తిరగబడిన సాస్‌ తౌతోనికుంట స్కెచ్

21 November 2026 - 03:00
0 1
తిరగబడిన సాస్‌ తౌతోనికుంట స్కెచ్
Rera
  • ‌3.17ఎకరాల ప్రభుత్వ భూమికి మూసుకుపోయిన దారి
  • రంగంలోకి దిగిన హైడ్రా అధికారులు..చెరువు చుట్టూ ప్రహరీ నిర్మాణం
  • రహదారి లేకపోవడంతోనే సాస్‌ ఐటవర్‌ ప్రాజెక్టులో డిజైన్‌ మార్పు
  • ప్రభుత్వ భూమిని కలుపుకొని టవర్‌-బీని ప్రత్యేక ప్రాజెక్టుగా చేసే కుట్ర
  • తద్వారా సర్కార్‌ భూమికి సాస్‌ ఐటవర్‌ ప్రాజెక్టులోని రోడ్డు వినియోగం
  • వాస్తవాలు తెలిసినా గుడ్డిగా మున్సిపల్‌ అనుమతులు… రెరా మద్దతు

ఒక అక్రమాన్ని అమలు చేసేందుకు ఇంకో అక్రమం… ఓ అక్రమాన్ని సరి చేయగానే బదులుగా ఇంకో అక్రమం… ఏమిటీ అక్రమాల లొల్లి అనుకుంటున్నారా?! సాస్‌ ఇన్‌ఫ్రా తంటాలు, ప్రభుత్వ విభాగాల తీరు చూస్తుంటే ఇలాంటి పదాలే వస్తాయి. అసలే సుమారు రూ.680 కోట్లకు పైగా విలువైన సర్కార్‌ భూమి అక్రమంగా బదలాయింపు…ఆపై తౌతోనికుంటలో నుంచి రహదారి నిర్మాణం… వీటన్నింటికీ మున్సిపల్‌ అధికారుల అనుమతులు. ఈ అక్రమాల పరంపరకాస్తా బయటపడి తీవ్రస్థాయిలో వ్యతిరేకత వ్యక్తమవుతుండటంతో ఎట్టకేలకు హైడ్రా యూటర్న్‌ తీసుకుంది. అప్పటిదాకా సాస్‌ ఇన్‌ఫ్రా రహదారి కోసం తెర వెనక చేస్తున్న ప్రయత్నాన్ని విరమించుకొని చెరువు రక్షణకు ఉపక్రమించింది. ప్రభుత్వ భూమికి శరణ్యంగా మారిన చెరువులోని రోడ్డును మూసివేసి చుట్టూ ప్రహరీ నిర్మించింది. దీంతో దారి మూసుకుపోయిన సాస్‌ ఇన్‌ఫ్రా మరో దారి వెతుక్కుంది.

నవంబర్‌ 20 (నమస్తే తెలంగాణ): ఈసారి ఏకంగా పాత ప్లాన్‌లో భాగంగా నిర్మించాల్సిన హోటల్‌ను కట్టకుండా దానిని కూడా వాణిజ్య టవర్‌గా మార్చడంతో పాటు ప్రభుత్వ భూమిని అందులో కలిపి కొత్త ప్రాజెక్టుగా చిత్రీకరించేందుకు రెరాకు దరఖాస్తు చేసుకుంది. ఇదీ… రెండు రోజుల కిందట రెరా అధికారులు సాస్‌ ఐటవర్‌ కొనుగోలుదారులకు ఇచ్చిన బహిరంగ నోటీసు వెనక ఉన్న భారీ వ్యూహం. అక్రమంగా పొందిన ప్రభుత్వ భూమిలో ఆకాశహర్మ్యాలు నిర్మించి అమాయకులకు వాటిని అంటగట్టి కోట్లు గడించేందుకు సాస్‌ ఇన్‌ఫ్రా ఆడుతున్న సరికొత్త డ్రామా. దీనికి ప్రభుత్వ విభాగాలన్నీ అండగా నిలిచేందుకు పోటీ పడుతుండటమే ఇక్కడ అత్యంత విచారకరమైన విషయం. సిటీబ్యూరో ప్రధాన ప్రతినిధి,

