చి‘వరి’ తడి కష్టాలు.. నీటికోసం రైతన్నల అరిగోస

• 20కిపైగా మోటర్లతో చెరువు నీరు పారకం
• అయినా పంట చేతికందడం  ష్టమేనంటున్న రైతులు

ములుగురూరల్‌, నవంబర్‌ 9 : నీళ్లు అందక పంటలు ఎండిపోయే దశకు చేరుతుండటంతో రైతులు ఆందోళన చెందుతున్నారు. ములుగు జిల్లా ములుగు మండలం ఊర చెరువు ఏటా వర్షాకాలంలో మత్తడి పోస్తుంది. దీంతో చివరి ఆయకట్టు వరకు పుష్కలంగా సాగు నీరందేది. ఈ సారి వర్షాలు అనుకున్న రీతిలో కురువకపోవడంతో చెరువులో నీరు అంతంత మాత్రంగానే ఉన్నది. దీంతో నీళ్లు లేక చెరువు ఆయకట్టు కింద 150 నుంచి 200 ఎకరాల వరకు వరి సాగు చేసిన రైతులు ఆందోళన చెందుతున్నారు. వరి పొట్ట దశకు చేరుకోగా సాగు నీరు లేకపోవడంతో పంట ఎండిపోయే స్థితికి చేరుకున్నది. దీంతో చెరువులో ఉన్న కొద్దిపాటి నీటిని సుమారు 20 మోటర్ల సహాయంతో 5 కాలువల ద్వారా రోజుకు 20 గుంటల పొలానికి నీటిని పారించుకుంటూ ఉదయం 6 నుంచి సాయంత్రం 6 వరకు రైతులు కాపలా ఉంటున్నారు. పంటలకు సరిపడా సాగు నీరు అందే పరిస్థితి లేదని, అప్పు చేసి పెట్టుబడులు పెట్టినా పంట ఆగమయ్యే పరిస్థితి ఉన్నదని రైతులు లబోదిబోమంటున్నారు.

కరువు మండలంగా ప్రకటించాలి

కరువు ప్రభావంతో రైతుల పరిస్థితి దారుణంగా తయారైంది. మా గ్రామంలోని పంటలకు జీవనాధారం ఊర చెరువు. వర్షాలు కురువకపోవడంతో చెరువులో నీరు చేరలేదు. ప్రస్తుతం వరి పంట పొట్ట దశకు చేరుకున్నది. చివరి దశలో పంటలు ఉండగా చెరువులో కూడా నీరు చివరి దశలో ఉన్నాయి. ఉన్న నీరు పారించుకున్నా పంటలు దక్కని పరిస్థితి. ములుగు మండల వ్యాప్తంగా ఇదే పరిస్థితి ఉన్నది. ప్రభుత్వం స్పందించి మండలాన్ని కరువు ప్రాంతంగా ప్రకటించాలి.

– అడ్డూరి రాజు, రైతు, కొత్తూరు