బర్డ్‌ ఫ్లూ నివారణకు స్వదేశీ టీకా!

19 November 2026 - 01:30
0 0
బర్డ్‌ ఫ్లూ నివారణకు స్వదేశీ టీకా!
01
  • భోపాల్‌లోని ఐసీఏఆర్‌ శాస్త్రవేత్తల సృష్టి
  • 20న ఆవిష్కరించనున్న కేంద్ర మంత్రి

హైదరాబాద్‌, నవంబర్‌ 18 (నమస్తే తెలంగాణ) : పౌల్ట్రీ పరిశ్రమ ఎదుర్కొంటున్న ‘బర్డ్‌ ఫ్లూ’ను నియంత్రించేందుకు కేంద్ర ప్రభుత్వం సరికొత్త దేశీయ వ్యాక్సిన్‌ను అందుబాటులోకి తెస్తున్నది. ఈ వైరస్‌ బారి నుంచి పౌల్ట్రీ రంగాన్ని రక్షించడానికి ఈనెల 20న కేంద్రప్రభుత్వం దీనిని జాతికి అంకితం చేయనుంది. స్వదేశీ పరిజ్ఞానంతో రూపొందించిన మొట్టమొదటి టీకా ఇది. మధ్యప్రదేశ్‌ భోపాల్‌లోని ఐసీఏఆర్‌- నేషనల్‌ ఇన్‌స్టిట్యూట్‌ ఆఫ్‌ హై సెక్యూరిటీ యానిమల్‌ డిసీజెస్‌ దీన్ని అభివృద్ధి చేసింది. ఇన్‌ యాక్టివేటెడ్‌ హెచ్‌5ఎన్‌1 (క్లాడ్‌ 2.3.2.1ఏ) హైలీపాథజెనిక్‌ ఏవియన్‌ ఇన్ఫ్లూయెంజా వ్యాక్సిన్‌ను ఐసీఏఆర్‌ అభివృద్ధి చేసింది. ఈ టీకాను కేంద్ర వ్యవసాయ, గ్రామీణాభివృద్ధి శాఖ మంత్రి శివరాజ్‌సింగ్‌ చౌహాన్‌ భోపాల్‌లో ఆవిషరించనున్నారు. ఇప్పటివరకు దేశంలో కోళ్లకు సోకుతున్న బర్డ్‌ ఫ్లూ కేసుల్లో అత్యధికం హెచ్‌5ఎన్‌1 వైరస్‌ లోని క్లేడ్‌ 2.3.2.1ఏ స్ట్రెయిన్‌కు చెందినవే. ఈ రకం వైరస్‌ కేసులే దేశంలో అత్యధికంగా నమోదవుతున్నాయి. ప్రస్తుతం అంతర్జాతీయంగా కూడా ఈ స్ట్రెయిన్‌ను అడ్డుకోవడానికి ప్రత్యేకంగా ఎలాంటి వ్యాక్సిన్‌ కూడా అందుబాటులో లేదు. దీంతో ఐసీఏఆర్‌ దీనిని అభివృద్ధి చేసింది.

పౌల్ట్రీ పరిశ్రమకు ఎంతో మేలు

బర్డ్‌ ఫ్లూ నివారణకు కొత్తగా వ్యాక్సిన్‌ అందుబాటులోకి రావడం పట్ల పౌల్ట్రీ ఇండియా అధ్యక్షుడు ఉదయ్‌సింగ్‌ బయాస్‌, తెలంగాణ పౌల్ట్రీ ఫార్మర్స్‌ అసోసియేషన్‌ అధ్యక్షుడు మోహన్‌రెడ్డి హర్షం వ్యక్తం చేశారు. బర్డ్‌ ఫ్లూ వైరస్‌ కోళ్లకు సోకినప్పుడు వ్యాధి తీవ్రత పెరిగి దాదాపు 100 శాతం వరకు మరణాలు సంభవించేవని, వైరస్‌ ఇతర ప్రాంతాలకు విస్తరించకుండా అరికట్టడానికి కోళ్లను సామూహిక సమాధి చేయాల్సి వచ్చేదన్నారు. దీనివల్ల పౌల్ట్రీ రైతులకు తీరని నష్టం వాటిల్లేదన్నారు. ఒకవేళ బర్డ్‌ ఫ్లూ అదుపు తప్పి విసృ్తతంగా వ్యాపిస్తే.. మొత్తం కోళ్లలో 20 శాతానికి పైగా నాశనం అయ్యేవన్నారు. దీని ప్రభావం స్థూల జాతీయోత్పత్తి వృద్ధిని సైతం దెబ్బకొడుతుందన్నారు. 2006లో సంభవించిన బర్డ్‌ ఫ్లూ వల్ల దేశంలో దాదాపు 3,000 కోట్ల రూపాయల వరకు ప్రత్యక్ష, పరోక్ష నష్టం వాటిల్లిందని ఉదయ్‌సింగ్‌ వెల్లడించారు. బర్డ్‌ ఫ్లూ కోళ్లు, ఇతర పక్షులకే కాకుండా ప్రజారోగ్యానికి కూడా సవాల్‌గా మారుతున్నదన్నారు. ఈ వ్యాక్సిన్‌ పూర్తిస్థాయిలో అందుబాటులోకి వస్తే పౌల్ట్రీ పరిశ్రమలో స్థిరత్వం ఏర్పడుతుందని భావిస్తున్నట్లు తెలిపారు. కోడిమాంసం, గుడ్ల ధరల పెరుగుదలను కూడా అరికట్టే అవకాశాలుంటాయని బయాస్‌ పేర్కొన్నారు.

Comments (0)

User