ఖమ్మం, కరీంనగర్‌ను కరువు జిల్లాగా ప్రకటించాలి

• సీపీఐ నేతలు కూనంనేని, చాడ డిమాండ్‌

కరీంనగర్‌ తెలంగాణచౌక్‌, నవంబర్‌ 10: కరీంనగర్‌, ఖమ్మం ఉమ్మడి జిల్లాలను కరువు జిల్లాగా ప్రకటించాలని, కరువు కోరల్లో చిక్కుకున్న రైతులను వెంటనే ఆదుకోవాలని సీపీఐ రాష్ట్ర కార్యదర్శి కూనంనేని సాంబశివరావు, మాజీ ఎమ్మెల్యే చాడ వెంకటరెడ్డి ప్రభుత్వాన్ని డిమాండ్‌ చేశారు. రైతులు లక్షలాది రూపాయలు అప్పులు తెచ్చి పంటలు పండిస్తే, సాగునీరు అందక, కరెంట్‌ సరిగ్గా లేక పంటలు ఎండిపోతున్నాయని ఆందోళన వ్యక్తంచేశారు.

ఎండిన వరికి ఎకరాకు రూ.30వేలు, పత్తి, మిర్చి పంటలకు రూ.50 వేలు, ఇతర పంటలకు రూ.20వేల చొప్పున నష్టపరిహారం అందించాలని డిమాండ్‌ చేశారు. సీపీఐ ఆధ్వర్యంలో మంగళవారం కరీంనగర్‌, ఖమ్మం, భద్రాద్రి కలెక్టర్‌రేట్ల ఎదుట ధర్నా నిర్వహించారు. రాష్ట్రంలో కరువు తాండవిస్తున్నదని, జాతీయ విపత్తుగా ప్రకటించేలా కేంద్రంపై రేవంత్‌ సర్కార్‌ ఒత్తిడి తేవాలని సీపీఐ నేతలు డిమాండ్‌ చేశారు. కేంద్రంతో చర్చల కోసం రాష్ట్రం నుంచి అఖిల పక్షాన్ని తీసుకుపోవాలని సూచించారు.