Man Offered Bomb As Rasgulla | రసగుల్లా అని చెప్పి బాంబు ఇవ్వడంతో కొరికిన వ్యక్తి.. అది పేలడంతో మృతి

భోపాల్‌: ఒకరి ఇంటికి ఒక వ్యక్తి వచ్చాడు. ఆ ఇంటి యజమానికి రసగుల్లా అని చెప్పి నాటు బాంబు ఇచ్చాడు. చీకటిలో గమనించని అతడు దానిని నోట్లో పెట్టుకుని కొరికాడు. ఆ బాంబు పేలడంతో ఆ ఇంటి యజమాని మరణించాడు. పోలీసులు ఈ సంఘటనపై దర్యాప్తు చేస్తున్నారు. (Man Offered Bomb As Rasgulla) మధ్యప్రదేశ్‌లోని దిండోరి జిల్లాలో ఈ సంఘటన జరిగింది. నవంబర్ 10న మంగళవారం రాత్రి సమయంలో పడారియా గ్రామంలోని రాజేంద్ర బరోటియా ఇంటికి రామ్ భగత్ బరోటియా అనే వ్యక్తి వచ్చాడు. వారిద్దరూ కొంతసేపు మాట్లాడుకున్నారు.

కాగా, ఇంటి యజమాని అయిన రాజేంద్రకు, రామ్ భగత్ ఒక నాటు బాంబు ఇచ్చాడు. అది రసగుల్లా అని చెప్పి నమ్మించాడు. చీకటిగా ఉండటంతో రాజేంద్ర ఆ బాంబును గమనించలేదు. రసగుల్లాగా భావించి నోట్లో పెట్టుకుని కొరకగానే భారీ శబ్దంతో అది పేలింది. ఆ పేలుడు శబ్దానికి ఇంట్లో ఉన్న రాజేంద్ర భార్య సుశీల భయాందోళన చెందింది. తీవ్రంగా గాయపడిన భర్తను పొరుగువారి సహాయంతో ఆటోలో ఆసుపత్రికి తరలించింది. అయితే అతడు అప్పటికే మరణించినట్లు డాక్టర్లు నిర్ధారించారు.

మరోవైపు ఈ సమాచారం తెలుసుకున్న పోలీసులు సంఘటనా స్థలానికి చేరుకున్నారు. రామ్ భగత్‌ను అరెస్ట్‌ చేశారు. అతడ్ని ప్రశ్నించగా ఒక బాలుడు తనకు ఆ నాటు బాంబు ఇచ్చినట్లు పోలీసులకు చెప్పాడు. ఈ నేపథ్యంలో ఆ బాలుడిని కూడా అదుపులోకి తీసుకుని విచారిస్తున్నారు. రాజేంద్ర, అతడి పొరుగువారికి, నిందితుడికి ఏవైనా వ్యక్తిగత కక్షలు ఉన్నాయా? అన్నది పోలీసులు ఆరా తీస్తున్నారు. ఈ కేసుపై పలు కోణాల్లో దర్యాప్తు చేస్తున్నట్లు పోలీస్‌ అధికారి వెల్లడించారు.