సచివాలయ క్యాంటీన్‌ నిర్వహణ అస్తవ్యస్తం

• ఉద్యోగుల అసంతృప్తి.. పలు ఫిర్యాదులు

హైదరాబాద్‌, నవంబర్‌ 13 (నమస్తే తెలంగాణ): సచివాలయంలో క్యాంటీన్‌ నిర్వహణ అస్తవ్యస్తంగా మారిందంటూ కాంట్రాక్ట్‌ ఏజెన్సీపై ఉద్యోగులు తీవ్ర అసంతృప్తి వ్యక్తం చేస్తున్నారు. క్యాంటీన్‌లో టిఫిన్‌, భోజనం నాణ్యత, సబ్సిడీ అమలు, నిర్వహణలో జవాబుదారీతనం కొరవడిందని ఉద్యోగుల నుంచి ప్రభుత్వానికి వరుసగా ఫిర్యాదులు అందాయి. ప్రస్తుత కాంట్రాక్ట్‌ ఏజెన్సీని తొలగించి, ఉద్యోగుల సహకార సొసైటీ ఆధ్వర్యంలోనే క్యాంటీన్‌ నిర్వహణ చేపట్టాలని ఉద్యోగుల సంఘం డిమాండ్‌ చేసింది.

ఈ డిమాండ్‌ మేరకు క్యాంటీన్‌ నిర్వహణలో మార్పులకు అనుగుణంగా సొసైటీ బోర్డ్‌ ఆఫ్‌ డైరెక్టర్‌ ఎన్నికలకు ప్రభుత్వం అనుమతిచ్చింది. ఈ నేపథ్యంలో నవంబర్‌ 5న సొసైటీ బోర్డ్‌ ఆఫ్‌ డైరెక్టర్ల ఎన్నికలకు సంబంధించి సహకారశాఖ డిప్యూటీ రిజిస్ట్రార్‌ నోటీసు జారీ చేశారు. నవంబర్‌ 10లోపు ఓటర్ల జాబితాపై అభ్యంతరాలు వ్యక్తం చేయాలని సూచించారు. అభ్యంతరాల పరిశీలన, ఓటర్ల తుదిజాబితా ధ్రువీకరణ అనంతరం తదుపరి ప్రక్రియ కొనసాగుతుందని నిర్వాహకులు తెలిపారు.