అవినీతికి కేరాఫ్ హస్తం పాలన!

ఎన్నికల సమయంలో అవినీతిరహిత పాలన, పారదర్శక పరిపాలన, ప్రజలకు జవాబుదారీతనం అంటూ గొప్పగొప్ప ఆదర్శాలు ప్రకటించిన కాంగ్రెస్ నాయకత్వం ఇప్పుడు తన సొంత పార్టీ ప్రజాప్రతినిధుల నుంచే అవినీతి ఆరోపణలు ఎదుర్కొంటున్నది. ప్రభుత్వ యంత్రాంగంలో కమీషన్ల దందా యథేచ్ఛగా సాగుతున్నదని సొంతపార్టీ నేతలు బహిరంగంగా ఆరోపిస్తుండటం గమనార్హం. జడ్చర్ల కాంగ్రెస్ ఎమ్మెల్యే అనిరుధ్ రెడ్డి తాజాగా చేసిన వ్యాఖ్యలు రాష్ట్రంలో అవినీతి ఏ స్థాయికి చేరిందనే విషయాన్ని మరోసారి బయటపెట్టింది.
ప్రభుత్వ కార్యాలయాల్లో చిన్నచిన్న పనులు చేయించుకోవడానికి సైతం లంచాలు ఇవ్వాల్సిన పరిస్థితి నెలకొన్నదని ఆయన ఆరోపించారు. బిల్లులు క్లియర్ చేయడానికి కాంట్రాక్టర్ల నుంచి 10 నుంచి 20 శాతం వరకు కమీషన్లు డిమాండ్ చేస్తున్నారని వెల్లడించారు. కేవలం రూ.5 లక్షల సిమెంట్ రోడ్డు పనికి సంబంధించిన బిల్లులోనే మెజర్మెంట్ బుక్లో కొలతలు నమోదు చేయడానికి 10 నుంచి 20 శాతం కమీషన్ అడుగుతున్నారని పేర్కొనడం పరిస్థితి తీవ్రతకు అద్దం పడుతున్నది. ఒక వ్యక్తి పని చేయడానికి నిరాకరించిన అధికారి అదే వ్యక్తి రూ.15 వేలు చెల్లిస్తే పని పూర్తిచేశారని కూడా ఎమ్మెల్యే ఆరోపించారు. పైస్థాయిలో ముఖ్యనేత ఢిల్లీకి మూటలు మోస్తుంటే, కిందిస్థాయిలో కలెక్షన్ల దందా యథేచ్ఛగా కొనసాగుతున్నదన్నమాట.
రాష్ట్రంలో అవినీతి పరిస్థితిని అర్థం చేసుకోవడానికి అవినీతి నిరోధక శాఖ (ఏసీబీ) గణాంకాలను పరిశీలిస్తే ఆందోళనకరమైన దృశ్యం కనిపిస్తుంది. 2025లో ఏసీబీ మొత్తం 199 కేసులు నమోదు చేసి 273 మందిని అరెస్టు చేసింది. ఆదాయానికి మించిన ఆస్తుల కేసులు 15 నమోదు కాగా, ఇతర అక్రమ కార్యకలాపాలకు సంబంధించి మరో 26 కేసులు నమోదయ్యాయి. ఈ కేసుల్లో గుర్తించిన అక్రమ ఆస్తుల విలువ రూ.96 కోట్లకు పైగానే ఉంది. 2024లో 154 కేసుల్లో 223 మందిపై చర్యలు తీసుకోగా, 2025లో కేసుల సంఖ్య 199కు, అరెస్టుల సంఖ్య 273కు పెరిగింది. అంటే కేసుల్లో 29 శాతానికి పైగా, అరెస్టుల్లో 22 శాతానికి పైగా పెరుగుదల నమోదైంది. 2026 జూలై 10 నాటికే 14 ఆదాయానికి మించిన ఆస్తుల కేసులు, 86 లంచం కేసులు నమోదయ్యాయి. 2025లో నమోదైన మొత్తం కేసులకు చెందిన ఆస్తులకు దాదాపు సమాన విలువ కలిగిన కేసులు కేవలం ఆరు నెలల్లోనే నమోదయ్యాయి. అవినీతి ఆరోపణలపై అరెస్టయిన దాదాపు 60 మంది ప్రభుత్వ ఉద్యోగులు ప్రస్తుతం జ్యుడీషియల్ రిమాండ్లో ఉన్నట్టు గణాంకాలు తెలుపుతున్నాయి.
అధికార పార్టీ ఎమ్మెల్యేలు, మంత్రుల అవినీతిపైనా విమర్శలు వస్తున్నాయి. 2025 మార్చిలో కాంట్రాక్టర్ల బిల్లుల చెల్లింపుల విషయంలో కమీషన్లు డిమా్ండ చేస్తున్నారంటూ ఆరోపణలు వెల్లువెత్తాయి. డిప్యూటీ సీఎం భట్టి విక్రమార్క కార్యాలయం ఎదుట కాంట్రాక్టర్లు నిరసనకు దిగిన ఘటన కూడా అప్పట్లో చర్చనీయాంశమైంది. రాష్ట్ర ఆర్థిక సంఘం కార్యాలయంలో కాంట్రాక్టర్ల పెండింగ్ బిల్లులు చెల్లించడానికి 9 నుంచి 12 శాతం వరకు కమీషన్లు అడుగుతున్నారంటూ తెలంగాణ సర్పంచుల సంఘం జాయింట్ యాక్షన్ కమిటీ ఏసీబీకి ఫిర్యాదు చేసింది. గ్రామీణాభివృద్ధికి నిధులివ్వలేని ప్రభుత్వం, ఉన్న నిధులను విడుదల చేయడానికి కూడా కమీషన్లు అడుగుతున్నదనే విమర్శలు రావడం దురదృష్టకరం.
అభివృద్ధి అంటే భారీ ప్రకటనలు, అంతర్జాతీయ సదస్సులు, ప్రచార ఆర్భాటాలు మాత్రమే కాదు. ప్రతి రూపాయి ప్రజలకు ఉపయోగపడేలా ఖర్చు చేయడమే నిజమైన అభివృద్ధి. కానీ కాంట్రాక్టర్ల నుంచి కమీషన్లు వసూలు చేస్తూ, చిన్న పనులకు కూడా లంచాలు డిమాండ్ చేస్తూ, అధికార యంత్రాంగాన్ని రాజకీయ ప్రయోజనాలకు ఉపయోగిస్తే ప్రజాపాలన ఎలా అవుతుంది? అవినీతి ఆరోపణలపై సర్కార్ తక్షణమే ఉన్నతస్థాయి విచారణ ఏర్పాటు చేయాలి. మంత్రులు, ఎమ్మెల్యేలపై వస్తున్న ఆరోపణలను రాజకీయాలకు అతీతంగా విచారించాలి. అవినీతిని ప్రశ్నించిన వారిపై రాజకీయ కక్ష సాధింపు చర్యలకు పాల్పడకుండా, ఆరోపణలు చేసినవారిని బెదిరించకుండా, వాస్తవాలను ప్రజల ముందుంచాలి. సొంత పార్టీ ఎమ్మెల్యేలే ప్రభుత్వ యంత్రాంగంలోని అవినీతిని బహిర్గతం చేస్తున్నప్పుడు కూడా కళ్లు మూసుకుంటే ప్రజలు క్షమించరు.
Comments (0)