కల్పనాచావ్లా స్ఫూర్తితో కథ రాసుకున్నా!

‘ప్రస్తుతం సమాజంలో నెగెటివిటీ పెరిగిపోయింది. ఈ సినిమా చూసిన తర్వా త మనజీవితంలో కూడా కృష్ణలాం టి ఓ వ్యక్తి ఉంటే ఎంత బాగుంటుందో అని ప్రేక్షకులు అనుకుంటారు’ అన్నారు దర్శకుడు పవన్ సాధినేని. ఆయన నిర్ధేశకత్వంలో దుల్కర్ సల్మాన్, సాత్విక వీరవల్లి జంటగా నటించిన ‘ఆకాశంలో ఒక తార’ చిత్రం ఈ నెల 20న ప్రేక్షకుల ముందుకురానుంది. ఈ సందర్భంగా బుధవారం దర్శకుడు పవన్సాధినేని విలేకరులతో సినిమా విశేషాలను పంచుకున్నారు.
వ్యోయగామి కావాలనే ఓ అమ్మాయి కలను సాకారం చేసేందుకు కృష్ణ అనే వ్యక్తి ఎలాంటి ప్రయత్నాలు చేశాడన్నదే చిత్ర కథాంశమని తెలిపారు. ప్రతీ ఒక్కరి జీవితంలో ఆశను చిగురింపజేసే కథ ఇదని పేర్కొన్నారు. ‘ఇది యూనివర్సల్ కథ. అన్ని భాషల వారికి కనెక్ట్ అవుతుంది. ఈ సినిమా కోసం రెండేళ్లపాటు పరిశోధన చేశా. ఇస్రో శాస్త్రవేత్తలు, ప్రొఫెసర్లను కలిసి వాళ్ల సలహాలను తీసుకున్నా. దాదాపు ఏడాదిన్నర ప్రీప్రొడక్షన్స్కే పట్టింది’ అని చెప్పారు. కరోనా లాక్డౌన్ టైంలో కల్పనా చావ్లా బయోగ్రఫీ చదువుతున్నప్పుడే ఈ కథకు బీజం పడిందని పవన్సాధినేని తెలిపారు. ‘ఆ పుస్తకం చదువుతున్నప్పుడు కల్పనా చావ్లా ప్రయాణం కంటే ఆమెపై భర్తకు ఉన్న ప్రేమ నన్ను ఎక్కువగా ఆకట్టుకుంది. అదే స్ఫూర్తితో ఈ కథ తయారు చేశా’ అని ఆయన వివరించారు.
Comments (0)