రంగారెడ్డి జిల్లా శేరిలింగంపల్లి మండలం ఖాజాగూడ సర్వేనంబరు 20/1లోని 3.17 ఎకరాల ప్రభుత్వ భూమి ధారాదత్తం అందరికీ తెలిసిన విషయమే. బీఆర్‌ఎస్‌ హయాంలో నిర్మాణ పనుల కోసం సాస్‌ ఇన్‌ఫ్రా ఈ భూమిని లీజుకు తీసుకొని… కాంగ్రెస్‌ ప్రభుత్వం వచ్చిన తర్వాత ఏకంగా భూభారతిలో రాత్రికి రాత్రి కంపెనీ పేరిట బదలాయించుకున్న అక్రమ తంతును కూడా బీఆర్‌ఎస్‌, నమస్తే తెలంగాణ గతంలోనే వెలుగులోకి తెచ్చింది. ఈ క్షణానికి కూడా 22ఏ నిషేధిత జాబితాలో… పైగా భూభారతి వెబ్‌సైట్‌లో సాస్‌ ఇన్‌ఫ్రా పేరుతోనే ఉండి ప్రభుత్వ భూమిగా నమోదైన 3.17 ఎకరాల భూమిలో రియల్‌ వ్యాపారం చేసేందుకు ఆ కంపెనీ గత కొంతకాలంగా ప్రభుత్వ విభాగాలన్నింటినీ ఇష్టానుసారంగా వాడుకుంటున్నది. వాస్తవానికి ఆ భూమికి రోడ్డు లేకపోవడంతో పక్కనే ఉన్న తౌతోనికుంటలో 60 అడుగుల మట్టి రోడ్డు వేసి డాక్యుమెంట్లలో దానిని వంద ఫీట్ల రోడ్డు హద్దుగా చూపింది. పైగా దానిని 2007-08లో చెరువు మధ్యలో అధికారికంగా వేసిన గ్రీన్‌గ్రేస్‌ అపార్టుమెంట్‌ వంద ఫీట్ల రహదారికి అనుసంధానించేందుకు హైడ్రాను కూడా రంగంలోకి దించింది. చివరకు అపార్టుమెంట్‌వాసులు హైకోర్టును ఆశ్రయించడంతో హైడ్రా దూకుడుకు కళ్లెం పడినట్లయింది. ఈలోగా అక్రమాల గుట్టు అంతా బయటికి రావడంతో చివరకు హైడ్రా రూటు మార్చింది. సాస్‌ ఇన్‌ఫ్రా ఏ తంటాలైనా పడనీ అనుకొని ఎట్టకేలకు తౌతోనికుంట పరిరక్షణలో భాగంగా చుట్టూ ప్రహరీ గోడ నిర్మించింది. దీంతో సాస్‌ ఇన్‌ఫ్రా అక్రమంగా పొందిన 3.17 ఎకరాల ప్రభుత్వ భూమికి ఇప్పుడు దారి అనేదే లేకుండా పోయింది.

