అప్పుల బాధతో మహిళా రైతు ఆత్మహత్య

• జనగామ జిల్లా ఆగాపేటలో విషాదం

నర్మెట, నవంబర్‌ 12 : పత్తి పంట ఎండిపోవడంతో అప్పుల పాలై మహిళా రైతు ఆత్మహత్య చేసుకున్న ఘటన జనగామ జిల్లా నర్మెట మండలం ఆగాపేటలో చోటుచేసుకున్నది. ఎస్సై రఘుపతి, గ్రామస్తులు తెలిపిన వివరాల ప్రకారం.. గ్రామానికి చెందిన మెట్ల ఉప్పలమ్మ రైతు. ఆమె భర్త 30 ఏండ్ల క్రితం మృతి చెందాడు. ఆమెకు ఇద్దరు కుమారులు. తనకున్న మూడు ఎకరాల్లో పత్తి సాగు చేసింది. సరైన దిగుబడి రాక.. పెట్టుబడులు సైతం మిగలకపోవడంతో తెచ్చిన రూ.5 లక్షల అప్పు మీదపడింది.

అప్పులు ఎలా తీర్చాలో తెలియక మనస్తాపం చెందిన ఆమె బుధవారం ఇంట్లో ఎవరూ లేని సమయంలో పురుగుల మందు తాగి ఆత్మహత్యకు యత్నించింది. గమనించిన కుటుంబ సభ్యులు వెంటనే జనగామ జిల్లా దవాఖానకు తరలించారు. మెరుగైన వైద్యం కోసం వరంగల్‌ ఎంజీఎం దవాఖానలో చేర్పించగా చికిత్స పొందుతూ గురువారం మృతిచెందింది. ఉప్పలమ్మ కుమారుడి ఫిర్యాదు మేరకు కేసు నమోదు చేసి, దర్యాప్తు చేస్తున్నట్టు ఎస్సై రఘుపతి తెలిపారు.