కేసీఆర్‌ పేరెత్తే అర్హతే నీకు లేదు

21 November 2026 - 03:00
0 0
కేసీఆర్‌ పేరెత్తే అర్హతే నీకు లేదు
01
  • కేటీఆర్‌, హరీశ్‌రావుపై వ్యక్తిగత విమర్శలేంది?
  • అమరుల త్యాగాలు ఆత్మకథలో ఎందుకు లేవు
  • రేవంత్‌ వ్యాఖ్యలపై  మాజీ ఎమ్మెల్యే రసమయి ఆగ్రహం

హైదరాబాద్‌, నవంబర్‌ 20 (నమస్తే తెలంగాణ) : పదవులను తృణప్రాయంగా త్యాగంచేసి, ప్రాణాలను పణంగా పెట్టి 14 ఏండ్లపాటు తెలంగాణ ఉద్యమాన్ని నడిపి విజయం సాధించిన తెలంగాణ తొలి ముఖ్యమంత్రి, బీఆర్‌ఎస్‌ అధినేత కేసీఆర్‌ పేరెత్తే అర్హత కూడా సీఎం రేవంత్‌రెడ్డికి లేదని మాజీ ఎమ్మెల్యే, బీఆర్‌ఎస్‌ నేత రసమయి బాలకిషన్‌ స్పష్టంచేశారు. గులాబీ కండువా కప్పి రాజకీయంగా అవకాశాలు కల్పించిన చరిత్రను మరిచి ఇప్పుడు కేసీఆర్‌పైనే విమర్శలకు దిగడమేంది? అని నిలదీశారు. సిద్దిపేట సభలో కేసీఆర్‌పై సీఎం చేసిన అనుచిత వ్యాఖ్యలను ఆయన తీవ్రంగా ఖండించారు. ముఖ్యమంత్రి హోదాలో ఉన్న వ్యక్తి మాట్లాడే భాష, వ్యవహరించే తీరు హుందాగా ఉండాలని హితవు పలికారు. తెలంగాణ భవన్‌లో శుక్రవారం ఆయన మీడియాతో మాట్లాడారు. చరిత్ర పుటల్లో కేసీఆర్‌కు ఉన్న స్థానాన్ని ఎవరూ చెరిపివేయలేరని, అలాంటి నేతపై నీచమైన వ్యాఖ్యలు చేయడం ఆయన కుసంస్కారానికి నిదర్శనమని మండిపడ్డారు.

కరువు వేళ సభలేంది?

రాష్ట్ర ఆర్థిక పరిస్థితి బాగోలేదని చెప్తూనే మరోవైపు ప్రజాధనం వృథా చేస్తూ వరుసగా సభలు నిర్వహించడం ఏందని రసమయి బాలకిషన్‌ ప్రశ్నించారు. ప్రజా సమస్యలపై మాట్లాడాల్సిన ముఖ్యమంత్రి.. కేటీఆర్‌, హరీశ్‌రావుపై వ్యక్తిగత విమర్శలకు దిగడమేందని ప్రశ్నించారు. సిద్దిపేట, సిరిసిల్ల నియోజకవర్గాలు అభివృద్ధికి చిరునామాలుగా నిలిచాయని పేరొన్నారు. రాజకీయ విమర్శలతో తెలంగాణ చరిత్రను వక్రీకరించడం, ఉద్యమ నాయకులను అవమానించడం ఇప్పటికైనా మానుకోవాలని హితవు పలికారు. సమావేశంలో బీఆర్‌టీయూ ప్రెసిడెంట్‌ రాంబాబుయాదవ్‌, పార్టీ నాయకుడు బానోత్‌ రవి కుమార్‌నాయక్‌ పాల్గొన్నారు.

Comments (0)

User