శ్రీ‌జ కుటుంబ స‌భ్యుల‌కు కేటీఆర్ భ‌రోసా

క‌న‌గ‌ల్‌, న‌వంబ‌ర్ 10 : నల్లగొండ జిల్లా కనగల్ మండలం శాబ్దుల్లాపూర్ గ్రామానికి చెందిన కోయ యాదగిరి రెడ్డి- రూప దంపతుల ఏకైక కుమార్తె శ్రీజ ఈ నెల 2 న అమెరికా బోస్టన్‌లో క‌నిపించ‌కుండా పోయిన విష‌యం తెలిసిందే. శ్రీజ బోస్టన్ యూనివర్సిటీలో చదువుకుంటుంది. ఈ నెల 2వ తేదీన మిత్రులతో పుట్టిన‌రోజు వేడుక‌కు వెళ్లి తను ఒక్కతే బయటికి వెళ్లింది. ఆ తర్వాత ఆమె మిత్రులు ఎంత వెతికినా ఆచూకీ లభ్యం కాలేదు. పోలీసులకు ఫిర్యాదు చేసినప్పటికీ ఇంతవరకు ఆచూకీ కనుగొనలేకపోయారు. దాంతో తీవ్ర ఆందోళనలో కన్నీరు మున్నీరవుతున్న కుటుంబ సభ్యులను నేడు నల్లగొండ మాజీ ఎమ్మెల్యే కంచర్ల భూపాల్ రెడ్డి శాబ్దుల్లాపురం గ్రామంలో పరామర్శించారు. తమను ఏ నాయకుడు పట్టించుకోవట్లేదని తీవ్ర ఆవేదన వ్యక్తం చేయడంతో అక్కడి నుండి బీఆర్ఎస్ వర్కింగ్ ప్రెసిడెంట్ కేటీఆర్‌తో మాట్లాడి ఆ కుటుంబానికి సాయం చేయాల్సిందిగా అర్ధించారు. కేటీఆర్ వెంటనే స్పందించి కుటుంబ సభ్యులతో మాట్లాడారు. భయపడకండి. ధైర్యంగా ఉండండి. ఏమీ కాదు. మీ అమ్మాయి తిరిగి వస్తుంది. వివరాలు ఇవ్వండి. అక్కడ తెలిసిన వారితో మాట్లాడుతాన‌ని వారికి కేటీఆర్ భరోసా కల్పించారు. కంచర్లతో తనకు వివరాలు వెంటనే పంపాల్సిందిగా సూచించారు.

శ్రీ‌జ కుటుంబ స‌భ్యుల‌కు కేటీఆర్ భ‌రోసా

అదేవిధంగా మాజీ మంత్రి, సూర్యాపేట ఎమ్మెల్యే గుంటకండ్ల జగదీశ్ రెడ్డి కూడా ఫోన్‌లో శ్రీ‌జ కుటుంబ సభ్యులతో మాట్లాడి ధైర్యం చెప్పారు. అనంత‌రం కంచర్ల మాట్లాడుతూ.. యాదగిరి రెడ్డి దంపతుల ఏకైక కుమార్తె ఆచూకీ లభ్యంగాక వారు పడుతున్న ఆవేదన తనకు బాధ కలిగించిందని, విషయం చెప్పగానే కేటీఆర్ స్పందించి కుటుంబ సభ్యులకు భరోసా కల్పించి తన మిత్రుల ద్వారా వారికి సహకారం అందిస్తానని తెలియజేయడం ఆ కుటుంబానికి ఊరట కలిగించిందన్నారు. తాము ఆ కుటుంబానికి అండగా ఉంటామని తెలిపారు. ఆయ‌న వెంట నల్లగొండ మున్సిపల్ మాజీ చైర్మన్ మందడి సైదిరెడ్డి, మాజీ ఎంపీపీ కరీం పాషా, బీఆర్ఎస్‌ కనగల్ మండ‌లాధ్య‌క్షుడు అయితగోని యాదయ్య, రావుల శ్రీనివాసరెడ్డి, సుంకిరెడ్డి వెంకటరెడ్డి, కడారి కృష్ణయ్య ఉన్నారు.