Rera2

రహదారి కోసమే పాత ప్రాజెక్టులో కొత్త డ్రామా

సాస్‌ ఇన్‌ఫ్రా 2019లో జీహెచ్‌ఎంసీ అనుమతి పొందిన సాస్‌ ఐ టవర్‌లో ఏ, సీ టవర్లు వాణిజ్య భవనాలు. బీ టవర్‌లో హిల్టన్‌ హోటల్‌ కట్టాలి. ఇప్పుడు అక్రమంగా పొందిన 3.17 ఎకరాల ప్రభుత్వ భూమికి రహదారి లేకపోవడంతో ఆ పాత ప్రాజెక్టు డిజైన్‌ను మారుస్తున్నారు. అందులో బీ టవర్‌లో హోటల్‌ కట్టకుండా దానిని కూడా వాణిజ్య భవనంగా మార్చేందుకు నిర్ణయించి… దానిని అందులో నుంచి విభజించి, కొత్త ప్రాజెక్టుగా గుర్తించాలని రెరాకు దరఖాస్తు చేసుకున్నారు. ఇందుకోసం రెరా రెండు రోజుల కిందట ఏ, సీ టవర్లలో కొనుగోలు చేసిన వారికి బహిరంగ నోటీసు ఇచ్చి దీనిపై ఏమైనా అభ్యంతరాలుంటే ఏడు రోజుల్లో తెలపాలని సూచించింది. ఈ రెండు రోజుల్లోనే పెద్ద ఎత్తున అభ్యంతరాలు వచ్చినట్లు విశ్వసనీయంగా తెలిసింది. కానీ రెరా వాటిని పరిగణలోనికి తీసుకుంటుందా? లేకపోతే 2/3 మెజార్టీ ఉందని రాత్రికి రాత్రి అనుమతులు ఇస్తుందా? అనే దానిపై అనేక అనుమానాలు వ్యక్తమవుతున్నాయి.

అయితే సాస్‌ ఇన్‌ఫ్రా ఈ కొత్త ప్రాజెక్టు నాటకం ఆడటం వెనక 3.17 ఎకరాల ప్రభుత్వ భూమికి రహదారిని ఏర్పాటు చేసేందుకే అనేది తేటతెల్లమవుతున్నది. పాత డిజైన్‌లోని ఏ, సీ టవర్లతో పాటు బీ టవర్‌కు కూడా బాజాప్తా ఖాజాగూడ-నానక్‌రాంగూడ మెయిన్‌ రోడ్డు రహదారిగా ఉంది. ఇందుకోసం టవర్‌ ప్రాజెక్టులో నుంచి రెండు ఎగ్జిట్‌లను ఏర్పాటు చేసినట్లు తెలిసింది. ఇప్పుడు ఏ, సీ టవర్లకు ఒక ఎగ్జిట్‌ను వాడి, ప్రత్యేక ప్రాజెక్టుగా గుర్తించాలంటున్న బీ టవర్‌కు మరో ఎగ్జిట్‌ను వాడాలనే ప్రణాళిక రూపొందించినట్లు ప్రచారం జరుగుతున్నది. తద్వారా బీ టవర్‌లో వెనక ఉన్న 3.17 ఎకరాల ప్రభుత్వ భూమిని కూడా చేర్చి నిర్మాణ అనుమతులు తీసుకునేందుకు స్కెచ్‌ వేసినట్లు చెబుతున్నారు. తద్వారా బీ టవర్‌ను వాణిజ్య టవర్‌గా మార్చి విక్రయించుకోవడంతో పాటు అసలు రోడ్డులేని 3.17 ఎకరాల ప్రభుత్వ భూమికి రోడ్డు, అనుమతులు వచ్చేలా మార్గం సుగమం చేసినట్లవుతుందనే మాస్టర్‌ప్లాన్‌ రచించారని పలువురు చెబుతున్నారు.

ఒకవేళ టవర్‌-బీను ప్రత్యేక ప్రాజెక్టుగా గుర్తించకపోతే 3.17 ఎకరాల ప్రభుత్వ భూమిని కలపడంతో పాటు సాస్‌ టవర్‌లో నుంచి రహదారిని వినియోగించేందుకు ఏ, సీ టవర్లలోని కొనుగోలుదారుల అంగీకారం కావాలి. అందుకే ప్రత్యేక ప్రాజెక్టుగా రెరా నుంచి అనుమతి తీసుకుంటే టవర్‌-బీకి ఉండే వసతులన్నింటినీ 3.17 ఎకరాల ప్రభుత్వ భూమిలోని నిర్మాణాలకు అమలు చేసే వెసులుబాటు వస్తుందని పలువురు వ్యాఖ్యానిస్తున్నారు. అందుకే ఈ మాస్టర్‌ప్లాన్‌ను అమలు చేస్తున్నారని సాస్‌ ఐటవర్‌లోని కొనుగోలుదారులే కొందరు వ్యాఖ్యానిస్తున్నారు.

Comments (0)

User