‘గాడ్‌ ఆఫ్‌ వార్‌’ కోసం కసరత్తులు

అసుర సంహారం కోసం ఉద్భవించిన వీరుడు, దేవసేనాధిపతిగా, యుద్ధ దేవుడిగా కీర్తి పొందిన సుబ్రహ్మణ్య స్వామి గాథకు భారతీయ పురాణాల్లో ఎంతో ప్రాశస్త్యం ఉంది. ఇప్పుడీ గాథ వెండితెర దృశ్యమానం కాబోతున్న విషయం తెలిసిందే. ఎన్టీఆర్‌ కథానాయకుడిగా త్రివిక్రమ్‌ దర్శకత్వంలో రూపొందనున్న ఈ ప్రతిష్టాత్మక ప్రాజెక్ట్‌ తాలూకు స్క్రిప్ట్‌పై కసరత్తులు మొదలైనట్లు సమాచారం. త్రివిక్రమ్‌ దర్శకత్వంలో రూపొందిన ‘ఆదర్శ కుటుంబం’ ఇటీవలే విడుదలైన విషయం తెలిసిందే.

ఈ నేపథ్యంలో దర్శకుడు త్రివిక్రమ్‌ ‘గాడ్‌ ఆఫ్‌ వార్‌’పై పూర్తిగా దృష్టి సారించినట్లు చెబుతున్నారు. ఈ కథను నేటితరం ప్రేక్షకులకు చేరువ చేసేలా త్రివిక్రమ్‌ సరికొత్త కథనాన్ని సిద్ధం చేస్తున్నారని సమాచారం. తొలుత వర్తమానంలో కథను ప్రారంభించి..అక్కడి నుంచి సుబ్రహ్మణ్య స్వామి పురాణగాథలోకి తీసుకెళ్లేలా స్క్రీన్‌ప్లేను తయారు చేస్తున్నట్లు తెలిసింది. యుద్ధ దేవుడిగా సుబ్రహ్మణ్యస్వామి వీరత్వంతో పాటు ఆయన అవతారానికి సంబంధించిన పురాణ నేపథ్యాన్ని బలంగా ఆవిష్కరించేలా స్క్రిప్ట్‌ని సిద్ధం చేస్తున్నారట.

ఇదిలావుండగా సుబ్రహ్మణ్య స్వామి కథతోనే ధనుష్‌, దర్శకుడు వెట్రిమారన్‌ కలయికలో ‘తమిళ్‌ మురుగన్‌’ అనే భారీ ప్రాజెక్ట్‌ కూడా తెరకెక్కబోతున్నట్లు ప్రచారం జరుగుతున్నది. ఒకే ఇతివృత్తంతో రెండు చిత్రాలు తెరకెక్కనున్న నేపథ్యంలో దర్శకుడు త్రివిక్రమ్‌ తన ‘గాడ్‌ ఆఫ్‌ వార్‌’ కథ ప్రత్యేకంగా ఉండేలా జాగ్రత్తలు తీసుకుంటున్నారని ఫిల్మ్‌నగర్‌ టాక్‌.