గ్యాస్‌ దొరక్క అవస్థలు!

• తరచూ సీఎన్‌జీ కొరతతో ఇబ్బందులు

• ఒక్కో స్టేషన్‌కు 6 వేల కిలోల వరకు డిమాండ్‌

• అందుకు తగ్గట్టు సరఫరా లేదంటున్న నిర్వాహకులు

• సర్కార్‌ పట్టించుకోవడం లేదని ఆటో, క్యాబ్‌ డ్రైవర్ల ఆగ్రహం

సిటీబ్యూరో : సీఎన్‌ జీ కొరత రోజురోజుకు తీవ్రతరమవుతోంది. గ్రేటర్‌లో సీఎన్‌జీ వాహనాల సంఖ్య ఓ వైపు పెరుగుతుంటే అందుకు తగ్గట్టు సీఎన్‌జీ సరఫరా మాత్రం ఉండటం లేదు. నో స్టాక్‌ బోర్డులతో బంక్‌లు దర్శనమిస్తున్నాయి. దీంతో క్యాబ్‌, ఆటో డ్రైవర్లు ఆవేదన వ్యక్తం చేస్తున్నారు. లక్షలు ఖర్చుపెట్టి వాహనాలను కొనుగోలు చేస్తే.. ఇంధన సరఫరా లేకపోతే రైడ్స్‌ ఎలా చేయడమంటూ వాపోతున్నారు. కాగా, నగరంలో సుమారు 5 లక్షలకుపైగా సీఎన్‌జీ వాహనాలు ఉన్నాయి. ప్రస్తుతం మారెట్‌లో పెట్రోల్‌, డీజిల్‌ బంకులతో పాటు ఆటో గ్యాస్‌, సీఎన్‌జీ, లిక్విడ్‌ గ్యాస్‌ కేంద్రాలు వేర్వేరుగా ఉన్నాయి.

గ్రేటర్‌ హైదరాబాద్‌ పరిధిలో 460 పైగా పెట్రోల్‌ బంకులు ఉండగా, అందులో 95 స్టేషన్లలో గ్యాస్‌ పంపులు అందుబాటులో ఉన్నాయి. ఇందులో 25 కేంద్రాల్లో నేచురల్‌ గ్యాస్‌ కేంద్రాలు మాత్రమే కొనసాగుతున్నాయి. సాధారణంగా రోజు వారి డిమాండ్‌ 3.7 లక్షల కిలోలుగా ఉంది. కానీ అందుబాటులో ఉన్నది మాత్రం 1.90 లక్షల కిలోలే. కాగా, నగరంలో ఒక్కో బంక్‌ స్టేషన్‌కు 6 వేల కిలోలకు పైగా డిమాండ్‌ ఉందని నిర్వాహకులు తెలిపారు. మరోవైపు మహా నగరంలో వాహనాల సంఖ్య 88 లక్షలు దాటింది. సుమారు 14.35 లక్షల వరకు కార్లు ఉండగా, 1.46 లక్షల ఆటోరిక్షాలు, 80 వేల క్యాబ్‌లు ఉన్నట్లు అధికార లెకలు స్పష్టం చేస్తున్నాయి. ఆటో గ్యాస్‌, లిక్విడ్‌ గ్యాస్‌కు కొరత లేనప్పటికీ సీఎన్‌జీ పూర్తిస్థాయిలో సరఫరా లేదని నిర్వాహకులు తెలిపారు. పెట్రోల్‌, డీజిల్‌ కంటే సీఎన్‌జీ, ఆటో గ్యాస్‌తో నడిచే వాహనాలు మైలేజీ అధికంగా ఇస్తాయని చాలా మంది సీఎన్‌జీ వాహనాలపై ఆసక్తి చూపిస్తున్నారు. అందుకు తగ్గట్టు ఇంధన సరఫరా మాత్రం ఉండటం లేదని డ్రైవర్లు వాపోతున్నారు.

ఉపాధిని కాపాడాలి

సీఎన్‌జీ కొరత కారణంగా చాలా మంది డ్రైవర్లు బండ్లను అధిక సమయం నడపలేకపోతున్నారు. తెల్లారిలేస్తే ఇంధనం ఏ బంక్‌లో ఉంటుందోనని అన్వేషించాల్సి వస్తోంది. అలా వెతికి వెళ్లేసారికి అక్కడ కిలోమీటర్ల క్యూ ఉంటుంది. ముఖ్యంగా రాత్రి సమయాల్లో నిద్ర మానుకొని వాహనాలన్నీ బంక్‌ల ముందర ఓవైపునకు నిలుపుతున్నాం. అప్పటికే ఆ బంక్‌లోనో స్టాక్‌ అని బోర్డులు ఉంటాయి. కానీ స్టాక్‌ వస్తదేమోనని గంటల తరబడి ఎదురుచూడాల్సిన పరిస్థితి ఉంటుంది. ప్రభుత్వం స్పందించి వెంటనే ఇంధన కొరత సమస్యలను పరిష్కరించాలి. ఆటో, క్యాబ్‌ డ్రైవర్ల ఉపాధిని కాపాడాలి.

– శాతం రమేశ్‌, బీఆర్‌టీయూ ఆటో యూనియన్‌ నేత