గులాబీ ఫుల్‌ ఖుష్‌.. ‘రైతు గర్జన’కు సునామీలా తరలివచ్చిన అశేషజనం

• విజయవంతం కావడంతో బీఆర్‌ఎస్‌ శ్రేణుల్లో జోష్‌
• కేటీఆర్‌ పంచ్‌లకు యువకుల కేరింతలతో దద్దరిల్లిన సభా ప్రాంగణం
• రేవంత్‌రెడ్డి రైతాంగానికి ఇచ్చిన హామీలపై పవర్‌ పాయింట్‌పై జోరుగా చర్చ
• సోషల్‌ మీడియాలో వైరల్‌గా మారిన కేటీఆర్‌ ప్రసంగంలోని కీలక వ్యాఖ్యలు

నిర్మల్‌, నవంబర్‌ 12(నమస్తే తెలంగాణ) : నిర్మల్‌ గడ్డపై గులాబీ గర్జన మోగింది. రైతు సమస్యలపై కాంగ్రెస్‌ ప్రభుత్వాన్ని నిలదీసేందుకు బీఆర్‌ఎస్‌ నిర్వహించిన రైతు గర్జన మహాసభకు జిల్లా నలుమూలల నుంచి ప్రజలు భారీగా తరలివచ్చారు. పల్లెలు, పట్టణాలు అన్న తేడా లేకుండా రైతులు, యువకులు, పార్టీ శ్రేణులు పెద్ద సంఖ్యలో హాజరుకావడంతో నిర్మల్‌ పట్టణం జనసంద్రంగా మారింది. ఎన్టీఆర్‌ మినీ స్టేడియం సభా ప్రాంగణం కిక్కిరిసిపోగా.. లోపల చోటు దొరకక వేలాది మంది ప్రజలు రోడ్లపై నిలబడి కేటీఆర్‌ ప్రసంగాన్ని ఆసక్తిగా విన్నారు. బీఆర్‌ఎస్‌ రాష్ట్ర వర్కింగ్‌ ప్రెసిడెంట్‌ కేటీఆర్‌ ముఖ్య అతిథిగా హాజరై దాదాపు గంటపాటు చేసిన ప్రసంగం సభకు ప్రధాన ఆకర్షణగా నిలిచింది. ప్రసంగం ఆద్యంతం ప్రజల నుంచి చప్పట్లు, హర్షధ్వానాలు వ్యక్తమయ్యాయి.

మూడేళ్ల కాంగ్రెస్‌ ప్రభుత్వ పాలన, సీఎం రేవంత్‌రెడ్డి వ్యవహార శైలిపై అసంతృప్తితో ఉన్న ప్రజలు స్వచ్ఛందంగా సభకు తరలివచ్చారనే అభిప్రాయం బీఆర్‌ఎస్‌ పార్టీ శ్రేణుల్లో వ్యక్తమైంది. ముఖ్యంగా గ్రామీణ ప్రాంతాల నుంచి రైతులు, యువకులు పెద్ద ఎత్తున రావడం పార్టీ నాయకత్వానికి ఉత్సాహాన్నిచ్చింది. జన సమీకరణలో నాయకులు రూపొందించిన వ్యూహాలు ఫలించడంతో సభా ప్రాంగణం జనంతో నిండింది. బుధవారం సాయంత్రం 5 గంటలకు కేటీఆర్‌ రానున్నారని ప్రచారం జరగగా, మధ్యాహ్నం 2 గంటల నుంచే ప్రజలు సభాస్థలికి చేరుకోవడం కనిపించింది. కేటీఆర్‌ ప్రసంగిస్తున్నంతసేపు జనం కుర్చీల్లోనే ఉండి ప్రతి అంశాన్ని ఆసక్తిగా ఆలకించడం, కీలక వ్యాఖ్యల సందర్భంగా చప్పట్లతో స్పందించడం కనిపించింది. సభ ముగిసిన తర్వాత కూడా కేటీఆర్‌ మాట్లాడిన అంశాలపై పట్టణంతోపాటు పల్లెల్లో జోరుగా చర్చ సాగుతున్నది.

స్థానిక ఎమ్మెల్యేపై ఘాటు విమర్శలు

రాష్ట్రస్థాయి రాజకీయ అంశాలతోపాటు నిర్మల్‌ నియోజకవర్గ రాజకీయాలపైనా కేటీఆర్‌ ప్రత్యేకంగా దృష్టి సారించారు. స్థానిక బీజేపీ ఎమ్మెల్యే మహేశ్వర్‌రెడ్డిని లక్ష్యంగా చేసుకొని ఆయన ఎన్నికల సమయంలో ప్రజలకు ఇచ్చిన హామీలు ప్రస్తావించారు. పవర్‌పాయింట్‌ ప్రజెంటేషన్‌ ద్వారా ఎన్నికల హామీలను సభా వేదికపై ఏర్పాటు చేసిన తెరపై ప్రదర్శిస్తూ.. వాటిలో ఏ ఒక్కటైనా అమలైందా? అంటూ ప్రజలను ప్రశ్నించారు. దీంతో సభకు హాజరైన వారు చేతులు ఊపుతూ కాలేదని స్పందించడం చర్చనీయాంశమైంది. స్థానిక ఎమ్మెల్యే ఇచ్చిన హామీల తీరును ప్రశ్నిస్తూ కేటీఆర్‌ చేసిన వ్యాఖ్యలు పార్టీ శ్రేణుల్లో చర్చకు దారితీయగా, వాటికి సంబంధించిన వీడియోలు, సోషల్‌ మీడియాలో విస్తృతంగా ప్రచారమవుతున్నాయి. అలాగే రైతులకు ఇచ్చిన హామీల విషయంలోనూ కేటీఆర్‌ గంతలో రేవంత్‌రెడ్డి చేసిన ప్రసంగాలను సభా వేదికపై వీడియోల రూపంలో ప్రదర్శించారు. ముఖ్యంగా రైతుబంధు పథకాన్ని రద్దు చేసే ప్రసక్తే లేదని, అలా చేసేందుకు నేనేమైనా దివానా గాన్నా? అంటూ గతంలో రేవంత్‌రెడ్డి చేసిన వ్యాఖ్యలను తెరపై చూపించారు. మూడేళ్లలో మూడుసార్లు రైతుబంధు నిలిపివేసిన రేవంత్‌రెడ్డిని ఏమనాలా? అంటూ కేటీఆర్‌ ప్రజలను ప్రశ్నించడంతో.. సభలో పాల్గొన్నవారు ‘దివానా.. దివానా.. రేవంత్‌రెడ్డి’ అంటూ నినాదాలు చేశారు. రైతుబంధు, రైతు సమస్యలు, ఎన్నికల హామీల అమలపై కేటీఆర్‌ చేసిన విమర్శలకు ప్రజల నుంచి నుంచి మంచి స్పందన లభించింది.

