రాజకీయాల్లోకి వచ్చే ఆలోచన లేదు

తమిళనాట సినిమాలకు, రాజకీయాలకు విడదీయలేదని అనుబంధం ఉంది. ఎంజీఆర్‌, జయలలిత, కరుణానిధి వంటి సినీ ప్రముఖులు అక్కడి రాజకీయాల్ని శాసించారు. తాజాగా నటుడు విజయ్‌ సైతం రాజకీయాల్లో ప్రవేశించి సీఎం కావడంతో ఇతర స్టార్‌ హీరోల రాజకీయ రంగ ప్రవేశంపై ఊహాగానాలు వెలువడుతున్నాయి. తమిళ అగ్ర హీరో సూర్య రాజకీయాల్లోకి రాబోతున్నారంటూ ప్రచారం జరుగుతున్నది. ఈ నేపథ్యంలో చెన్నైలో జరిగిన తన తాజా చిత్రం ‘సీన్‌’ సక్సెస్‌మీట్‌లో పాల్గొన్న సూర్య రాజకీయరంగ ప్రవేశంపై ఆసక్తికరమైన వ్యాఖ్యలు చేశారు. ఇప్పట్లో తనకు రాజకీయాల్లోకి వచ్చే ఉద్దేశ్యం లేదని స్పష్టం చేశారు.

అయితే రాజకీయాలంటే తనకు ద్వేషం లేదని, వాటిని నిశితంగా పరిశీలిస్తున్నానని వ్యాఖ్యానించారు. రాజకీయాల్లోని సవాళ్లు, బాధ్యతల గురించి తెలుసుకోకుండా ఆ రంగంలోకి అడుగుపెట్టడం మంచిది కాదని సూర్య అభిప్రాయపడ్డారు. సమాజంలోని అనేక సమస్యలకు విద్య ద్వారానే పరిష్కారం లభిస్తుందని, ప్రభుత్వాలు విద్యకు తొలి ప్రాధాన్యత ఇవ్వాలని సూర్య పేర్కొన్నారు. తన ఆధ్వర్యంలో నడుస్తున్న సేవా సంస్థ ‘అగరం’ ఫౌండేషన్‌ ద్వారా ఆర్థికంగా వెనకబడ్డ విద్యార్థులను ఆదుకుంటున్నామని, అయితే ఈ సంస్థ కార్యక్రమాల వెనక ఎలాంటి రాజకీయ ఉద్దేశ్యాలు లేవని సూర్య వివరించారు.