తగ్గిన విదేశీ మారక నిల్వలు

ముంబై, నవంబర్ 20: విదేశీ మారకం నిల్వలు మళ్లీ కరిగిపోయాయి. ఈ నెల 13తో ముగిసిన వారాంతానికిగాను ఫారెక్స్ రిజర్వులు 14.205 బిలియన్ డాలర్లు తరిగిపోయి 705.342 బిలియన్ డాలర్లకు పడిపోయినట్టు రిజర్వుబ్యాంక్ తన వారాంతపు సమీక్షలో వెల్లడించింది. అంతకుముందు వారంలో రిజర్వులు 2.49 బిలియన్ డాలర్లు పెరిగిన విషయం తెలిసిందే. నిల్వల్లో ప్రధాన భాగమైన విదేశీ కరెన్సీ రూపంలో ఆస్తుల విలువ 7.897 బిలియన్ డాలర్లు తగ్గి 583.452 బిలియన్ డాలర్లకు చేరాయని రిజర్వ్ బ్యాంక్ విడుదల చేసిన గణాంకాలు తెలిపాయి. డాలర్లలో లెక్కించే విదేశీ కరెన్సీ ఆస్తుల్లో, విదేశీ మారక నిల్వల్లో యూరో, పౌండ్, యెన్ వంటి అమెరికాయేతర కరెన్సీ విలువ పెరగడం లేదా తగ్గడం ప్రభావం పడిందని రిజర్వుబ్యాంక్ తెలిపింది. బంగారం నిల్వల విలువ ఆ వారంలో గణనీయంగా 6.183 బిలియన్ డాలర్లు తగ్గి 98.613 బిలియన్ డాలర్లకు పడిపోయిందని పేర్కొంది.
Comments (0)