‘సోషల్‌’ సునామీ..

సభలో కేటీఆర్‌ చేసిన కీలక వ్యాఖ్యలు, స్థానిక ఎమ్మెల్యేకు సంబంధించిన పవర్‌పాయింట్‌ ప్రజెంటేషన్‌, రేవంత్‌రెడ్డి పాత ప్రసంగాల వీడియోలు ప్రస్తుతం సోషల్‌ మీడియాలో విస్తృతంగా వైరల్‌ అవుతున్నాయి. బీఆర్‌ఎస్‌ కార్యకర్తలతోపాటు సాధారణ ప్రజలు సభలోని ప్రసంగాల క్లిప్పింగ్స్‌ షేర్‌ చేస్తుండటంతో రైతు గర్జన అంశం ఆన్‌లైన్‌ వేదికలపైనా చర్చనీయాంశంగా మారింది. గ్రామాల్లోనూ కేటీఆర్‌ వ్యాఖ్యలపై రాజకీయ చర్చలు సాగుతున్నాయి. సభకు పెద్ద సంఖ్యలో ప్రజలు హాజరుకావడం, ప్రసంగానికి లభించిన స్పందనతో బీఆర్‌ఎస్‌ శ్రేణుల్లో కొత్త ఉత్సాహం కనిపిస్తున్నది. రైతు గర్జన మహాసభ నిర్వహణ, ఏర్పాట్లు, జన సమీకరణలో మాజీ మంత్రి వేముల ప్రశాంత్‌రెడ్డి, మాజీ విప్‌ బాల్క సుమన్‌, బోథ్‌ ఎమ్మెల్యే అనిల్‌ జాదవ్‌, నిర్మల్‌ నియోజకవర్గ ఇన్‌చార్జి రాం కిషన్‌రెడ్డి, ఖానాపూర్‌ నియోజకవర్గ ఇన్‌చార్జి జాన్సన్‌ నాయక్‌, ముథోల్‌ నియోజకవర్గ సమస్వయకర్తలు పడకంటి రమాదేవి, లోలం శ్యాంసుందర్‌, డాక్టర్‌ కిరణ్‌ కొమ్రేవార్‌, విలాస్‌ గాదేవార్‌, యువ నాయకుడు నల్ల వినయ్‌రెడ్డి కీలకంగా వ్యవహరించారు. వీరితోపాటు పార్టీ నాయకులు, కార్యకర్తలు సమష్టిగా కృషి చేశారు. బహిరంగ సభకు లభించిన ప్రజాదరణతో బీఆర్‌ఎస్‌ నాయకులు, కార్యకర్తలు సమరోత్సాహంతో ఉన్నారు.

భరోసా నింపింది..

సోన్‌, నవంబర్‌ 12 ః నిర్మల్‌ జిల్లా కడెం మండలంలోని బెల్లాల్‌ గ్రామం. రైతు గర్జన సభ ఉందని తెలిసి బుధవారం మధ్యాహ్నమే నిర్మల్‌ జిల్లా కేంద్రానికి చేరుకున్నాం. కేటీఆర్‌ సార్‌ ప్రసంగం అన్ని వర్గాల వారికి భరోసా నిచ్చింది. మూడేళ్లపాటు కాంగ్రెస్‌ ప్రభుత్వ మోసాలను పవర్‌ పాయింట్‌ ప్రజెంటేషన్‌ ద్వారా వివరించిన తీరు బాగుంది. కేసీఆర్‌ పదేళ్లలో చేపట్టిన అభివృద్ధి మళ్లీ గుర్తుకొస్తున్నది. కాంగ్రెస్‌ ప్రభుత్వంపై జనం ఎంత కోపంతో ఉన్నారో అర్థమవుతున్నది.

– లచ్చన్న, బెల్లాల్‌ నర్సింగ్‌పూర్‌, కడెం మండలం

జోష్‌ నింపింది..

సోన్‌, నవంబర్‌ 12 ః బుధవారం నిర్వహించిన రైతు గర్జన సభ మాలో జోష్‌ నింపింది. పదేళ్ల కాలంలో రైతులకు పెట్టుబడి సాయం కింద రైతుబంధు, రైతుబీమా, కల్యాణలక్ష్మి, షాదీ ముబారక్‌, ఎరువులు, విత్తనాలు.. ఇట్లా అనేక పథకాలు గుర్తు చేసిన తీరు బాగుంది. కేటీఆర్‌ సార్‌ మాట్లాడింది అందరం ఆలోచించుకోవాలి.

– రాంరెడ్డి, పెండ్‌పెల్లి, భైంసా మండలం