భట్టిని నిలదీసిన మహిళలు

• అనర్హులకు ఇండ్ల కేటాయింపుపై ఫైర్‌.. ఖమ్మం జిల్లా దెందుకూరులో ఘటన

మధిర, నవంబర్‌ 9 : ఇందిరమ్మ ఇండ్లు అనర్హులకు కేటాయించి, అర్హులమై న తమకు అన్యాయం చేశారని ఆరోపిస్తూ కొందరు మహిళలు డిప్యూటీ సీఎం మల్లు భట్టి విక్రమార్క కారును అడ్డుకున్నారు. ఈ ఘటన ఖమ్మం జిల్లా మధిర మండలం దెందుకూరులో ఆదివారం రాత్రి చోటుచేసుకున్నది. దీపావళి పండు గ సందర్భంగా దెందుకూరులో ఇందిరమ్మ ఇండ్ల ప్రారంభోత్సవ కార్యక్రమానికి డిప్యూటీ సీఎం భట్టి విక్రమార్క హాజరయ్యారు. అనంతరం ఆయన మీడియా తో మాట్లాడుతుండగా.. ఇండ్లు మంజూ రు కాని పలువురు బాధితులు పక్కనే ఆం దోళనకు దిగారు. గ్రామంలో అర్హులైన నిరుపేదలకు ఇండ్లు దక్కలేదని, అనర్హులకు ఎలా కేటాయిస్తారని కాంగ్రెస్‌ నాయకులను నిలదీశారు. ఆందోళన విషయం బయటకు రాకుండా ఉండేందుకు పక్కనే ఉన్న కాంగ్రెస్‌ నాయకులు భట్టి నాయకత్వం వర్ధిల్లాలి అంటూ పెద్ద ఎత్తున నినాదాలు చేశారు.

కాగా, విలేకరులతో మాట్లాడిన అనంతరం భట్టి తన వాహనంలో బయలుదేరుతుండగా గ్రామానికి చెందిన ఎలిజాల శిరోమణి తన ఇద్దరు కుమార్తెలతో కలిసి వాహనం ఎదుట నిరసన తెలిపారు. కాంగ్రెస్‌ నాయకులు, కార్యకర్తలు వారిని సముదాయించినా వినకుండా.. తమకు ఇల్లు మంజూరు చేసేవరకు కదిలేది లేదంటూ ఆందోళనకు దిగారు. రూర ల్‌ సీఐ మధు జోక్యం చేసుకొని, బాధితుల వినతిపత్రాన్ని డిప్యూటీ సీఎం వద్దకు తీసుకెళ్లారు. తమను భట్టి వద్దకు తీసుకెళ్లకపోవడంతో బాధితులు ఆవేదన వ్యక్తం చేశారు. క్షేత్రస్థాయిలో వారి అర్హతలను పరిశీలించి తగిన న్యాయం చేయాలని సంబంధిత అధికారులను డిప్యూటీ సీఎం ఆదేశించడంతో వివాదం సద్దుమణిగింది.