చెట్టు కూలి..టెకీ మృతి

19 November 2026 - 01:30
0 0
చెట్టు కూలి..టెకీ మృతి
Stud
  • బైక్‌పై వెళ్తుండగా కూలిన ఎండిన వృక్షం..
  • ప్రమాదంలో మరో ఇద్దరికి గాయాలు
  • నెల రోజుల కిందటే మృతుడికి వివాహం
  • నాగోల్‌ పోలీస్‌ స్టేషన్‌ పరిధిలో ఘటన

మన్సూరాబాద్‌, నవంబర్‌ 18: ఒక్క క్షణంలో జరిగిన విషాద సంఘటన ఓ కుటుంబాన్ని కుదిపేసింది… ఎండిన చెట్టు రూపంలో వచ్చిన మృత్యువు ఎంతో ఉన్నత భవిష్యత్తు ఉన్న ఓ సాఫ్ట్‌వేర్‌ ఉద్యోగి జీవితాన్ని కబళించి వేసింది… నెల రోజుల క్రితమే పెళ్లి జరిగిన అతడి జీవితాన్ని రోడ్డు పక్కన ఎండిపోయి ఉన్న చెట్టు అర్ధాంతరంగా ముగించి ఆ కుటుంబాన్ని, నవ వధువును కన్నీటి సముద్రంలో ముంచెత్తింది… ఈ విషాదకరమైన సంఘటన నాగోల్‌ పోలీస్‌స్టేషన్‌ పరిధిలో జరిగింది.

ఇన్‌స్పెక్టర్‌ మక్బూల్‌ జానీ కథనం ప్రకారం.. ఏపీ, రాజోలుకు చెందిన సాయికుమార్‌ (29) నాలుగు సంవత్సరాల క్రితం నగరానికి వచ్చి నాగోల్‌, హిందూ అరణ్య ఎదురుగా ఉండే వెంకటేశ్వర కాలనీలో నివాసముంటున్నాడు. ఇన్ఫోసిస్‌లో సాఫ్ట్‌వేర్‌ ఉద్యోగిగా పని చేస్తున్నాడు. సాయికుమార్‌కు నెల రోజుల క్రితమే వివాహం జరిగింది. గ్యాస్‌ బుక్‌ చేయడానికి హిందూ అరణ్యలో నివాసముండే తన బాబాయ్‌ పి. రాధాక్రిష్ణ (48), అతని కుమారుడు సత్య (10)తో కలిసి సాయికుమార్‌ బైక్‌పై బుధవారం సాయంత్రం 4 గంటలకు గౌ రెళ్లి వైపు వెళ్తున్నాడు. కుంట్లూరు, డబుల్‌ బెడ్‌రూమ్‌ ఇండ్ల సముదాయాల సమీపంలోకి వెళ్లగానే రోడ్డు పక్కన ఎండిపోయిన ఉన్న ఓ పెద్ద చెట్టు అకస్మాత్తుగా బైక్‌పై పడిపోయింది.

చెట్టు కూలి సాయికుమార్‌ తల మీద పడటంతో అతను అక్కడికక్కడే మృతి చెందాడు. బైక్‌పై ఉన్న మృతుడి బాబాయ్‌ రాధాక్రిష్ణ, అతడి కుమారుడు సత్యలకు స్వల్ప గాయాలయ్యాయి. సాయికుమార్‌ మరణవార్త విని ఘటనా స్థలానికి చేరుకున్న అతడి భార్య, భర్త విగతజీవిగా మారి పడి ఉండటాన్ని చూసి కన్నీరు మున్నీరైంది. ఘటనా స్థలానికి చేరుకున్న నాగోల్‌ పోలీసులు సాయికుమార్‌ మృతదేహాన్ని పోస్టుమార్టం నిమిత్తం ఉస్మానియా దవాఖానకు తరలించారు.

Comments (0)

User