ఆ టైమ్‌లో వారే నాకు అండ

వ్యక్తిగతంగా, వృత్తిపరంగా రెండు విధాలా బిజీగా ఉన్నారు బాలీవుడ్‌ నటి కియారా అద్వానీ. ఇటీవలే ఆమె అమ్మగా మారిన విషయం తెలిసిందే. ఆ మాతృత్వపు మధురిమలను ఓవైపు ఆస్వాదిస్తూనే, మరోవైపు తాను చేయబోతున్న సినిమాలకు సంబంధించిన కథలను వింటూ బిజీబిజీగా జీవితాన్ని సాగిస్తున్నారు కియారా. ఇదిలావుంటే.. ఇటీవల ఓ ప్రైవేటు ఛానల్‌కి ఇచ్చిన ఇంటర్వ్యూలో ప్రెగ్నెన్సీ ఖరారైన నాటినుంచీ తల్లి అయ్యేంత వరకూ తాను ఎదుర్కొన్న ఛాలెంజ్‌ల గురించి ఆసక్తికరంగా చెప్పుకొచ్చారామె. ‘ప్రెగ్నెన్సీ కారణంగా వచ్చే హార్మోన్లలో మార్పులు, వాంతులు తదితర శారీరక ఇబ్బందుల వల్ల కాస్త ఇబ్బందులు పడ్డాను.

ముఖ్యంగా తొలి మూడునెలలు అయితే.. మనసులో భావాలను పంచుకునే మనిషి లేక బాధపడేదాన్ని. ఆ సమయంలో తల్లులైన తోటి హీరోయిన్లు అలియా, కత్రినాలతో నిరంతరం టచ్‌లో ఉండేదాన్ని. ఇలాంటి సమయంలో మహిళలే మహిళలను అర్థం చేసుకోగలరు. అంతేకాదు, ప్రసవానంతరం మళ్లీ సినిమాల్లోకి రీఎంట్రీ ఇవ్వడం ఎలా? కెరీర్‌ని, కుటుంబాన్నీ ఒకేసారి ఎలా బ్యాలెన్స్‌ చేయాలి? అనే అంశాల విషయంలో అలియా నాకు దిశానిర్దేశం చేసేది. ఈ సందర్భంగా తనకు థ్యాంక్స్‌ చెప్పుకుంటున్నా’ అంటూ గుర్తుచేసుకున్నారు కియారా అద్వానీ.