కృత్రిమ మేధతో భద్రం: ఐఆర్డీఏఐ

ముంబై, నవంబర్ 20: దేశీయ బీమా రంగంలో దాదాపు 85 శాతం కంపెనీలు కృత్రిమ మేధస్సు (ఏఐ)ను వాడుతున్నాయని భారత బీమా నియంత్రణ, అభివృద్ధి ప్రాధికార సంస్థ (ఐఆర్డీఏఐ) స్పష్టం చేసింది. అయితే ఈ సాంకేతికతకు స్థానిక పరిస్థితులకు అనుగుణంగా శిక్షణ ఇవ్వడంతోపాటు కీలక నిర్ణయాలపై మనుషుల నియంత్రణ ఉండేలా చూడాలని ఐఆర్డీఏఐ చైర్మన్ అజయ్ సేథ్ ఇన్సూరర్లకు సూచించారు.
సెబీ మాజీ చైర్మన్ ఎం డామోదరన్ నిర్వహించిన గేట్కీపర్స్ ఆఫ్ గవర్నెన్స్ 2026 కార్యక్రమంలో సేథ్ మాట్లాడారు. బ్యాంకులు బీమా ఉత్పత్తులను విక్రయించడం, ఆటోమొబైల్ డీలర్లు బీమా పంపిణీతోపాటు వాహనాల మరమ్మతు సేవలను అందించడం వల్ల ప్రయోజనాలు దెబ్బతినే అవకాశం ఉన్నదని చెప్పారు. ఈ క్రమంలోనే బీమా పాలసీల రిస్క్ అంచనా, క్లెయిమ్ల పరిష్కారంలో ఏఐ విస్తృత వినియోగంతో వచ్చే ముప్పులను కూడా ప్రస్తావించారు. కాగా, హెల్త్ ఇన్సూరెన్స్ క్లెయిమ్లలో పారదర్శకత పెంచేందుకు 10 రోజుల్లో 2 కార్యబృందాలను ఏర్పాటు చేయాలని ఐఆర్డీఏఐ యోచిస్తున్నట్టు సేథ్ తెలిపారు.
Comments (0)