నిఘా అధికారి కమాల్‌..!

• ఫోర్జరీ కేసులో నిందితుడికి వత్తాసు పెద్ద బాస్‌కు వ్యతిరేకంగా ప్రయత్నాలు
• కీలక జోన్‌లో ఆ అధికారి తీరుపై పలు ఆరోపణలు
• ముడుపులు తీసుకొని పని కాకపోవడంతో స్థానిక పోలీసులపై గుస్సా
• మీ పని చూస్తానంటూ బెదిరించడంతో స్థానిక డివిజన్‌ అధికారితో గొడవ
• నిఘా విభాగంఉన్నతాధికారికి తలనొప్పిగా మారిన వ్యవహారం

హైదరాబాద్‌ సిటీబ్యూరో, నవంబర్‌ 12 (నమస్తే తెలంగాణ): అతనొక నిఘా విభాగం అధికారి. తన పరిధిలోని పోలీసుల పనితీరుపై ఎప్పటికప్పుడు ఉన్నతాధికారులకు నివేదికలు ఇవ్వాల్సిన బాధ్యత అతనిదే. ఇదే అవకాశంగా ఆయా పోలీసు స్టేషన్లపై పెత్తనం చెలాయించడం, కిందిస్థాయి సిబ్బందిపై ఒత్తిడి తేవడం, తనకు నచ్చిన, తనకు వచ్చే కేసుల్లో చేయిపెట్టడం ఆయనకు సాధారణమైంది. హైదరాబాద్‌ నగరంలోనే ప్రముఖులు నివాసముంటున్న కీలక జోన్‌లోని నిఘా విభాగంలో పనిచేస్తున్న సదరు ఉన్నతాధికారి వ్యవహార శైలి కమిషనరేట్‌లోనే చర్చనీయాంశంగా మారింది.

ఇటీవల ఒక కేసులో నిందితుల పక్షాన నిలిచి ఏకంగా పెద్ద సారుకు వ్యతిరేకంగా తన పట్టు నెగ్గించుకోవడానికి ఆయన చేసిన ప్రయత్నాలు వివాదాస్పదంగా మారాయి. రెండు నెలల క్రితం కీలక పోలీసుస్టేషన్‌లో ఓ ఫోర్జరీ కేసు నిందితుడికి వత్తాసు పలుకుతూ ’కమాల్‌’ చేసేందుకు సదరు నిఘా అధికారి పెద్దఎత్తున మామూళ్లు మాట్లాడుకున్నారని తెలిసింది. ఆ నిందితుడిని కేసు నుంచి తప్పించేందుకు సదరు స్టేషన్‌ అధికారులతోపాటు ఆ డివిజన్‌ అధికారిపై ఒత్తిడి తెచ్చినట్టు పోలీసులే గుసగుసలాడుకుంటున్నారు. సదరు నిఘా అధికారి వ్యవహారం ఆ నోటా ఈ నోటా పెద్ద సారు దృష్టికి వెళ్లింది. అప్పటికే ఆ కేసులో బాధితుల పక్షాన పెద్ద సారు ఉన్న సంగతి తెలిసినప్పటికీ, తన చేతివాటం ప్రదర్శించే తొందరపాటులో నిందితుడిని రక్షించేందుకు చివరి క్షణం వరకు ప్రయత్నించడం సారుకు కోపం తెప్పించిందని ఆ జోన్‌లోనే చర్చ నడుస్తున్నది.

