రేవంత్‌ను విష్‌ చేయని పెద్దలు.. పుట్టినరోజున పలుకరించని ఢిల్లీ నేతలు
- సోనియా, రాహుల్‌, ప్రియాంక, ఖర్గే, కేసీ.. ఏ ఒక్కరూ స్పందించని వైనం
- కనీసం ఎక్స్‌లోనూ శుభాకాంక్షల్లేవ్‌
- మోదీ శుభాకాంక్షలు.. కాంగ్రెస్‌లో చర్చ
- నిరుడూ ఇలానే.. ఫోన్‌ చేశారని లీకులు
హైదరాబాద్‌, నవంబర్‌ 9(నమస్తే తెలంగాణ) : ముఖ్యమంత్రి రేవంత్‌రెడ్డికి సొంత పార్టీ అగ్రనాయకత్వమే షాకిచ్చింది. రేవంత్‌ జన్మదినం సందర్భంగా కాంగ్రెస్‌ ఢిల్లీ పెద్దలు ఒక్కరు కూడా శుభాకాంక్షలు చెప్పనట్టుగా తెలిసింది. నేరుగా ఫోన్‌ చేసి చెప్పడం సంగతి పక్కన పెడితే కనీసం సోషల్‌ మీడియా వేదికగా కూడా శుభాకాంక్షలు తెలియజేయలేదు. పార్టీ అధినేత్రి సోనియాగాంధీ, రాహుల్‌ గాంధీ, ప్రియాంకాగాంధీ, ఏఐసీసీ అధ్యక్షుడు మల్లికార్జున ఖర్గే, ప్రధాన కార్యదర్శి కేసీ వేణుగోపాల్‌ ఇలా కీలక నేతలెవరూ శుభాకాంక్షలు చెప్పకపోవడం చర్చనీయాంశంగా మారింది. తెలంగాణలో కాంగ్రెస్‌ అధికారంలో ఉండటం, రేవంత్‌రెడ్డి ముఖ్యమంత్రిగా కొనసాగుతుండటం, జాతీయ నాయకత్వంతో సన్నిహిత సంబంధాలున్నాయని ఆయన ప్రచారం చేసుకుంటున్న నేపథ్యంలో ఈ పరిణామం ప్రాధాన్యం సంతరించుకున్నది. మరోవైపు ప్రధాని నరేంద్ర మోదీ సహా ఇతర జాతీయ నేతలు జన్మదిన శుభాకాంక్షలు తెలుపుతుంటే.. సొంత పార్టీ అగ్రనేతల నుంచి పలుకరింపు కూడా లేకపోవడం హస్తం శ్రేణుల్లో చర్చకు దారితీసింది.
నిరుడూ ఇదే కథ
రేవంత్‌రెడ్డికి కాంగ్రెస్‌ పెద్దల నుంచి బహిరంగంగా విషెస్‌ అందకపోవడం ఈ ఏడాదితోనే మొదలుకాలేదు. నిరుడు కూడా దాదాపు ఇదే పరిస్థితి ఎదురైంది. అప్పట్లోనూ రాహుల్‌ గాంధీ, సోనియాగాంధీ సహా కీలక నేతల నుంచి సోషల్‌ మీడియా వేదికగా జన్మదిన శుభాకాంక్షలు కనిపించలేదు. దీనిపై రాజకీయంగా చర్చ మొదలవడంతో పరిస్థితిని సర్దుబాటు చేసుకునేందుకు అగ్రనేతలు ఫోన్‌లో మాట్లాడి శుభాకాంక్షలు తెలిపారంటూ పార్టీ వర్గాల నుంచి లీకులు వచ్చాయి. ఇప్పుడు మరోసారి అదే తరహా పరిణామం పునరావృతం కావడం గమనార్హం. రేవంత్‌రెడ్డి పుట్టిన రోజు సందర్భంగా ఆయనకు దేశంలోని ప్రముఖులు ఎవరెవరు శుభాకాంక్షలు తెలిపారనే విషయాన్ని సీఎం పీఆర్వో గ్రూపులో పేర్కొన్నారు. ప్రధాని మోదీతో పాటు లోక్‌సభ స్పీకర్‌ ఓం బిర్లా, ఏపీ సీఎం చంద్రబాబు నాయుడు, కర్ణాటక సీఎం డీకే శివకుమార్‌, కేరళ సీఎం వీడీ సతీషన్‌, హిమాచల్‌ప్రదేశ్‌ సీఎం సుఖ్వీందర్‌సింగ్‌, కేంద్ర మంత్రులు కిషన్‌రెడ్డి, రామ్మోహన్‌నాయుడు, కేంద్ర హోంశాఖ సహాయ మంత్రి బండి సంజయ్‌, ఏపీ మంత్రి నారా లోకేశ్‌, సినీనటులు చిరంజీవి, మహేశ్‌బాబు పుట్టినరోజు శుభాకాంక్షలు చెప్పినట్టుగా పోస్టు చేశారు. అయితే ఈ జాబితాలో ఎక్కడా కాంగ్రెస్‌ అగ్రనేతలు శుభాకాంక్షలు చెప్పినట్టు లేదు.
మోదీ విషెస్‌.. కాంగ్రెస్‌ పెద్దల మౌనం!
మరోవైపు ప్రధాని నరేంద్ర మోదీ రేవంత్‌రెడ్డికి జన్మదిన శుభాకాంక్షలు తెలుపడం ఈ వ్యవహారానికి మరింత రాజకీయ ప్రాధాన్యం తెచ్చింది. ప్రధాని స్వయంగా లేఖ రాయడంతో పాటు ఎక్స్‌ వేదికగా శుభాకాంక్షలు చెప్పారు. ఇప్పుడిది చర్చకు దారితీసింది. ఇతర పార్టీల జాతీయ నాయకులు కూడా శుభాకాంక్షలు తెలిపినా సొంత పార్టీ అగ్రనాయకత్వం నుంచి మాత్రం బహిరంగంగా స్పందన లేకపోవడం కాంగ్రెస్‌ శ్రేణుల్లో చర్చనీయాంశంగా మారింది.
Comments (0)