‘పాలమూరు’ పనులకు మళ్లీ బ్రేక్‌!

• అడ్డుకున్న నిర్వాసిత రైతులు
• ఎకరాకు రూ.2లక్షలు చెల్లించాలని డిమాండ్‌

కొల్లాపూర్‌, నవంబర్‌ 13: పాలమూరు రంగారెడ్డి ఎత్తిపోతల పథకానికి మళ్లీ బ్రేకులు పడ్డాయి. కేసీఆర్‌ సర్కార్‌కు పేరొస్తుందని ప్రాజెక్టు నిర్మాణంలో కాంగ్రెస్‌ ప్రభుత్వం జాప్యం చేస్తుండగా, తాజాగా కుడికిళ్ల- నారాపూర్‌ మధ్యన మూడో ప్యాకేజీ వద్ద పనులు తిరిగి ప్రారంభమైన రోజే రైతులు అడ్డుకోవడం చర్చనీయాంశంగా మారింది. ప్రాజెక్టు నిర్మాణ సమయంలో భూములను త్యాగం చేశామని, అందుకు పరిహారంగా గుత్తేదారులు ఎకరాకు రూ. 2 లక్షలు చెల్లించాలని డిమాండ్‌ చేస్తూ శుక్రవారం పనులను అడ్డగించారు.

పీఆర్‌ఎల్‌ఐ ప్రాజెక్టులోనే మూడో ప్యాకేజీ పనులు అత్యంత కీలమైనవిగా ఉన్నాయి. నిలిచిన కొద్దిపాటి పనులు పూర్తయితే పీఆర్‌ఎల్‌ఐలోని మిగిలిన రిజర్వాయర్లకు నీళ్లు వెళ్లేందుకు అవకాశం ఉంటుంది. నిర్వాసిత రైతులు ప్రాజెక్టు పరిధిలో 80 ఎకరాలకు ఎకరాకు రూ.2లక్షలు చొప్పున ఇచ్చి పనులు కొనసాగించాలని డిమాండ్‌ చేస్తున్నారు. అంతవరకు పనులను జరుగనిచ్చేది లేదని స్పష్టంచేశారు.