలు స్థిరంగా ఉన్నాయి. పారిశ్రామిక వర్గాలు, నాణేల తయారీదారుల నుంచి కొనుగోళ్లు అంతంత మాత్రంగానే ఉండటంతో కిలో వెండి రూ.1,92,500 వద్ద ఉన్నది.

గ్లోబల్‌ మార్కెట్లో ఔన్స్‌ గోల్డ్‌ ధర 27 డాలర్లు లేదా ఒక్క శాతం తగ్గి 4,113.55 డాలర్లకు పడిపోగా, వెండి కూడా ఒక్కశాతం తగ్గి 52.77 డాలర్లుగా నమదైంది. అమెరికా ద్రవ్యోల్బణ గణాంకాల ముందు చమురు ధరలు తగ్గడంతో ద్రవ్యోల్బణ ఆందోళనలు తగ్గుముఖం పట్టాయని, దీంతో ఔన్స్‌ గోల్డ్‌ 4,100 డాలర్ల స్థాయికి పడిపోయిందని విశ్లేషకులు వెల్లడించారు. అమెరికా-ఇరాన్‌ దేశాల మధ్య శాంతి చర్చలు జరుగుతుండటంతో ఇంధన ధరలు భారీగా పడిపోవడం కూడా ధరలు తగ్గడానికి ప్రధాన కారణమన్నారు.