నిఘా అధికారి ప్రయత్నాలు ఫలించకపోవడం, సదరు నిందితుడు అరెస్టు కావడంతో స్థానిక పోలీసులపై ఆయన కక్ష సాధింపు చర్యలకు దిగాడనే ఆరోపణలు వినిపిస్తున్నాయి. తనకు ముడుపులు ముట్టిన తర్వాత పనులు అవుతాయని అనుకున్నప్పటికీ, తీరా చివరి దశలో అంతా తారుమారు కావడంతో ఆ నిఘా అధికారి కోపం నషాళానికి ఎక్కింది. దీంతో స్థానిక అధికారిని, ఆయన సిబ్బందిని చెడామడా తిట్టడంతో సహించలేక డివిజన్‌ అధికారి ఆ నిఘా అధికారిపై గుస్సా అయినట్టు సమాచారం. అంతేకాకుండా, ఇలాంటి కేసుల్లో నీవు ఎందుకు వస్తున్నావంటూ తిట్టడమే కాకుండా ఇదేం పనంటూ ఉన్నతాధికారుల దృష్టికి చేరవేశారు.

ఆ అధికారిపై చర్యలు తీసుకొనేనా?
ఆ జోన్‌లోనే హోంగార్డు నుంచి డివిజన్‌ స్థాయి అధికారి వరకూ ప్రతి ఒక్కరిపై నిఘా పెట్టి ఎప్పుడే తప్పు దొరుకుతుందా? అంటూ ఎదురుచూసే నిఘా విభాగం పెద్ద సారుకు ఈ వ్యవహారం చేరినప్పటికీ, ఎలాంటి చర్యలు తీసుకోకపోవడంపై పోలీసువర్గాలు ముక్కున వేలేసుకుంటున్నాయి. రూల్స్‌ కేవలం చిన్నవారిపైనేనా? డివిజన్‌ అధికారులను ఎందుకు వదిలేస్తున్నారంటూ బహిరంగంగానే చర్చించుకుంటున్నారు. ముఖ్యంగా ఆ నిఘా విభాగం డివిజన్‌ అధికారిపై గతం లో కూడా చాలా ఆరోపణలు ఉన్నా యి. అదే జోన్‌లో వేరే డివిజన్‌లో కీలక అమ్మవారి దేవాలయమున్న చోట స్థానిక అధికారితో కలిసి పెద్దఎత్తున కేసుల సెటిల్‌మెంట్లు చేస్తూ వాటాలు పంచుకుంటున్నారని ఆరోపణలు రావడంతో విచారణ చేపట్టిన ఉన్నతాధికారులు ఇటువంటివి మళ్లీ పునరావృతమైతే సహించేది లేదని గతంలో వార్నింగ్‌ ఇచ్చినట్టు సమాచారం.

అంతేకాకుండా, ప్రస్తుతం రాష్ట్ర పోలీసు బాస్‌గా ఉన్న అధికారి గతంలో హైదరాబాద్‌కు పనిచేసిన సమయంలో ఈ నిఘా విభాగం అధికారి నగరంలోని సినిమాహాళ్లు అధికంగా ఉన్న ఆర్టీసీ క్రాస్‌రోడ్స్‌ ప్రాంతంలో పనిచేశారు. కేవలం రెండు మూడు నెలలే ఇన్‌చార్జిగా ఉన్నప్పుడు ఒక కేసులో ఈ అధికారి పనితీరుపై అసంతృప్తి వ్యక్తం చేస్తూ అప్పట్లోనే ఆయన రికార్డులో ప్రధానమైన పోస్టులకు పనికిరాడంటూ రిమార్క్‌ రావడం సంచలనమైంది. అంతర్గతంగా జరిగిన ఈ వ్యవహారం మరోసారి చర్చకు రావడానికి ప్రస్తుతం ఆ నిఘా అధికారి వ్యవహార శైలిపై జోన్‌ పోలీసులతోపాటు కొందరు ఆయనతో పనిచేసిన వారు సైతం పాత ముచ్చటను తెరపైకి తెచ్చి తోటివారితో చెప్పుకొంటున్నట్టు తెలిసింది. నిజాయితీకి మారుపేరుగా పేరొందిన నిఘావర్గం కీలక అధికారి.. ఈ నిఘా అధికారిపై ఎలాంటి చర్యలు తీసుకుంటారనేది కమిషనరేట్‌లో హాట్‌టాపిక్‌గా మారింది.