ఇందిరమ్మ రాజ్యంలో పరామర్శ నేరమా?

• పట్నం నరేందర్‌రెడ్డి అరెస్ట్‌ దుర్మార్గం
• బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌

హైదరాబాద్‌, నవంబర్‌ 9 (నమస్తేతెలంగాణ) : ‘ఇందిరమ్మ రాజ్యంలో పరామర్శ కూడా నేరమేనా?’ అంటూ బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ సోమవారం ఎక్స్‌ వేదికగా ప్రశ్నించారు. కొడంగల్‌ నియోజకవర్గ పరిధిలోని కోస్గిలో మరణించిన బీఆర్‌ఎస్‌ కార్యకర్త కుటుంబాన్ని పరామర్శించేందుకు, అంత్యక్రియల్లో పాల్గొనేందుకు వెళ్తున్న మాజీ ఎమ్మెల్యే పట్నం నరేందర్‌రెడ్డిని పరిగి బహార్‌పేట్‌ చౌరస్తా వద్ద అరెస్ట్‌ చేయడం దుర్మార్గమని ఖండించారు. నరేందర్‌రెడ్డి అరెస్ట్‌ కాంగ్రెస్‌ ప్రభుత్వ అప్రజాస్వామిక, నిరంకుశ వైఖరికి నిదర్శనమని ధ్వజమెత్తారు.

కష్టాల్లో ఉన్న కార్యకర్త కుటుంబానికి భరోసానిచ్చేందుకు వెళ్తున్న నాయకుడిని నిర్బంధించాల్సిన అవసరం ఏమొచ్చిందని నిలదీశారు. ప్రజాపాలన పేరిట అధికారంలోకి వచ్చిన కాంగ్రెస్‌ సర్కార్‌ ప్రజాస్వామిక హక్కులు కాలరాస్తూ ప్రతిపక్ష నేతల గొంతునొక్కుతున్నదని మండిపడ్డారు. అక్రమ అరెస్ట్‌లు, కేసులు, నిర్బంధాలతో ప్రతిపక్షాలను భయభ్రాంతులకు గురిచేయడమే ప్రభుత్వ విధానంగా మార్చుకున్నదని తూర్పారబట్టారు. ప్రభుత్వ కక్ష సాధింపు, దుర్మార్గపు చర్యలకు బీఆర్‌ఎస్‌ భయపడబోదని తేల్చిచెప్పారు. తెలంగాణ ప్రజలు, పార్టీ కార్యకర్తల పక్షాన పోరాటం కొనసాగిస్తామని స్పష్టంచేశారు.