AP News | తీసుకున్న రూ.500 తిరిగివ్వ‌లేద‌ని ఓ వ్య‌క్తిపై వేడి నూనె గుప్పిన‌ మ‌హిళ‌

AP News : నెల్లూరు రూరల్ మండలంలో అమాన‌వీయ ఘ‌ట‌న చోటుచేసుకుంది. రూ.500 అప్పు చెల్లించలేదని ఓ మహిళ ఓ వ్య‌క్తిపై సలసల మ‌రిగే నూనె పోసింది. ఈ ఘ‌ట‌న‌లో తీవ్రంగా గాయపడిన బాధితుడు నెల్లూరు ప్రభుత్వ ఆసుపత్రిలో చికిత్స పొందుతున్నాడు. వివ‌రాల్లోకి వెళ్తే.. మాదరాజు గూడూరుకు చెందిన శీనయ్య అనే వ్య‌క్తి అదే ప్రాంతానికి చెందిన హసీనా అనే మహిళ వద్ద రూ.500 అప్పుగా తీసుకున్నాడు.

తీసుకున్న అప్పు చెల్లించాలని ఆ మహిళ అడగ్గా శీన‌య్య ఆమె ఇంట్లో పనిచేసి అప్పు చెల్లించిన విష‌యం చెప్పాడు. ఇంట్లో ప‌ని ఉచితంగా చేశాడ‌ని భావించిన మ‌హిళ‌.. ఆ ప‌నిని త‌న రూ.500కు ముడిపెట్ట‌డంతో ఆగ్ర‌హానికి లోనైంది. ఈ విషయమై ఇద్ద‌రి మధ్య వాగ్వాదం జ‌రిగింది. ఈ క్ర‌మంలో టిఫిన్ సెంటర్‌ నడుపుతున్న హసీనా.. శీన‌య్య‌పై వేడివేడి నూనె గుప్పింది. సమాచారం అందుకున్న రూరల్ పోలీసులు ఘ‌ట‌న‌పై కేసు నమోదు చేసి ద‌ర్యాప్తు చేప‌ట్టారు.