మార్మిక యోధుడు విరావి

మిస్టిక్‌ థ్రిల్లర్‌గా ప్రేక్షకుల్ని మెప్పించిన ‘పొలిమేర’ సిరీస్‌ నుంచి వస్తున్న మూడో చిత్రం ‘పొలిమేర-3’. యాక్షన్‌కింగ్‌ అర్జున్‌, సత్యం రాజేష్‌, బాలాదిత్య, కామాక్షి భాస్కర్ల ప్రధాన పాత్రధారులు. డాక్టర్‌ అనిల్‌ విశ్వనాథన్‌ దర్శకత్వం వహిస్తున్న ఈ చిత్రాన్ని వంశీ నందిపాటి, భరత్‌ నారంగ్‌ నిర్మిస్తున్నారు. సోమవారం ఈ సినిమా నుంచి విరావి పాత్రలో అర్జున్‌ సర్జా గ్లింప్స్‌ని విడుదల చేశారు.

అమావాస్య రోజు ఆలయంలోని చీకటి ప్రదేశాలను చూపిస్తూ గ్లింప్స్‌ ఆసక్తికరంగా మొదలైంది. ఆధ్యాత్మికత, మిస్టరీ, అతీంద్రియ శక్తుల నేపథ్యంలో గ్లింప్స్‌ ఆకట్టుకుంది. మార్మిక యోధుడు విరావిగా గంభీరమైన రూపం, హావభావాలతో అర్జున్‌ కనిపించిన తీరు ప్రత్యేకాకర్షణగా నిలిచింది. ఆయన పాత్ర కథాగమనంలో కీలకంగా ఉంటుందని, పాన్‌ ఇండియా స్థాయిలో చిత్రాన్ని విడుదల చేస్తామని మేకర్స్‌ తెలిపారు.